ភាគហ៊ុននៅអាស៊ីបន្ដហក់ឡើងខ្ពស់បំផុតជាងពេលណាទាំងអស់ខណៈតម្លៃប្រេងក៏កើនឡើងដែរ

តម្លៃភាគហ៊ុននៅអាស៊ី នៅតែបន្ដកើនឡើងខ្ពស់ជាងពេលណាៗទាំងអស់គិតត្រឹមថ្ងៃទី ១៥ ខែកុម្ភៈ ខណៈដែលតម្លៃប្រេងវិញក៏កំពុងតែហក់ឡើងកាន់តែខ្ពស់ដែរ នៅចំពេលមានភាពតានតឹងកំពុងកើតមាននៅមជ្ឈិមបូពា៍។ ការកើនឡើងនេះ ត្រូវបានគេមើលឃើញថា គឺដោយសារតែមានភាពជោគជ័យនៃការចាក់វ៉ាក់សាំងប្រឆាំងនឹងការរាតត្បាតកូវីដ-១៩ នៅទូទាំងសកលលោក រួមជាមួយនឹងក្ដីសង្ឃឹមខ្ពស់នៃការងើបឡើងវិញនៃសេដ្ឋកិច្ចសកល ដោយសារតែមានកញ្ចប់ថវិកាជំរុញសេដ្ឋកិច្ចពីសហរដ្ឋអាមេរិក។ នេះបើតាមសារព័ត៌មានអន្តរជាតិធំៗជាច្រើនបានរាយការណ៍។

(រូបតំណាង) ភាគហ៊ុននៅអាស៊ីបន្ដហក់ឡើងខ្ពស់បំផុតជាងពេលណាទាំងអស់ ខណៈតម្លៃប្រេងក៏កើនឡើងដែរ

សន្ទស្សន៍តម្លៃភាគហ៊ុននៅអាស៊ីប៉ាស៊ីហ្វិក ក្រៅពីប្រទេសជប៉ុន បានហក់ឡើង០,៤% ខណៈដែលផ្សារភាគហ៊ុនជប៉ុនបានកើនឡើង ១,១% បើទោះបីជាការងើបឡើងវិញនៃសេដ្ឋកិច្ចជប៉ុនពីវិបត្តិកូវីដ-១៩ នៅមានភាពយឺតយ៉ាវនៅក្នុងត្រីមាសទី៤នៃឆ្នាំ២០២០ក៏ដោយ។ (បន្ដិចទៀតខ្ញុំនឹងនិយាយលម្អិតពីរឿងផ្សារភាគហ៊ុនក្នុងប្រទេសជប៉ុន ដែលបានហក់ឡើងខ្ពស់បំផុតក្នុងរយៈពេល៣ទសវត្សរ៍កន្លងមកនេះ)។

ដោយឡែក យើងក្រឡេកមើល ផ្សារភាគហ៊ុននៅក្នុងប្រទេសចិន និងហុងកុងវិញ មិនបានបើកទ្វារជួញដូរទេ នៅប៉ុន្មានថ្ងៃមកនេះ ដោយសារតែមានការឈប់សម្រាកអំឡុងពេលពិធីបុណ្យចូលឆ្នាំចិន។ ហើយផ្សារភាគហ៊ុននៅអាមេរិកវិញ ក៏មិនមានការបើកជួញដែរ ដោយសារតែនៅថ្ងៃចន្ទ ទី១៥ ខែកុម្ភៈ ចំថ្ងៃឈប់សម្រាកប្រធានាធិបតី (Presidents Day)។

ចំពោះតម្លៃប្រេងវិញ បានងើបឡើងខ្ពស់បំផុតគិតតាំងពីខែមករាឆ្នាំ២០២០មក ដោយសារតែមានក្ដីសង្ឃឹមលើការជំរុញកំណើនសេដ្ឋកិច្ច និងតម្រូវការប្រើប្រាស់ប្រេងឥន្ធនៈ។ គិតត្រឹមថ្ងៃទី ១៥ ខែកុម្ភៈ តម្លៃប្រេងឆៅនៅទីផ្សារអង់គ្លេសបានឡើងថ្លៃ១ដុល្លារបន្ថែមទៀត ពោលគឺមានតម្លៃដល់ទៅជាង ៦៣ដុល្លារក្នុងមួយបារ៉ែល ខណៈដែលនៅទីផ្សារអាមេរិកវិញ បានកើនឡើង១ដុល្លារ២សេនបន្ថែមទៀតដែរ នាំឲ្យប្រេងមួយធុងបារ៉ែលឡើងដល់ទៅជិត ៦១ដុល្លារអាមេរិក៕