លោកស្រី ម៉ារ អមរា អនុប្រធាននាយកប្រតិបត្តិរបស់ធនាគារអេស៊ីលីដា បានអះអាង នៅឆ្នាំ២០២០នេះ បើទោះបីជាមេរោគរាតត្បាតកំពុងតែបន្ដកើតឡើង និងមានបញ្ហាគ្រោះធម្មជាតិមួយចំនួនក៏ដោយចុះ ប៉ុន្ដែ ប្រតិបត្តិការអាជីវកម្មរបស់ធនាគារអេស៊ីលីដា នៅតែបន្ដនូវភាពរឹងមាំរបស់ខ្លួន ដោយរំពឹងថាប្រាក់ចំណេញនៅឆ្នាំ២០២០ អាចនឹងកើនឡើងដល់ជាង១០០ លានដុល្លារ ពោលគឺអាចកើនឡើងលើសផែនការតិចតួច ខណៈកាលពីឆ្នាំ២០១៩ ប្រាក់ចំណេញរបស់អេស៊ីលីដាមានប្រមាណ ១២០លានដុល្លារ។
បើតាមលោកស្រី អមរា នៅត្រីមាសទី ៣ ឆ្នាំ២០២០ ប្រតិបត្តិការអាជីវកម្មរបស់ធនាគារ បានវិលមករកសភាពល្អប្រសើរជាងមុនគួរឲ្យកត់សម្គាល់។ តួយ៉ាង តាមរបាយការណ៍សង្ខេបហិរញ្ញវត្ថុរបស់សម្ព័ន្ធធនាគារអេស៊ីលីដា បានឲ្យដឹងថា នៅត្រីមាសទី៣ ឆ្នាំ២០២០នេះ ប្រាក់ចំណូលសរុបដែលធនាគារនេះ ទទួលបានមានដល់ទៅ ប្រមាណជិត ១៤៣ លានដុល្លារអាមេរិក ដែលចំនួននេះ គឺមានប្រហាក់ប្រហែលនឹងត្រីមាសទី ៣ កាលពីឆ្នាំ២០១៩ដែរ ខណៈដែលប្រាក់ចំណេញ ក្រោយបង់ពន្ធរួចមានប្រមាណជិត៣៥លានដុល្លារ កើនឡើងជាង២៣%។
អត្ថបទទាក់ទង!
អនុប្រធាននាយកប្រតិបត្តិធនាគារអេស៊ីលីដាបានបន្ថែមទៀតថា ចំពោះផលប៉ះពាល់លើឥណទានអតិថិជន នៅអំឡុងពេលកូវីដ-១៩ គឺមានប្រមាណ ៤% ប៉ុណ្ណោះ នៃទំហំឥណទានសរុប ប៉ុន្ដែ នៅត្រីមាសទី ៣កន្លងទៅ បញ្ហានេះ ហាក់មានភាពប្រសើរឡើងវិញច្រើន ដោយសារតែប្រជាពលរដ្ឋមានការប្រកបអាជីវកម្មល្អប្រសើរឡើងវិញ។ ដោយឡែក ចំពោះឥណទានខូចមិនដំណើរនោះ គឺមានប្រមាណជាង២% ខណៈដែលកាលពីឆ្នាំ២០១៩ មានប្រមាណ១%ប៉ុណ្ណោះ។
សូមបញ្ជាក់ថា គិតចាប់ពីថ្ងៃទី១ ខែកក្កដា ដល់ថ្ងៃទី៣០ខែកញ្ញាឆ្នាំ២០២០ ទំហំប្រាក់បញ្ញើសរុបដែលធនាគារអេស៊ីលីដា ទទួលបានបានកើនឡើងជិត១៦០លានដុល្លារ ហើយសមតុល្យឥណទានសរុបវិញ បានកើនឡើងជិត២៦៥ លានដុល្លារ បើធៀបនឹងដំណាច់ឆ្នាំ២០១៩។
បើគិតត្រឹមថ្ងៃទី ៣០ខែកញ្ញា ធនាគារអេស៊ីលីដា មានទ្រព្យសកម្មសរុបប្រមាណជាង ៦ពាន់៣រយលានដុល្លារ កើនឡើងប្រមាណជាង ២២៨ លានដុល្លារ ឬស្មើនឹងកំណើនជិត៤% បើធៀបនឹងត្រឹមដំណាច់ឆ្នាំ២០១៩កន្លងទៅ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
