តាមរយៈការជ្រើសយកខេត្តកោះកុងសម្រាប់បើកទទួលស្វាគមន៍ទេសចរវ៉ាក់សាំង ក៏នឹងក្លាយជាផ្នែកមួយក្នុងការជួយផ្សព្វផ្សាយ និងទាក់ទាញវិនិយោគិនបរទេសឲ្យមកបោះទុនវិនិយោគនៅតំបន់នេះកាន់តែច្រើនផងដែរ។ ក្រៅពីតំបន់តាសាគរ រាជរដ្ឋាភិបាល ក៏បានជ្រើសយកខេត្តព្រះសីហនុ និងក្រុងកោះរ៉ុងធ្វើជាគោលដៅសម្រាប់ទទួលភ្ញៀវទេសចរបរទេស បានចាក់វ៉ាក់សាំងកូវីដ-១៩ រួចនេះដែរ។ នេះបើតាមការគូសបញ្ជាក់ពីក្រុមអ្នកជំនាញផ្នែកអចលនទ្រព្យ។
វិស័យអចលនទ្រព្យនៅតំបន់ទេសចរណ៍ វិស្សមកាលតារាសាគរក្នុងខេត្តកោះកុង អាចនឹងមានការផ្លាស់ប្តូរមុខមាត់របស់ខ្លួន ក្រោយរាជរដ្ឋាភិបាលកម្ពុជា បានជ្រើសរើសយកតំបន់នេះ ធ្វើជាគោលដៅសម្រាប់ត្រៀមទទួលភ្ញៀវទេសចរបរទេស ដែលបានចាក់វ៉ាក់សាំងកូវីដ-១៩ រួច នៅចុងខែវិច្ឆិកា ឆ្នាំ២០២១ នេះតទៅ។ តាមរយៈគម្រោងនេះត្រូវបានលោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាជឿជាក់ថា តម្លៃអចលនទ្រព្យនៅក្បែរតំបន់នោះអាចនឹងឡើងថ្លៃ ក្រោយមានលំហូរវិនិយោគិនបរទេសយ៉ាងច្រើនចូលទៅកាន់តំបន់នេះតាមរយៈគម្រោងខាងលើ។
អ្នកជំនាញរូបនេះ ជឿជាក់ផងដែរថា តំបន់វិស្សមកាលតារាសាគរ វានឹងក្លាយជាផលិតផលទេសចរណ៍ដ៏ទាក់ទាញមួយបន្ថែមទៀតរបស់កម្ពុជា ប្រសិនបើគម្រោងបើកទទួលភ្ញៀវទេសចរបរទេស ដែលបានចាក់វ៉ាក់សាំងកូវីដ-១៩រួចដំណាក់កាលដំបូងអាចទាក់ទាញភ្ញៀវទេសចរអន្តរជាតិបានច្រើន។ ដ្បិតថា នៅតំបន់តារាសាគរបច្ចុប្បន្នបានផ្លាស់ប្តូរមុខមាត់យ៉ាងខ្លាំងលើការអភិវឌ្ឍវិស័យហេដ្ឋារចនាសម្ព័ន្ធ ជាពិសេសវត្តមានព្រលានយន្តហោះអន្តរជាតិតារាសាគរតែម្តង។
អត្ថបទគួរអាន
ឯកឧត្តម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលធ្លាប់បានបញ្ជាក់ប្រាប់ខេមបូណូមីសថា ព្រលានយន្តហោះអន្តរជាតិតារាសាគរ គ្រោងបើកឲ្យហោះហើរសាកល្បងនៅអំឡុងខែធ្នូ ចុងឆ្នាំ២០២១។ អ្នកនាំពាក្យរូបនេះរំពឹងថា ក្រោយព្រលានហោះដែលអាចឲ្យយន្តហោះប្រភេទ Boeing 777 និង Airbus A340 ចុះចតមួយនេះ បើកដំណើរការ វានឹងជួយស្តារ និងជំរុញវិស័យទេសចរណ៍ និងសេដ្ឋកិច្ចកម្ពុជា ដែលរងផលប៉ះពាល់ដោយសារវិបត្តិកូវីដ-១៩ ឲ្យមានភាពល្អប្រសើរឡើងវិញមួយកម្រិតបន្ថែមទៀត។
គួររំលឹកថា រាជរដ្ឋាភិបាលកម្ពុជានឹងបើកតំបន់ទេសចរណ៍ទទួលភ្ញៀវទេសចរបរទេសបានចាក់វ៉ាក់សាំងកូវីដ-១៩ រួចនៅថ្ងៃទី៣០ វិច្ឆិកា ឆ្នាំ២០២១។ សម្រាប់ការបើកទទួលទេសចរវ៉ាក់សាំងដំណាក់កាលដំបូងនេះ រាជរដ្ឋាភិបាល បានជ្រើសរើសតំបន់ទេសចរណ៍ចំនួន៣ រួមមាន ក្រុងកោះរ៉ុងនៃខេត្តព្រះសីហនុ និងតំបន់ទេសចរណ៍វិស្សមកាលតារាសាគរក្នុងខេត្តកោះកុងជាដើម។ គោលបំណង នៃការបើកតំបន់ទេសចរណ៍នេះ គឺដើម្បីស្តារ និងជំរុញវិស័យទេសចរណ៍ និងសេដ្ឋកិច្ចកម្ពុជា ដែលបានរងផលប៉ះពាល់ដោយសារវិបត្តិកូវីដ-១៩ នាពេលកន្លងមក។ ហើយការបើកនេះទៀតសោត ក៏ជាការសាកស្បងមួយ មុនឈានទៅបើកប្រទេសទាំងស្រុងឡើងវិញ បន្ទាប់ពីកម្ពុជាសម្រេចបានជិត១០០% លើផែនការចាក់វ៉ាក់សាំងកូវីដ-១៩ ជូនប្រជាពលរដ្ឋពេញវ័យ១០លាននាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
