ជុំវិញរឿងរ៉ាវនេះ លោក បូរីស ចនសុន ផ្ទាល់លោកបានចេញមុខមកទទួលស្គាល់កំហុស និងបានសុំទោស ចំពោះការដែលលោកបានរៀបចំកម្មវិធីជប់លៀងនៅនិវេសនដ្ឋានរបស់លោក អំឡុងពេលមានការបិទខ្ទប់ប្រទេសកាលពីឆ្នាំ ២០២០។ ក៏ប៉ុន្តែការសុំទោសនេះ មិនទាន់គ្រប់គ្រាន់នោះទេ ដោយគណបក្សប្រឆាំង និងសមាជិកសភាបានទាមទារឱ្យរូបលោកចុះចេញពីតំណែង ដើម្បីបង្ហាញពីភាពទទួលខុសត្រូវ។
តែយ៉ាងណាមិញ លោក បូរីស ចនសុន កាលពីថ្ងៃពុធសប្ដាហ៍នេះ បានចេញមុខមកច្រានចោលនូវការអំពាវនាវរបស់គណបក្សប្រឆាំង និងសមាជិកសភា ដែលទាមទារឲ្យរូបលោកលែងពីតំណែង ដោយលោកបានឆ្លើយតបថា ការជួបជុំរបស់លោក មិនបានបំពាននូវច្បាប់ដែលបានដាក់ចេញអំឡុងពេលមានការបិទខ្ទប់នោះទេ។ ហើយបច្ចុប្បន្ននេះ រដ្ឋាភិបាលរបស់លោកក៏កំពុងតែរវល់ផ្តោតទៅលើកិច្ចការសំខាន់មួយចំនួន ដូចជាការជំរុញកំណើនសេដ្ឋកិច្ចបន្ទាប់ពីវិបត្តិកូវីដ១៩ និងដឹកនាំការឆ្លើយតបរបស់លោកខាងលិចចំពោះវិបត្តិនៅប្រទេសអ៊ុយក្រែនជាដើម។
អត្ថបទគួរអាន
គួរជម្រាបថា រឿងអាស្រូវនេះក៏ត្រូវបានបើកការស៊ើបអង្កេតដោយមន្ត្រីប៉ូលីសអង់គ្លេសផងដែរ ហើយលទ្ធផលនៃការស៊ើបអង្កេតពីកំហុសនេះ យ៉ាងណានោះ នឹងត្រូវបង្ហាញឆាប់ៗនេះ។ ទោះយ៉ាងណា ក្នុងជួរដ្ឋាភិបាលអង់គ្លេស ពិសេសសមាជិកសភា បានចេញមុខទាមទារឲ្យលោកបូរីសចនសុនចុះចេញពីតំណែង បើទោះបីជាលោកចេញមុខសុំទោសនិងទទួលស្គាល់កំហុសក្ដី។
យ៉ាងណាក៏ដោយចុះ សំឡេងនៃការទាមទារឱ្យលោក បូរីស ចនសុន ចុះចេញពីតំណែងក៏កំពុងដាក់សម្ពាធកាន់តែខ្លាំងទៅលើនាយករដ្ឋមន្ត្រីអង់គ្លេសរូបនេះ។
ក្នុងករណីលោកបូរីស ចនសុន ពិតជាត្រូវចុះចេញពីតំណែងមែននោះ លោកស្រី លីស ទ្រូស បច្ចុប្បន្នជារដ្ឋមន្ត្រីការបរទេសអង់គ្លេស នឹងអាចឡើងជំនួសតំណែងនាយករដ្ឋមន្ត្រីអង់គ្លេសជំនួសលោកចនសុន៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
