៩ខែឆ្នាំនេះ កម្ពុជារកចំណូលបានជាង៧៥លានដុល្លារពីការលក់ប័ណ្ណទស្សនាអង្គរវត្ត

គិតត្រឹមរយៈពេល៩ខែឆ្នាំ២០១៧ ចំណូលពីការលក់ប័ណ្ណទស្សនារមណីយដ្ឋានអង្គរមានចំនួនជាង៧៥លានដុល្លារអាមេរិក ដោយមានការកើនឡើងរហូតដល់ជាង៧០% ធៀបនឹងរយៈពេលដូចគ្នាកាលពីឆ្នាំ២០១៦កន្លងទៅ ហើយចំណូលនេះមួយចំណែកក៏មានការឧបត្ថម្ភចូលមូលនិធិមន្ទីរពេទ្យគន្ធបុប្ផាផងដែរ។ នេះបើតាមការប្រកាសព័ត៌មានពីគ្រឹះស្ថានអង្គរ។

ប្រាសាទអង្គរវត្ត រូបភាព៖ ហេង ភារម្យ

ដោយ ចាន់ មង្គល 6 years

អំពី អង្គរវត្ត

គ្រឹះស្ថានអង្គរដែលជាស្ថាប័នគ្រប់គ្រងចំណូលនៃការលក់ប័ណ្ណទស្សនារមណីយដ្ឋានអង្គរ បានឲ្យដឹងថា ចំនួនភ្ញៀវទេសចរដែលបានចូលទស្សនារមណីយដ្ឋានអង្គរបានកើនឡើងដល់ជាង១លាន៧សែននាក់ ពោលគឺកើនឡើងជាង១២% ធៀបនឹងរយៈពេលដូចគ្នាកាលពីឆ្នាំ២០១៦ និងអាចរកចំណូលបានជាង៧៥លានដុល្លារ។

ក្នុងចំណូលពីការលក់ប័ណ្ណទស្សនារមណីយដ្ឋានអង្គរ ជាង ៧៥លានដុល្លារនេះ ក៏នឹងមានឧបត្ថម្ភទៅកាន់មន្ទីរពេទ្យគន្ធបុប្ផា ចំនួនជិត៣សែនដុល្លារផងដែរ ខណៈដែលសរុបរយៈពេល៨ខែឆ្នាំនេះ ប្រាក់ឧបត្ថម្ភដល់មូលនិធិគន្ធបុប្ផាពីចំណូលរមណីយដ្ឋានអង្គរ បានកើនឡើងដល់ជិត ៣លានដុល្លារហើយ។

ជាមួយគ្នានេះ តាំងពីខែកញ្ញាមុននេះ គ្រឹះស្ថានអង្គរ ក៏បានដាក់ឱ្យដំណើរការប្រើប្រាស់ប្រព័ន្ធស្វ័យប្រវត្តិសម្រាប់ការទិញប័ណ្ណចូលទស្សនារមណីយដ្ឋានអង្គរ ដោយម៉ាស៊ីនឆូតកាតដើម្បីមានភាពងាយស្រួល ដល់ប្រតិបត្តិករទេសចរណ៍ និងភ្ញៀវទេសចរអន្តរជាតិ ក្នុងការទិញប័ណ្ណចូលទស្សនារមណីយដ្ឋានអង្គរ៕