សហរដ្ឋអាមេរិករំពឹងថា ការលក់វ៉ាក់សាំងកូវីដ-១៩ ដែលផលិតដោយក្រុមហ៊ុនចំនួនពីររបស់ខ្លួនគឺ ហ្វាយស័រ (Pfizer) និងក្រុមហ៊ុន ម៉ូឌ័រណា (Moderna) នឹងអាចរកចំណូលបានដល់ទៅ ៣២ពាន់លានដុល្លារ នៅក្រោយនេះ។ នេះបើតាមព្យាកររបស់ អ្នកវិភាគរបស់ Wall Street ដែលបានបញ្ជាក់នៅក្នុងសារព័ត៌មាន CNN។
ក្រុមហ៊ុន ហ្វាយស័រ ត្រូវបានគេប៉ាន់ប្រមាណថា នឹងទទួលបានចំណូលពីការលក់វ៉ាក់សាំងនេះប្រមាណ ១៩ពាន់លានដុល្លារអាមេរិកនៅឆ្នាំ២០២១ ខណៈដែលនៅឆ្នាំ២០២០នេះ ក្រុមហ៊ុននេះ រំពឹងនឹងរកចំណូលបានតែប្រមាណ ៩៧៥លានដុល្លារអាមេរិកប៉ុណ្ណោះ។ រីឯ ក្រុមហ៊ុន ម៉ូឌ័រណា វិញរំពឹងនឹងទទួលបានចំណូលជាង១៣ពាន់លានដុល្លារ ពីការលក់វ៉ាក់សាំងកូវីដ-១៩ នៅឆ្នាំ២០២១។
អត្ថបទទាក់ទង!
ដោយសារតែមានឈ្មោះជាក្រុមហ៊ុនផលិតវ៉ាក់សាំងកូវីដ-១៩ វាបានផ្លាស់ប្តូរក្រុមហ៊ុនម៉ូឌ័រណា ពីក្រុមហ៊ុនគេមិនសូវស្គាល់ មកក្លាយជាក្រុមហ៊ុនមានតម្លៃ៦២ពាន់លានដុល្លារអាមេរិក ហើយភាគហ៊ុនរបស់ក្រុមហ៊ុននេះ បានកើនឡើងខ្លាំងរហូតដល់ទៅ ៧០០% នៅឆ្នាំនេះ។
ជាមួយគ្នានេះ ក្រុមហ៊ុនហ្វាយស័រ ក៏នឹងបែងចែកចំណូលពីការលក់វ៉ាក់សាំងរបស់ខ្លួនជាមួយនឹងក្រុមហ៊ុន BioNTech ដែលក្រុមហ៊ុនដៃគូពីអាល្លឹម៉ង់ផងដែរ ដែលក្រុមហ៊ុនទាំងពីរនេះ បានសហការគ្នាក្នុងការអភិវឌ្ឍវ៉ាក់សាំងកូវីដ-១៩នេះឡើង។
ក្រុមប្រឹក្សាយោបល់របស់រដ្ឋបាលគ្រប់គ្រងចំណីអាហារ និងឱសថរបស់អាមេរិកបានបញ្ជាក់ថា រដ្ឋាភិបាលកំពុងធ្វើការងារយ៉ាងឆាប់រហ័ស ដើម្បីផ្ដល់នូវភ្លើងបៃតងសម្រាប់ការអនុញ្ញាតឲ្យប្រើប្រាស់វ៉ាក់សាំងកូវីដ-១៩ ជាផ្លូវការ។ តាមការព្យាកររបស់ស្ថាប័ន Margan Stanley បានឲ្យដឹងថា ក្រុមហ៊ុន ហ្វាយស័រ រំពឹងរកបានចំណូល៩ពាន់៣០០លានដុល្លារ នៅក្នុងឆ្នាំ២០២២ ដល់ឆ្នាំ២០២៣ ខណៈដែលពិភពលោក បន្ដត្រូវការវ៉ាក់សាំងនេះ។
ការរកឃើញនូវវ៉ាក់សាំងកូវីដ-១៩ មិនបានកំណត់នូវការកើនឡើងនៃតម្លៃភាគហ៊ុនរបស់ក្រុមហ៊ុន ហ្វាយស័រនោះទេ ពីព្រោះថាក្រុមហ៊ុននេះ គឺជាក្រុមហ៊ុនធំរួចទៅហើយ។ ទោះជាបែបនេះក្ដី ភាគហ៊ុន ក្រុមហ៊ុនហ្វាយស័រ បានហក់ឡើង ១២% នៅឆ្នាំនេះ។
គួរបញ្ជាក់ដែរថា វ៉ាក់សាំងរបស់ក្រុមហ៊ុន ហ្វាយស័រ និងក្រុមហ៊ុន ម៉ូឌ័រណា ត្រូវបានគេដឹងថា ឆ្លងកាត់ការសាកល្បងបណ្ដោះអាសន្ន ប្រសិទ្ធភាពវ៉ាក់សាំងរបស់ក្រុមហ៊ុនទាំងពីរនេះ គឺមានដល់ទៅ ៩៥%។
ថ្មីៗនេះដែរ ប្រទេសអង់គ្លេសទើបតែសម្រេចអនុញ្ញាតទិញយកវ៉ាក់សាំងពីក្រុមហ៊ុន ហ្វាយស័រ នេះ ដើម្បីចាក់ជូនពលរដ្ឋរបស់ខ្លួនជាផ្លូវការផងដែរ ហើយប្រទេសនេះ ក៏ក្លាយជាប្រទេសលោកខាងលិចដំបូងគេដែលសម្រេចចាក់វ៉ាក់សាំងកូវីដ-១៩ ផ្លូវការជូនពលរដ្ឋរបស់ខ្លួន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
