ការសម្រេច ឈានដល់ការកាត់បន្ថយការនាំចេញកៅស៊ូ របស់ប្រទេសអាស៊ានទាំងបីនេះ គឺបានធ្វើឡើងក្រោយពីមានជំនួបពិភាក្សារវាងក្រុមប្រឹក្សាកៅស៊ូត្រីភាគី អន្តរជាតិ ដែលមានតំណាងពីប្រទេសទាំងបី ដោយជំនួបនេះ បានធ្វើឡើងកាលពីចុងខែកុម្ភៈ កន្លងទៅ។ ការព្រៀមព្រៀងគ្នា កាត់បន្ថយការនាំចេញកៅស៊ូ រយៈពេល៤ខែនេះ នឹងចាប់ផ្ដើមធ្វើឡើងចាប់ពីខែ មេសា ឆ្នាំនេះ តទៅ ដោយមានចំនួនកៅស៊ូប្រមាណ ២៤ ម៉ឺនតោន នឹងត្រូវបានកាត់បន្ថយនាំចេញទៅលើទីផ្សារ។
អត្ថបទទាក់ទង!
ប្រទេស ថៃ ម៉ាឡេស៊ី និងឥណ្ឌូនេស៊ីត្រូវបានគេដឹងថា មានផលិតកម្មកៅស៊ូប្រមាណ៧០% នៃផលិតកម្មកៅស៊ូពិភពលោក។
កិច្ចព្រមព្រៀងរវាងប្រទេសទាំង៣នេះ ក៏មិនមែនទើបតែធ្វើឡើងជាលើកទី១ដែរ ពោលកាលពីចុងឆ្នាំ២០១៧ ក៏មានកិច្ចព្រៀមព្រៀងកាត់បន្ថយការនាំចេញកៅស៊ូប្រមាណ៣៥ ម៉ឺនតោន សម្រាប់រយៈពេល៣ខែផងដែរ។
ក្រៅតែអំពីការទប់ស្កាត់ការនាំចេញកៅស៊ូប្រទេសអាស៊ានទាំងបីនេះ ក៏បានព្រៀមព្រៀងគ្នាព្យាយាមពង្រីកការប្រើប្រាស់កៅស៊ូក្នុងស្រុកឲ្យបានកាន់តែច្រើនឡើងថែមទៀត តាមរយៈការយកកៅស៊ូទៅអភិវឌ្ឍផ្លូវថ្នល់ជាដើម។
គួរបញ្ជាក់ថា ទីផ្សារកៅស៊ូពិភពលោកបានដាំក្បាលចុះប៉ុន្មានឆ្នាំៗជាប់គ្នាមកហើយ ដែលបណ្ដាលមកពីការផ្គត់ផ្គង់មានច្រើនលើសតម្រូវការ។ តួយ៉ាង តម្លៃកៅស៊ូនៅលើទីផ្សារជប៉ុន(Tokyo Commodity Exchange) បានធ្លាក់ចុះជាង ២ ឆ្នាំមកហើយ ខណៈដែលទីផ្សារកៅស៊ូនៅប្រទេសថៃ (RSS3) ក៏បានធ្លាក់ចុះប្រមាណជិត៣ឆ្នាំមកហើយដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
