ធនាគារ ABA នៅកម្ពុជា បានបញ្ជាក់ពីការលក់ភាគហ៊ុនផ្ដាច់នេះ នៅក្នុងប្រកាសព័ត៌មានដែលចេញផ្សាយថ្មីៗនេះ នៅលើគេហទំព័ររបស់ខ្លួន។
សារព័ត៌មាន BNN Bloomberg របស់ប្រទេសកាណាដា បានចុះផ្សាយថា ធនាគារជាតិកាណាដា ទិញភាគហ៊ុននៅសល់ ១០% ដែលខ្លួនមិនទាន់បានកាន់កាប់ នៅក្នុងធនាគារ ABA ក្នុងតម្លៃ ៨៣,៥លានដុល្លារអាមេរិក។
ជាលទ្ធផលនៃការវិនិយោគបន្ថែមនេះ ធនាគារជាតិកាណាដាបានបង្កើនភាពជាម្ចាស់របស់ខ្លួននៅក្នុងធនាគារ ABA រហូតដល់ ១០០% តែម្តង។
អត្ថបទទាក់ទង
គួររំឭកថា ធនាគារជាតិកាណាដា បានក្លាយជាភាគហ៊ុនិករបស់ធនាគារ ABA នៅកម្ពុជា នៅក្នុងឆ្នាំ២០១៤ ដោយបានទិញយកចំណែកភាគហ៊ុនចំនួន ១០%។ ហើយបន្ទាប់មកក៏បានបង្កើនការទិញយកចំណែកភាគហ៊ុនបន្ថែមរហូតដល់ ៤២% នៅក្នុងឆ្នាំ២០១៥ និងបង្កើនដល់ ៩០% នៅក្នុងឆ្នាំ២០១៦។
នៅក្នុងប្រកាសព័ត៌មាន លោក Askhat Azhikhanov នាយកប្រតិបត្តិរបស់ធនាគារ ABA បាននិយាយថា “ប្រតិបត្តិការចុងក្រោយរបស់ធនាគារជាតិកាណាដា បង្ហាញយ៉ាងច្បាស់ពីទំនុកចិត្តខ្ពស់របស់ធនាគារ មកលើ ABA និងមកលើទីផ្សារធនាគារនៅក្នុងប្រទេសកម្ពុជា។"
គិតមកត្រឹមថ្ងៃទី៣០ ខែកញ្ញា ឆ្នាំ២០១៩ ទ្រព្យសកម្មរបស់ធនាគារ ABA មានចំនួន ៤,១ប៊ីលានដុល្លារ។ ធនាគារផ្តល់សេវាជូនដល់អតិថិជនជាង ៦៥០.០០០នាក់ តាមរយៈបណ្តាញសាខាចំនួន ៧០សាខា កន្លែងស្វ័យសេវាធនាគារជាង ៥៥០កន្លែង និងប្រព័ន្ធធនាគារអនឡាញនិងធនាគារតាមទូរស័ព្ទជាច្រើនទៀត៕
