ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្មបានបញ្ជាក់ថា កញ្ចប់ថវិកា ៣០លានដុល្លារបន្ថែមលើថវិកាដែលមានស្រាប់នេះ ត្រូវបានបញ្ចេញជាបន្តបន្ទាប់ ខណៈទុនបម្រុង ដែលបានត្រៀមសរុបទាំងអស់ជិត ២០០លានដុល្លារ ដែលក្នុងនោះ ៧០ភាគរយហើយត្រូវប្រើសម្រាប់តម្រូវការក្នុងវិស័យស្រូវអង្ករ។
ឯកឧត្តម កៅ ថាច បានឲ្យដឹងទៀតថា ភាគច្រើនខេត្តដែលរងផលប៉ះពាល់ខ្លាំង គឺខេត្តដែលជាជង្រុកស្រូវធំជាងគេ រួមមាន ខេត្តបន្ទាយមានជ័យ ខេត្តបាត់ដំបង និងពោធិ៍សាត់ ប៉ុន្តែគិតមកដល់ត្រឹមថ្ងៃនេះគឺមិនទាន់អាចវាយតម្លៃពីទំហំនៃផលប៉ះពាល់កម្រិតណានៅឡើយទេ ខណៈតំបន់ខ្លះទឹកជំនន់នៅបន្តឡើង និងតំបន់ខ្លះក៏មានការស្រកចុះទៅវិញ។
អត្ថបទទាក់ទង
ឯកឧត្តមបន្ថែមថា តាមផែនការកញ្ចប់ថវិកា ៣០ លានដុល្លារ ដែលបានត្រៀមមកនេះ គឺប្រើប្រាស់តែនៅរដូវប្រមូលផលខាងមុខ ក្នុងខែ វិច្ឆិកា និងធ្នូ ប៉ុណ្ណោះ ដែលក្នុងអំឡុងពេលនោះ ការប្រមូលផលស្រូវ អាចនឹងជាន់គ្នា ទាំងស្រូវស្រាល និងស្រូវធ្ងន់ ខណៈដែលស្រូវស្រាលត្រូវបានពន្យារពេលដោយសារខ្វះទឹកភ្លៀងនៅដើមរដូវ ប៉ុន្តែភ្លាមៗនេះ បែរជាមានជំនន់ទឹកភ្លៀងកើតមានឡើង ដូច្នេះគឺធនាគារអភិវឌ្ឍន៍ជនបទ និងកសិកម្មមិនទាន់អាចដឹងបានថា មានផ្ទៃដី ប៉ុន្មានម៉ឺនហិកតាទេ ដែលនឹងរងផលប៉ះពាល់។
សូមជម្រាបថា ស្ថិតនៅក្នុងស្ថានភាពនៃការរីករាលដាលជំងឺកូវីដ ១៩ ធនគារអភិវឌ្ឍន៍ជនបទ និងកសិកម្មកន្លងមកបានត្រៀមថវិកាបន្ថែមប្រមាណ ៣០ លានដុល្លាររួចហើយ និងភ្លាមៗនេះក៏បាននឹងកំពុងជំរុញឲ្យសហព័ន្ធស្រូវអង្ករកម្ពុជា ដោយសុំឲ្យសមាជិក និងម្ចាស់រោងម៉ាស៊ីនទាំងអស់ ជួយទិញស្រូវពីប្រជាកសិករក្នុងតម្លៃសមរម្យ។
បើតាមលោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជាបានគូសបញ្ជាក់ថា ការសម្រេចស្នើឲ្យសមាជិកជួយទិញស្រូវពីប្រជាកសិករក្នុងតម្លៃមួយសមរម្យនាពេលនេះ គឺដោយសារមើលឃើញមានប្រជាកសិករមួយចំនួន បានកំពុងប្រមូលផលស្រូវស្រាល ជួបបញ្ហាគ្រោះទឹកជំនន់ដូចជាការ ដាច់ផ្លូវជាដើមធ្វើឲ្យស្ទះចលនាស្រូវ ដូច្នេះបានជាសហព័ន្ធស្នើឲ្យសមាជិកជួយទិញ បើទោះបីជា ផលស្រូវដែលប្រមូលបានមានសភាពសើមយ៉ាងណាក៏ដោយចុះ ត្រូវទិញក្នុងតម្លៃមួយសមរម្យ។
ទិន្នន័យផលប៉ះពាល់ខូចខាត ដោយជំនន់ទឹកភ្លៀងឆ្នាំ២០២០ គិតចាប់ពីថ្ងៃទី ០១ ខែកញ្ញា ដល់ថ្ងៃទី ១៦ ខែតុលា ឆ្នាំ២០២០ របស់គណៈកម្មាធិការជាតិគ្រប់គ្រងគ្រោះមហន្ដរាយ បានឲ្យដឹងថា គ្រោះទឹកជនន់បានធ្វើឲ្យប៉ះពាល់ដល់ពលរ្ដឋប្រមាណ ជាង៥ម៉ឺនគ្រសួសារ ស្មើនឹងជាង ២១ម៉ឺននាក់ និងបានជម្លៀសប្រជាជន ប្រមាណ ជាង៦ពាន់គ្រួសារ។ អ្នកស្លរាប់ដោយសារទឹកជំនន់ មាន១៨នាក់ (ក្មេង៨នាក់) ប៉ះពាល់ផ្ទះសរុប ជាង៥ម៉ឺនខ្នង ខូចខាតផ្ទះ ៥២ខ្នង។ ស្រូវលិចទឹក ប្រមាណជិត១៤ម៉ឺនហិកតា ខូចខាត ប្រមាណ ជាង៧ពាន់ហិកតា។ដំណាំរួមផ្សំផ្សេងទៀត លិចទឹក ជាង៦ម៉ឺនហិកតា ខូចខាតជិត៣ម៉ឺនហិកតា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
