ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម បានអះអាងថា ដើម្បីអាចទទួលបានប្រាក់កម្ចីយកទៅប្រើប្រាស់សហគ្រាស ក៏តម្រូវឲ្យគោរពតាមលក្ខខណ្ឌមួយចំនួនផងដែរ។ តួយ៉ាង ដើម្បីអាចទទួលបានឥណទានរហូតដល់ ៣០០ ០០០ ដុល្លារអាមេរិក ដែលមានអត្រាការប្រាក់ទាប ៦ ភាគរយ ប្រចំាឆ្នាំ សម្រាប់ជាទុនបង្វិល (រយៈពេលខ្លី) ហើយ ៦,៥ភាគរយ ប្រចំាឆ្នាំ សម្រាប់ទុនវិនិយោគ (រយៈពេលវែង) សហគ្រាសត្រូវតម្រូវឲ្យធ្វើការលក្ខខណ្ឌរួមមាន៖ គម្រោងពង្រីកអាជីកម្មអាចបង្កើតការងារថ្មីបន្ថែមពី ៥ ដល់ ៣០ កន្លែងយ៉ាងតិច, ត្រូវមានទីតាំងផលិតកម្មនៅក្នុងស្រុក ចុះបញ្ជីស្របច្បាប់ និងបង់ពន្ធ-អាករត្រឹមត្រូវ ហើយត្រូវការជាចាំបាច់នូវឥណទាន សម្រាប់យកទៅប្រើប្រាស់ជាទុនបង្វិល ទុនវិនិយោគ សម្រាប់ពង្រីកអាជីវកម្មជាដើម។
ឥណទានក្រោមកម្មវិធីពិសេសនេះ ធនាគារអភិវឌ្ឍន៍ជនបទ និងកសិកម្ម អាចផ្តល់ជូនរហូតដល់ ៨០ ភាគរយនៃតម្លៃទ្រព្យធានាបំណុល ដែលជាអចលទ្រព្យ ហើយការទទួលយកទ្រព្យធានាបំណុលក៏មានភាពបត់បែនច្រើន ដោយទទួលយកឧបករណ៍-គ្រឿងម៉ាស៊ីន សន្និធិ លិខិតធានាសងបំណុលពីភាគីអ្នកទិញ ឬលិខិតធានាផ្សេងៗ វិញ្ញាបនបត្រប្រាក់បញ្ញើ ក្រៅពីអចលនទ្រព្យ (ដីនិងអាគារ)។ ធនាគារក៏នឹងធ្វើការសម្របសម្រួលបណ្តុះបណ្តាល រៀបចំផែនការអាជីវកម្ម របាយការណ៍ហិរញ្ញវត្ថុ ក៏ដូចជាការតភ្ជាប់ទីផ្សារដល់សិប្បកម្ម សហគ្រាសធុនតូច និងមធ្យម ទន្ទឹមការផ្តល់ឥណទានផងដែរ។
អត្ថបទទាក់ទង!
សូមបញ្ជាក់ផងដែរ ធនាគារអភិឌ្ឍន៍ជនបទ និងកសិកម្ម កាលពីពេលថ្មីៗនេះបានចុះ អនុស្សារណៈនៃការយោគយល់គ្នាស្តីពីកិច្ចសហប្រតិបត្តិការអនុវត្តកម្មវិធីហិរញ្ញប្បទានពិសេសរបស់រាជរដ្ឋាភិបាល ជាមួយសមាគមចំនួន ០៣រួចមកហើយ រួមមាន សមាគមសហគ្រិនវ័យក្មេងកម្ពុជា (YEAC) សមាគមសហគ្រិនស្រ្តីកម្ពុជា (CWEA) និងសមាគមអ្នកវិនិយោគកម្ពុជា (CIC)។
ការចុះអនុស្សារណៈទំាងនេះ មានគោលបំណងផ្តល់នូវក្របខណ្ឌកិច្ចសហប្រតិបត្តិការអនុវត្តកម្មវិធីហិរញ្ញប្បទានពិសេសរបស់រាជរដ្ឋាភិបាល ដែលមានទឹកប្រាក់រហូតដល់ ៥០ លានដុល្លារអាមេរិក ដើម្បីផ្តល់ឥណទានដែលមានការប្រាក់ទាប គំាទ្រដល់សិប្បកម្ម សហគ្រាសធុនតូច និងមធ្យម ក្នុងវិស័យកែច្នៃផលិតផលកសិកម្ម វិស័យកសិ-ឧស្សាហកម្ម និងវិស័យកសិកម្ម ឱ្យមានលទ្ធភាពពង្រីកអាជីវកម្ម និងធ្វើឱ្យប្រសើរឡើងនូវខ្សែច្រវាក់ផលិតកម្មរបស់ខ្លួន ក្នុងគោលដៅបង្កើតការងារបន្ថែម ពង្រឹងភាពប្រកួតប្រជែង និងពង្រីកមូលដ្ឋានផលិតក្នុងស្រុក សម្រាប់ជំរុញទាំងការនាំចេញ និងកាត់បន្ថយការនាំចូលនៅក្នុងដំណាក់កាលដែលសេដ្ឋកិច្ចកម្ពុជាជួបប្រទះបញ្ហាប្រឈមមួយចំនួនកើតចេញពីជំងឺឆ្លង COVID-19 និងបញ្ហា EBA៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
