រដ្ឋមន្ត្រីក្រសួងកសិកម្ម បញ្ជាឲ្យរឹតបន្តឹងសំណើនាំចូលផលិតផលជលផល

រដ្ឋមន្ត្រីក្រសួងកសិកម្មកម្ពុជានាពេលថ្មីៗនេះ បានចេញសេចក្តីណែនាំ ដោយបានចាត់ ឲ្យរដ្ឋបាលជលផលរបស់ខ្លួនរិតបន្តឹងការនាំចូលផលិតផលជលផលពីបរទេស ដែលមានការប្រកួតប្រជែងខ្លាំងជាមួយផលិតផលជលផលក្នុងស្រុក។

រដ្ឋមន្ត្រីក្រសួងកសិកម្មប្រាប់ឲ្យមន្ត្រី រឹតបន្តឹងសំណើនាំចូលផលិតផលជលផល

សេចក្តីណែនាំដែលចុះហត្ថលេខាដោយរដ្ឋមន្ត្រីក្រសួងកសិកម្មក្នុងចំណោមវិធានការបន្ទាន់ចាំបាច់ត្រង់ចំណុចចុងក្រោយបញ្ជាក់ថា រដ្ឋបាលជលផលត្រូវពិនិត្យឲ្យបានគ្រប់ជ្រុងជ្រោយនូវ សំណើសុំនាំចូលផលនៃផលិតផលជលផលពីបរទេស ដោយមិនត្រូវអនុញ្ញាតឲ្យមានការនាំចូលផលនៃផលិតផលជលផលដែលមានការប្រកួតប្រជែងខ្លាំងជាមួយផលនៃផលិតផលជលផលក្នុងស្រុកនោះឡើយ។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបញ្ជាក់ថា រដ្ឋាភិបាលកំពុងខិតខំប្រឹងប្រែងជំរុញវារីវប្បកម្ម ដើម្បីបង្កើនសមត្ថភាពផ្គត់ផ្គង់ក្នុងស្រុក និងឈានទៅដល់ការនាំចេញផលនេសាទពីកម្ពុជាទៅទីផ្សារអន្តរជាតិនៅពេលអនាគត ដែលជាក់ស្តែងនៃផែនការគឺបាននឹងជំរុញឲ្យប្រជាពលរដ្ឋចំនួនពី ៥ ទៅ ១០ ម៉ឺនគ្រួសារ ចិញ្ចឹមត្រី និងកង្កែប នៅក្នុងតង់ប្លាស្ទិកដែលមានរយៈពេលត្រឹម ៣ ខែអាចនឹងប្រមូលផលបាន។

ឯកឧត្តមបញ្ជាក់ថា វិធានការរិតបន្តឹងសំណើសុំនាំចូលផលនៃផលិតផលជលផលពីបរទេសនាពេលនេះ គឺដើម្បីទប់ស្កាត់ការនាំចូលដែលធ្វើឲ្យប៉ះពាល់ដល់អ្នកចិញ្ចឹមក្នុងស្រុក ខណៈលទ្ធភាពនៃការចិញ្ចឹមក្នុងស្រុកកំពុងមានការកើនឡើង និងអាចបំពេញតម្រូវការក្នុងស្រុកបានគ្រប់គ្រាន់ទាំងការចាប់ផលជលផលធម្មជាតិ និងការចិញ្ចឹម ដូច្នេះក្នុងអំឡុងពេលនេះមិនគួរគប្បីឲ្យមានការនាំចូលទៀតនោះឡើយ។

ឯកឧត្តមបន្ថែមថា «យើងនឹងពិនិត្យមើលត្រីប្រភេទណាដែលកម្ពុជាមិនអាចផលិតបាន ហើយបម្រើដល់វិស័យទេសចរណ៍ គឺអនុញ្ញាតឲ្យមានការនាំចូលបាន តួយ៉ាងមានដូចបង្កង ឬអាហារសមុទ្រផ្សេងទៀតដែលចាំបាច់បម្រើដល់វិស័យភោជនីដ្ឋានក្នុងស្រុក គឺអាចនាំចូលបាន ប៉ុន្តែចំពោះត្រីទឹកសាបដែលកម្ពុជាមាន គឺមិនត្រូវបានអនុញ្ញាតឲ្យមានការនាំចូលឡើយ»។

ការចេញនូវវិធានការទប់ស្កាត់នេះ គឺវាស្របគ្នាទៅនឹងការជំរុញការចិញ្ចឹមក្នុងស្រុក ខណៈកន្លងមកមើលឃើញថា ការនាំចូលផលនៃផលិតផលជលផលពីបរទេសមានចំនួនប្រមាណ ៥ភាគរយក្នុង១ឆ្នាំៗ។ ដែលការទប់ស្កាត់ជាមុននេះនឹងជួយជំរុញផលិតកម្មក្នុងស្រុករបស់កម្ពុជាពិសេសគឺវារីវប្បកម្ម និងព្រមទាំងលើកទឹកចិត្តឲ្យការចិញ្ចឹមក្នុងស្រុកមានតម្លៃមួយសមស្រប។

ឯកឧត្តមបានបញ្ជាក់ទៀតថា កន្លងមកក្រសួងកសិកម្ម បានដាក់ចេញនូវវិធានការជាបន្តបន្ទាប់ ដើម្បីបង្កើនផលិតកម្មស្បៀងអាហារ មានដូចជា អង្ករ ត្រី សាច់សម្រាប់បំពេញសេចក្ដីត្រូវការក្នុងស្រុក និងបម្រើឱ្យការនាំចេញទៅកាន់ទីផ្សារអន្តរជាតិ ពិសេសក្នុងបរិបទជំងឺកូវីដ-១៩ ដែលកំពុងរាតត្បាតនៅទូទាំងសកលលោក។

ជាលទ្ធផល ផលិតកម្ម កសិកម្មទាំងស្បៀងអាហារ និងមិនមែនស្បៀងអាហារ មានការកើនឡើងគួរឱ្យកត់សម្គាល់ ហើយប្រជាកសិករមួយ ចំនួនកំពុងជួបបញ្ហាទីផ្សារលក់ផលិតផលទាំងនោះផងដែរ។

របាយការណ៍ក្រសួងកសិកម្មបង្ហាញថា នៅឆមាសទី ១ ឆ្នាំ ២០២០ កម្ពុជាបាននាំចេញផលនេសាទសរុប ១.៣៧២ តោន ទៅកាន់ទីផ្សារអន្តរជាតិ ដោយមានធ្លាក់ចុះប្រមាណ ៨០ ភាគរយ បើធៀបនឹងឆមាសទី ១ ឆ្នាំ ២០១៩ ដែលមានចំនួន ៨.៧១០ តោន។

ក្នុងរយៈពេល៦ខែដើមឆ្នាំ២០២០នេះដែរ ការចិញ្ចឹមត្រី និងបង្គារអនុវត្តន៍បានចំនួនជាង ១៣ម៉ឺនតោនស្មើនឹងជាង ៣៧ភាគរយនៃផែនការ ធៀបនឹងរយៈពេលដូចគ្នាឆ្នាំ២០១៩ កើនជាង ២ម៉ឺនតោន។ រីឯការចិញ្ចឹមក្រពើអនុវត្តបានជាង ១៤ម៉ឺនក្បាលស្មើនឹង ៤៧ភាគរយនៃផែនការកើនឡើងជិត ១ពាន់ក្បាល និងការភ្ញាស់កូនត្រីពូជអនុវត្តន៍បានជា ៨៣៥លានកូនស្មើនឹងជាង ៤ភាគរយនៃផែនការ ដោយកើនឡើងជាង ៥០ម៉ឺនកូន៕