សណ្ឋាគារនេះនឹងផ្តល់ភាពទាក់ទាញសម្រាប់ភ្ញៀវទេសចរបរទេស ស្របតាមការគ្រោងទុករបស់ក្រសួងទេសចរណ៍ដែលថា នៅឆ្នាំ២០២០ កម្ពុជានឹងបានទទួលភ្ញៀវរហូត៧លាននាក់។
អគ្គនាយកគ្រប់គ្រងសណ្ឋាគារ រ៉ូសវូដ លោក Daniel Grau បានអះអាងថា ដោយសារតែស្ថិរភាពនយោបាយល្អ កំណើនសេដ្ឋកិច្ចរឹងមំា និងមានការសហការគំាទ្រពីម្ចាស់គម្រោងអគារវឌ្ឍនៈ ទើបធ្វើឲ្យមានការបើកសណ្ឋាគារនេះឡើង។
ជាពិសេសជាងនេះទៅទៀត លោកបានមើលឃើញពីសក្ដានុពលវិនិយោគនៅក្នុងវិស័យទេសចរណ៍សណ្ឋាគារជាច្រើន រួមទំាងភ្ញៀវទេសចរអន្តរជាតិកើនឡើងជារៀងរាល់ឆ្នាំ។
សណ្ឋាគារនិងរមណីយដ្ឋាននេះ ត្រូវបានវិនិយោគសាងសង់និងគ្រប់គ្រងដោយក្រុមហ៊ុនអភិវឌ្ឍន៍អចលនទ្រព្យ វឌ្ឍនៈប្រូផើធី កម្ពុជា ហើយមិនត្រូវបានម្ចាស់គម្រោងប្រាប់ពីចំនួនទឹកប្រាក់ក្នុងការវិនិយោគនោះទេ។
អគ្គនាយករូបនេះ បានបញ្ជាក់ថា បើមិនមានការប្រែប្រួលទេ សណ្ឋាគារនេះនឹងបើកដំណើរការនៅខែមិថុនា ឆ្នាំនេះ ដែលមានបន្ទប់ចំនួន ១៧៥បន្ទប់។ លោកបន្តថា សណ្ឋាគារនេះនឹងចូលរួមចំណែកគាំទ្រដល់វិស័យទេសចរណ៍ តាមរយៈការផ្តល់កន្លែងស្នាក់នៅ រួមនឹងសេវាកម្មម្ហូបអាហារនិងកន្លែងលំហែកាយផង។
សណ្ឋាគារនេះដែរ នឹងបង្កើតការងារចំនួន ២០០មុខតំណែង សម្រាប់គ្រប់ផ្នែកទំាងអស់ រួមមាន ផ្នែកទទួលភ្ញៀវ ផ្នែកហិរញ្ញវត្ថុ វិស្វកម្ម ផ្នែកលក់ ទីផ្សារ ផ្នែកស្ប៉ានិងចុងភៅ។
លោក ហូ វណ្ឌី អគ្គលេខាធិការសម្ព័ន្ធទេសចរណ៍ជាតិកម្ពុជា បានឲ្យដឹងថា វត្តមានសណ្ឋាគារថ្មីនេះអាចចាត់ទុកថាជាភព្វសំណាងរបស់កម្ពុជា ក៏ដូចជាទេសចរកម្ពុជាទាំងមូល ដោយលោកជឿជាក់ថា Rosewood នឹងបន្តការសហការជួយផ្សព្វផ្សាយទេសចរណ៍កម្ពុជាទៅពិភពលោកបន្ថែមទៀតផង៕
រូបភាពពី គេហទំព័រ សណ្ឋាគារ Rosewood ភ្នំពេញ
