ម៉ាស៊ីន VTM នេះ គឺជាម៉ាស៊ីនស្វ័យប្រវត្តិដែលធ្វើឲ្យអតិថិជនងាយស្រួលក្នុងការបើកគណនី និងបោះពុម្ពបណ្ណ អេធីអឹម អេស៊ីលីដា (ATM Classic Card) បានដោយខ្លួនឯង និងយ៉ាងឆាប់រហ័ស ហើយអាចធ្វើប្រតិបត្តិការផ្សេងៗបានភ្លាមៗ បន្ទាប់ពីទទួលបានបណ្ណ ។
លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារ នៃធនាគារ អេស៊ីលីដា បានមានប្រសាសន៍ថា ៖ «ពេលមុន អតិថិជនលោកអញ្ជើញមកបើកគណនីនៅធនាគារ អេស៊ីលីដា លោកត្រូវការស្នើសុំបណ្ណ អេធីអឹម យកទៅប្រើប្រាស់ ហើយការស្នើសុំនេះត្រូវរង់ចាំពេលវេលាយ៉ាងតិចណាស់ក៏ ៣ថ្ងៃដែរ ប៉ុន្តែ ឥឡូវនេះ មិនចាំបាច់រង់ចាំទៀតទេ ! ពេលគាត់អញ្ជើញមកបើកគណនី ហើយគាត់ត្រូវការស្នើសុំបណ្ណ អេធីអឹម (ATM Classic Card) គាត់បោះពុម្ពបណ្ណនេះដោយខ្លួនឯង បានភ្លាមៗ ពីម៉ាស៊ីនដាក់ប្រាក់ស័្វយប្រវត្តិរបស់ធនាគារ អេស៊ីលីដា ហៅថា VTM (Virtual Teller Machine) ដោយងាយស្រួល ។»
លោកស្រីនាយិកាបានបញ្ជាក់បន្ថែមទៀតថា នៅពេលបន្តិចទៀត អតិថិជនចង់ដូរបណ្ណចាស់យកបណ្ណថ្មី ឬបណ្ណខូច ឬបាត់បណ្ណ គ្រាន់តែលោកអញ្ជើញមកដល់ម៉ាស៊ីនបើកគណនីស័្វយប្រវត្តិ VTM គាត់នឹងបោះពុម្ពបណ្ណចេញពីម៉ាស៊ីនបានភ្លាមៗ ផងដែរ ។
អតិថិជនប្រើប្រាស់ម៉ាស៊ីនបើកគណនីដោយស្វ័យប្រវត្តិ (VTM) នៅស្នាក់ការកណ្ដាលរបស់ធនាគារ អេស៊ីលីដា ។
អត្ថបទទាក់ទង
អតិថិជនអាចបើកគណនីធនាគារ (គណនីឯកត្តជន) តាមម៉ាស៊ីន វីធីអឹម (VTM) ជាប្រាក់រៀល ប្រាក់ដុល្លារអាមេរិក ប្រាក់បាត និងប្រាក់អឺរ៉ូ នូវគណនីដូចតទៅ ៖ ១) គណនីបញ្ញើសំចៃ រួមទាំងគណនីបើកប្រាក់បៀវត្សរ៍; ២) គណនីចរន្ត និង ៣) គណនីបញ្ញើតាមតម្រូវការ ។
ចំពោះប្រាក់តម្កល់ដំបូងវិញ សម្រាប់គណនីបញ្ញើសំចៃ និងគណនីបើកប្រាក់បៀវត្ស គឺមិនតម្រូវទេ ។ ប្រាក់តម្កល់ដំបូងសម្រាប់គណនីបញ្ញើតាមតម្រូវការ គឺ ១០ដុល្លារអាមេរិក ឬសមមូលរូបិយបណ្ណផ្សេង។ ប្រាក់តម្កល់ដំបូងសម្រាប់ គណនីចរន្ត គឺ ១០០ដុល្លារអាមេរិក ឬសមមូលរូបិយបណ្ណផ្សេង ។ អតិថិជនត្រូវដាក់ប្រាក់តម្កល់ដំបូងតាមម៉ាស៊ីន វីធីអឹម (VTM) ជាប្រាក់ដុល្លារអាមេរិក ទោះបីគណនីនោះជាប្រាក់រៀល ឬបាត ក៏ដោយ ។ ចំណែកគណនីជាប្រាក់អឺរ៉ូ អតិថិជនត្រូវដាក់ប្រាក់នៅបញ្ជរបេឡា ។
អតិថិជនប្រើប្រាស់ម៉ាស៊ីនបើកគណនីដោយស្វ័យប្រវត្តិ (VTM) នៅស្នាក់ការកណ្ដាលរបស់ធនាគារ អេស៊ីលីដា ។
ឯកសារតម្រូវសម្រាប់បើកគណនី ៖ សម្រាប់ជនជាតិខ្មែរ គឺត្រូវមានអត្តសញ្ញាណបណ្ណសញ្ជាតិខ្មែរ ឬលិខិតឆ្លងដែន (នៅមានសុពលភាពយ៉ាងតិច ៣ខែ) ។ រីឯសម្រាប់ជនបរទេសវិញ គឺ ត្រូវការលិខិតឆ្លងដែន (នៅមានសុពលភាពយ៉ាងតិច ៣ខែ); ទិដ្ឋាការចេញ-ចូល ដែលនៅមានសុពលភាព (លើកលែងប្រទេសដែលមិនតម្រូវ); អាសយដ្ឋានទំនាក់ ឬលិខិតបញ្ជាក់ការងារ ឬបណ្ណការងារជនបរទេស ឬបណ្ណស្នាក់នៅអចិន្ត្រៃយ៍ និង លេខទូរស័ព្ទទំនាក់ទំនង ឬអ៊ីម៉ែល។
របៀបបើកគណនី តាមម៉ាស៊ីនវីធីអឹម
- ដំបូងជ្រើសរើសភាសា
- ជ្រើសរើស "បើកគណនីឯកត្តជន / Open Personal Account"
- បំពេញព័ត៌មានរបស់លោកអ្នក ស្កែនឯកសារអត្តសញ្ញាណ ស្កែនស្នាមម្រាមដៃ និងចុះហត្ថលេខា
- សូមរង់ចាំការអនុម័តពីភ្នាក់ងាររបស់ធនាគារភ្លាមៗ ។ ក្រោយពីទទួលការពិនិត្យ និងបញ្ជាក់ពីភ្នាក់ងាររបស់ធនាគារ លោកអ្នកនឹងទទួលបានផ្ទាំងជោគជ័យនៅលើកញ្ចក់ម៉ាស៊ីន រួចបន្តការដាក់ប្រាក់ចូលគណនី ៕
