រដ្ឋបាលខេត្តព្រះសីហនុនៅព្រឹកថ្ងៃទី២៤ កុម្ភៈ នេះ បានចេញសេចក្តីប្រកាសព័ត៌មានមួយ ស្តីពីការរកឃើញជនជាតិចិនពីររូបឆ្លងជំងឺកូវីដ-១៩។ អ្នកជំងឹទាំងពីររួមមានស្ត្រីជនជាតិចិនអាយុ៣៥ឆ្នាំ ដែលបានធ្វើដំណើរមកពីរាជធានីភ្នំពេញមកកាន់ខេត្តព្រះសីហនុ កាលពីយប់ថ្ងៃទី១៦ កុម្ភៈ ហើយបានស្នាក់នៅសណ្ឋាគារជីនប៉ីព័រអ៊ី ស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ។
ចំណែក១រូបទៀត គឺស្ត្រីជនជាតិចិនអាយុ២២ឆ្នាំ ដែលបានធ្វើដំណើរពីភ្នំពេញមកខេត្តព្រះសីហនុ កាលពីថ្ងៃទី២០ ខែកុម្ភៈ ឆ្នាំ២០២១ ហើយបានស្នាក់នៅសណ្ឋាគារហ័ងហ្គ័នជាយី ស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ។ បច្ចុប្បន្ន ស្ត្រីជនជាតិចិនទាំងពីររូប ត្រូវបានដាក់ឲ្យនៅដាច់ដោយឡែក និងសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ។
អត្ថបទទាក់ទង!
ករណីស្ត្រីជនជាតិចិនទាំងពីររូបឆ្លងជំងឺកូវីដ-១៩ នេះដែរ រដ្ឋបាលខេត្តព្រះសីហនុ បានសម្រេចបិទទ្វារអគារស្នាក់នៅ និងសណ្ឋាគារ ដែលពាក់ព័ន្ធជាមួយស្ត្រីជនជាតិចិនទាំងពីរចំនួន៥ទីតាំងជាបណ្តោះអាសន្ន។ ទីតាំងទាំង៥រួមមានសណ្ឋាគារជីនប៉ីព័រអ៊ីទាំង៣ទីតាំង រួមជាមួយអគារស្នាក់នៅ និងសណ្ឋាគារហ័ងហ្គ័នជាយី។
បើតាមលោក ឃាង ភារម្យ អ្នកនាំពាក្យខេត្តព្រះសីហនុ បច្ចុប្បន្នអ្នកជំនាញសុខាភិបាលនៃខេត្តព្រះសីហនុកំពុងស្វែងរកអ្នកពាក់ព័ន្ធផ្ទាល់ និងប្រយោលជាមួយអ្នកជំងឺទាំងពីររូបខាងលើ ដើម្បីយកមកដាក់ឲ្យនៅដាច់ដោយឡែក និងយកសំណាកទៅពិនិត្យស្វែងរកជំងឺកូវីដ-១៩។
ក្រសួងសុខាភិបាលនៅព្រឹកថ្ងៃទី២៤ ខែកុម្ភៈ ឆ្នាំ២០២១ នេះ បានប្រកាសពីការរកឃើញអ្នកឆ្លងជំងឺកូវីដ-១៩ ថ្មីចំនួន៤០ករណី ក្នុងនោះ៣៨ករណីពាក់ព័ន្ធព្រឹត្តិការណ៍សហគមន៍ ២០កុម្ភៈ ដែលធ្វើចំនួនអ្នកឆ្លងកើនឡើងដល់ ១៣៧នាក់។ ប៉ុន្តែ គិតត្រឹមព្រឹកថ្ងៃទី២៤ កុម្ភៈ ចំនួនអ្នកឆ្លងកូវីដ-១៩ សរុបនៅកម្ពុជាមាន ៦៣៣នាក់ហើយ ក្នុងនោះ អ្នកជាសះស្បើយមាន ៤៧៦នាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
