យោងតាមគណៈកម្មការមូលបត្រកម្ពុជា ដែលបានបញ្ជាក់ប្រាប់សារព័ត៌មាន ខេមបូណូមីស មុននេះបន្តិច បានឲ្យដឹងថា ការសម្រេចផ្ដល់សញ្ញាបណ្ណ ដល់ស្ថាប័នហិរញ្ញវត្ថុ និងក្រុមហ៊ុនទាំង ៤ខាងលើនេះ ពីសំណាក់គណៈកម្មការមូលបត្រកម្ពុជានេះ គឺធ្វើឡើងបន្ទាប់ពី មានកិច្ចប្រជុំគណៈកម្មការមូលបត្រកម្ពុជា លើកទី ៥៩ កាលពីថ្ងៃទី ២៥ កុម្ភៈនេះ ដែលដឹកនាំដោយឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងប្រធានគណៈកម្មការមូលបត្រកម្ពុជា។
តាមរយៈកិច្ចប្រជុំនេះ គណៈកម្មការមូលបត្រកម្ពុជា បានសម្រេចអនុម័ត ផ្ដល់ជាការអនុញ្ញាតជាគោលការណ៍ លើសំណើសុំបោះផ្សាយលក់មូលបត្រកម្មសិទ្ធិជាសាធារណៈរបស់ធនាគារអេស៊ីលីដា ខណៈដែលថ្នាក់ដឹកនាំធនាគារ ធ្លាប់បានប្រាប់ខេមបូណូមីសដែរថា បើមិនមានអ្វីប្រែប្រួលទេ តាមផែនការ ធនាគារនេះ អាចនឹងរួចរាល់សម្រាប់ការគោះជួងជួញដូរលើផ្សារហ៊ុន នៅក្នុងត្រីមាសទី១ នៅឆ្នាំ២០២០នេះ។
អត្ថបទទាក់ទង!
បន្ទាប់ពីអេស៊ីលីដា មានធនាគារពាណិជ្ជចំនួន១ និងគ្រឹះស្ថានមីក្រូហិរញ្ញវត្ថុចំនួន១ទៀត ក៏បានទទួលការអនុញ្ញាតជាគោលការណ៍ លើសំណើបោះផ្សាយលក់មូលបត្រជាសាធារណៈរបស់ខ្លួន ពីគណៈកម្មការមូលបត្រកម្ពុជាដែរ។ ប៉ុន្ដែ ខុសពីការបោះផ្សាយលក់មូលបត្ររបស់ធនាគារ អេស៊ីលីដា ស្ថាប័នហិរញ្ញវត្ថុទាំងពីរនោះ គឺបានស្នើសុំបោះផ្សាយលក់មូនបត្របំណុលវិញ។ ស្ថាប័នហិរញ្ញវត្ថុទាំងពីរនោះ គឺ ធនាគារភ្នំពេញ ពាណិជ្ជ ម.ក និងគ្រឹះស្ថានមីក្រូហិរញ្ញវត្ថុប្រាសាក់។ ជាមួយគ្នានេះដែរ គ្រឹះស្ថានមីក្រូហិរញ្ញវត្ថុ ប្រាសាក់ ក៏បានទទួលការអនម័តទទួលស្គាល់ជា នីតិបុគ្គលប្រតិស្រុត ពីសំណាក់គណៈកម្មការមូលបត្រកម្ពុជាផងដែរ។
ក្រុមហ៊ុនមួយចុងក្រោយ ដែលទទួលបានការអនុញ្ញាតជាគោលការណ៍ លើសំណើសុំបោះផ្សាយលក់មូលបត្របំណុលជាសាធារណៈដែរនោះ គឺក្រុមហ៊ុន អ អិម អេ (ខេមបូឌា) ម.ក។
ក្រៅពីនេះទៀត នៅថ្ងៃជាមួយគ្នានេះ គណៈកម្មការមូលបត្រកម្ពុជា ក៏បានអនុម័តជាគោលការណ៍លើសំណើសុំអាជ្ញាបណ្ណក្រុមហ៊ុនមូលបត្រចំនួន ២ គឺ ក្រុមហ៊ុន ហ្វេដឺរ៉ល ឃែភីថល អ៊ិនវេសម៉ិន ឯ.ក ដើម្បីប្រកបអាជីវកម្ម ជាក្រុមហ៊ុនធានាទិញមូលបត្រ និងក្រុមហ៊ុន ភីភី លី ស៊ីឃ្យូរីធី ឯ.ក ដើម្បីប្រកបអាជីវកម្មទីប្រឹក្សាហិរញ្ញវត្ថុ។ ព្រមគ្នានោះ ក៏មានក្រុមហ៊ុនចំនួន ២ ទៀត ផ្សេងទៀត ក៏ទទួលបានការអម័តជាគោលការណ៍លើសំណើរសុំអាជ្ញាបណ្ណក្រុមហ៊ុនថែរក្សាទ្រព្យសម្បិត្តិ ជំនួសផងដែរ ខណៈដែលក្រុមហ៊ុនចំនួន២ ទៀត គឺទទួលបានការអនុម័ជាគោលការណ៍លើសំណើសុំអាជ្ញាបណ្ណក្រុមហ៊ុន គ្រប់គ្រងមូលនិធិ។
សូមបញ្ជាក់ថា មិនទាន់រាប់បញ្ជូល ស្ថាប័នហិរញ្ញវត្ថុ និងក្រុមហ៊ុនដែលទើបតែទទួលបានការអនុម័តជាគោលការណ៍ លើសំណើសុំបោះផ្សាយលក់មូលបត្រខាងលើ គិតមកទល់បច្ចុប្បន្ន ក្រុមហ៊ុនផ្សារមូលបត្រកម្ពុជា មានក្រុមហ៊ុនចុះបញ្ជីសរុបចំនួន ៨ ដែលរួមមាន ក្រុមហ៊ុនចំនួន ៥ បានចុះបញ្ជីជាភាគហ៊ុន និង ៣ទៀត បានចុះបញ្ជីជាសញ្ញាបណ្ណ ហើយក្រុមហ៊ុនទាំង ៨ បានប្រមូលទុនពី ផ្សារមូលបត្រសរុបជាង ១៦០លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
