ធនាគារធំៗចំនួន៣នេះ ត្រូវបានអគ្គនាយកដ្ឋានពន្ធដារ លើកឡើងថា បានចុះអនុស្សរណៈជាមួយក្រសួងសេដ្ឋកិច្ចនិងហិរញ្ញវត្ថុរួចរាល់ហើយ ហើយបាននិងកំពុងផ្ដល់សេវាទទួលប្រាក់ពន្ធជូនអគ្គនាយកដ្ឋានពន្ធដារ។
តាមសេចក្ដីប្រកាសដដែលនេះ បានឲ្យដឹងថា ការផ្ដល់ការអនុញ្ញាតឲ្យធនាគារធំៗទាំង៣ គឺធនាគារ កាណាឌីយ៉ា អ.ក ធនាគារអេស៊ីលីដា ភីអិលស៊ី និងធនាគារវឌ្ឍនៈ ទទួលរ៉ាប់រងលើការប្រមូលពន្ធ គឺដោយសារតែធនាគារកម្ពុជាសាធារណៈ ដែលទទួលបានសិទ្ធិក្នុងការប្រតិបត្តិការប្រមូលពន្ធ-អាករគ្រប់ប្រភេទ ពីអគ្គនាយកដ្ឋានពន្ធដារ កំពុងមានបញ្ហាបច្ចេកទេសខាងផ្នែកប្រព័ន្ធព័ត៌មានវិទ្យា ជាហេតុធ្វើឲ្យធនាគារនេះ អាចដំណើរការបានត្រឹមតែផ្ដល់នូវសេវាទទួលប្រាក់ពន្ធលើអចលនទ្រព្យនៅតាមសាខាធនាគាររាជធានីខេត្តប៉ុណ្ណោះ។
ដោយឡែក ចំពោះការផ្ដល់សេវាទទួលប្រាក់ពន្ធ-អាករ ប្រភេទផ្សេងទៀត រួមទាំងពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ នៅមិនទាន់បានចាប់ផ្ដើមដំណើរការនៅឡើយទេ។
តើអ្នកបានអានអត្ថបទនេះ ឬនៅ?
អាស្រ័យហេតុនេះ ក្នុងអំឡុងពេលដែលបញ្ហាប្រព័ន្ធព័ត៌មានវិទ្យារបស់ធនាគារកម្ពុជាសាធារណៈ មិនទាន់បានដោះស្រាយរួចរាល់ និងដើម្បីជៀសវាងការខកខាន ក៏ដូចជាការរាំងស្ទះដល់ដំណើរការបង់ពន្ធ អគ្គនាយកដ្ឋានពន្ធដារ ក៏បានអំពាវនាវដល់អ្នកមានកាតព្វកិច្ចបង់ពន្ធទាំងអស់ មេតា្ដទៅបង់ពន្ធនៅតាមធនាគារ ឬសាខាធនាគារទាំង៣ គឺធនាគារកាណាឌីយ៉ា អេស៊ីលីដា និងធនាគារវឌ្ឍនៈ ឲ្យបានត្រឹមត្រូវទៅតាមកាលកំណត់។
យ៉ាងណាក៏ដោយ នៅក្នុងសេចក្ដីប្រកាសនេះ មិនបានបញ្ជាក់ថា តើការអនុញ្ញាតឲ្យធនាគារទាំង៣ខាងលើនេះ ទទួលប្រមូលប្រាក់ពន្ធសម្រាប់អគ្គនាយដ្ឋានពន្ធដារ នឹងត្រូវបញ្ចប់សុពលភាពនៅពេលណានៅឡើយទេ៕
