ស្របពេលដែល នៅប៉ុន្មានឆ្នាំចុងក្រោយនេះ ទិន្នផលវារីវប្បកម្មបង្ហាញពីការកើនឡើងនោះ រាជរដ្ឋាភិបាលកម្ពុជា នៅឆ្នាំ២០២០ ក៏កំពុងដុតដៃដុតជើងជំរុញឲ្យពលរដ្ឋពង្រីកការធ្វើកសិកម្មបន្ថែម ពិសេសគឺការចិញ្ចឹមសត្វ ដើម្បីផ្គត់ផ្គង់ទីផ្សារក្នុងស្រុកផង និងបំពេញតម្រូវការនាំចេញផង ដ្បិតថា តម្រូវការស្បៀងអាហារកំពុងមានការកើនឡើងកាន់តែខ្លាំងនៅឆ្នាំ២០២០នេះ ព្រោះតែមានវិបត្តិមេរោគឆ្លងកូវីដ-១៩កំពុងរីករាលដាល។
ឯកឧត្តម វេង សាខុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា គោលនយោបាយដ៏ចម្បងរបស់រដ្ឋាភិបាលក្នុងការធានាសន្តិសុខស្បៀង ជូនប្រជាពលរដ្ឋនិងកាត់បន្ថយក្នុងការដាក់សំពាធលើធនធានជលផលក្នុងដែនទឹកធម្មជាតិ ការអភិវឌ្ឍវារីវប្បកម្ម គ្រប់រូបភាព និងគ្រប់ទីកន្លែង ត្រូវដាក់ឲ្យអនុវត្តតាមនៅតាមបណ្តាខេត្តនានា។ ជាក់ស្តែង ការអភិវឌ្ឍវារីវប្បកម្មគ្រប់ប្រភេទ នៅឆ្នាំ ២០០៩ អនុវត្តបានត្រឹមតែ ៥ម៉ឺនតោន និងការភ្ញាស់កូនត្រីពូជអនុវត្តបានជាង ៦៩ លានក្បាល តែប៉ុណ្ណោះ។ ប៉ុន្តែមកដល់ឆ្នាំ២០១៩ ការធ្វើវារីវប្បកម្ម បានកើនឡើងរហូតដល់ ជាង៣០ម៉ឺនតោន ក្នុងនោះ ផលចិញ្ចឹមត្រីរ៉ស់ ត្រីឆ្តោ មានចំនួនជាង ៧ម៉ឺនតោនហើយ និងការភ្ញាស់កូនត្រីពូជអនុវត្តបានចំនួន ២២២ លានក្បាល ដែលនេះបញ្ជាក់ឱ្យឃើញថា ទិន្នផលវារីវប្បកម្មកើនឡើងជាលំដាប់ពីមួយឆ្នាំទៅមួយឆ្នាំ ដែលរយៈពេល៥ឆ្នាំចុងក្រោយនេះ កំណើនជាមធ្យម២០% ក្នុងមួយឆ្នាំ។
អត្ថបទទាក់ទង!
ឯកឧត្តម វេង សាខុន បានបញ្ជាក់បន្ថែមថា តា«តាមផែនការយុទ្ធសាស្ត្រ គឺក្រសួងកសិកម្មមានគោលដៅដើម្បីសម្រេចបានផលិតផលវារីវប្បកម្មចំនួន ៧៤ម៉ឺនតោន នៅឆ្នាំ២០២៤ ដែលមានកំណើនជាមធ្យម២០% ជារៀងរាល់ឆ្នាំ។»
យោងតាមសារចរណែនាំ ស្ដីពីការបង្កើនយុទ្ធនាការជំរុញផលិតកម្មកសិកម្ម របស់ក្រសួងកសិកម្មបានឲ្យដឹងថា វិស័យកសិកម្ម ពិតជាត្រូវឈរនៅក្នុងអាទិភាពមួយខ្ពស់ ដើម្បីឆ្លើយតបទៅនឹងបញ្ហា ផ្ទុះរាលដាលនៃកូវីដ-១៩ ដែលកំពុងបង្ករឲ្យមានផលប៉ះពាល់អវិជ្ជមានដល់សេដ្ឋកិច្ច សង្គម និងជីវភាពរស់នៅរបស់ប្រជាពលរដ្ឋកម្ពុជា រួមទាំងពិភពលោកទាំងមូលផងដែរ។ ជាក់ស្ដែង សេដ្ឋកិច្ចកម្ពុជា នឹងមានផលប៉ះពាល់ពីវិបត្តិកូវីដ-១៩ នេះ ដោយបើតាមការប៉ាន់ស្មានជាបឋមរបស់រាជរដ្ឋាភិបាលគឺសេដ្ឋកិច្ចកម្ពុជានឹងធ្លាក់ចុះអវិជ្ជមាន -១,៩% នៅឆ្នាំ២០២០នេះ។ ក្នុងបរិការណ៍នេះ ការបង្កើនផលិតកម្មស្បៀងអាហារ អង្ករ ត្រី សាច់ ឲ្យបានគ្រប់គ្រាន់ និងនាំចេញទៅកាន់ទីផ្សារអន្តរជាតិ គឺជារឿងមួយចាំបាច់បំផុត។
បន្ថែមពីនេះ ក្រសួងកសិកម្មក៏បាននិងកំពុងរៀបចំធ្វើយុទ្ធនាការជាទ្រង់ទ្រាយធំ ប្រកបដោយប្រសិទ្ធភាព ក្នុងការបំផុសប្រជាកសិករនៅតាមមូលដ្ឋាន ដែលមានសក្ដានុពេលឲ្យធ្វើការដាំដុះ ចិញ្ចឹមសត្វ និងវារីវប្បកម្ម ស្របតាមវិធានការបច្ចេកទេសកសិកម្មទំនើបផងដែរ។
ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម បានបញ្ជាក់កាលពីដើមខែកក្កដានេះថា មកទល់ពេលនេះ មានអ្នកដាក់ពាក្យស្នើសុំកម្ចីពីធនាគារអភិវឌ្ឍនជនបទ និងកសិកម្ម ប្រមាណជាង ៣០០ ពាក្យស្នើសុំហើយ។ ក្នុងនោះ បើគិតជាទំហំទឹកប្រាក់សរុបមានប្រមាណ ៣៥ លានដុល្លារ ខណៈដែលកញ្ចប់ថវិកាបម្រុងសរុបមាន ៥០លានដុល្លារ ហើយធនាគារក៏បានអនុម័តផ្ដល់កម្ចីតាមសំណើរសុំទាំងនោះ បានខ្លះៗហើយដែរ ដែលប្រមាណជិត១០លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
