រដ្ឋមន្ត្រីការបរទេសថៃ លោក ដុន ប្រាមុតវីណៃ បាននិយាយថា រាជរដ្ឋាភិបាលថៃកំពុងតែតាមដានស្ថានការណ៍ យ៉ាងយកចិត្តទុកដាក់បំផុត ជុំវិញបញ្ហាដ៏ក្តៅគគុកនៅក្នុងប្រទេសភូមា និងបញ្ហារបស់ជនជាតិការ៉ែនផងដែរ ក្រោយពីក្រុមជនជាតិភាគតិចភូមាទាំងនេះ ដែលមានចំនួនរាប់ពាន់នាក់ បានត់ភៀសខ្លួនចូលទៅក្នុងប្រទេសថៃ ដើម្បីគេចពីអំពើហិង្សារបស់របបយោធាភូមា។
លោក ប្រាមុតវីណៃ បាននិយាយបន្តទៅកាន់អ្នកកាសែតថា៖ ខ្ញុំមិនទាន់អាចបង្ហើបព័ត៌មាន និងប្រធានបទលម្អិតដែលត្រូវយកទៅពិភាក្សានៅក្នុងកិច្ចប្រជុំកំពូលអាស៊ានបានទេ ប៉ុន្តែខ្ញុំអាចប្រាប់បានថា យើងមានគោលដៅនាំយកសន្តិភាពដល់ប្រទេសភូមាតាមរយៈសមាគមន៍អាស៊ាន ឱ្យបានឆាប់តាមដែលអាចធ្វើទៅបាន ហើយខ្ញុំជឿជាក់ថា វាជាគោលបំណងរួមមួយរបស់សមាជិកទាំងអស់ នៅក្នុងកិច្ចប្រជុំកំពូលអាស៊ាននៅខែមេសានេះ។»
អត្ថបទទាក់ទង
គួររំឭថា កាលពីសប្តាហ៍មុន យោធាភូមាបានបើកការវាយប្រហារពីលើអាកាសទៅលើភូមិជនជាតិការ៉ែន ក្នុងរដ្ឋរបស់ពួកគេ ជាហេតុបណ្តាលឲ្យមានជនភៀសខ្លួនជាច្រើនពាន់នាក់បានរត់ចេញពីភូមិដើម្បីរកកន្លែងមានសុវត្ថិភាពតាមព្រំដែនជាមួយប្រទេសថៃ។ មានព័ត៌មានជាច្រើនដែលចោទប្រកាន់ថា អាជ្ញារធរថៃបានចាប់បញ្ជូនពួកគេឲ្យត្រឡប់មកវិញ តែភាគគីថៃបានច្រានចោលព័ត៌មានេះ។
សូមបញ្ជាក់ថា ទោះបីជាមានការចោទប្រកាន់បែបនេះក្តី តែគេសង្កេតឃើញថា ថៃពិតជាបានជួយជ្រោមជ្រែងក្នុងបញ្ហាជនភៀសខ្លួននេះមែន ដោយកន្លងមកថៃ បានរៀបចំជំរំស្នាក់នៅបណ្តោះអាសន្នតាមបណ្តោយព្រំដែន សម្រាប់អ្នករត់គេចពីអំពើហិង្សាក្នុងប្រទេសភូមា។
គិតមកទល់ពេលនេះ បាតុករភូមាបានស្លាប់ កើនឡើងដល់ជាង៥០០នាក់ហើយ ក្រោយការបង្ក្រាបជាបន្តបន្ទាប់ពីក្រុមយោធា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
