ទិដ្ឋាការស្នាក់នៅអចិន្ត្រៃយ៍ថ្មីចំនួនពីរនេះ គឺ ទិដ្ឋាទី១ នឹងផ្ដល់ជូនអ្នកដែលរស់នៅអូស្ត្រាលីចាប់ពីរយៈពេល ៣ឆ្នាំ និង មួយទៀត គឺផ្ដល់ជូន សម្រាប់អ្នករស់នៅអូស្ត្រាលីចាប់ពី ៤ ឆ្នាំឡើង ហើយពួកគេអាចដាក់ពាក្យសុំសិទ្ធិស្នាក់នៅចាប់ពីខែមីនា ឆ្នាំ២០២២ ខាងមុខនេះ។
ក្នុងរយៈពេល ១៨ ខែមកនេះ ពលរដ្ឋហុងកុងប្រហែល ៦ ពាន់នាក់នៅក្នុងប្រទេសអូស្ត្រាលីត្រូវបានផ្តល់ទិដ្ឋាការអចិន្ត្រៃយ៍ ហើយអ្នកកំពុងដាក់ពាក្យសុំសិទ្ធិស្នាក់នៅមានជាង ១ ម៉ឺននាក់។ ក្នុងនោះអ្នកដែលអាចដាក់ពាក្យបានលុះត្រាតែធ្លាប់រស់នៅក្នុងប្រទេសអូស្ត្រាលីក្នុងរយៈពេល ៣ ឆ្នាំ ហើយទន្ទឹមនេះសម្រាប់អ្នករស់នៅរយៈពេលចាប់ពី ៤ ឆ្នាំឡើង អាចនឹងសុំទិដ្ឋាការមួយផ្សេងទៀតដែលដាច់ដោយឡែកពីអ្នករស់បាន៣ឆ្នាំ។
ការដាក់ឱ្យប្រើប្រាស់ទិដ្ឋាការថ្មីចំនួនពីរប្រភេទនេះ គឺជាវិធានការចុងក្រោយបំផុតមួយ ដែលធ្វើឡើងដោយរដ្ឋាភិបាលអូស្ត្រាលី ប្រឆាំងនឹងក្តីបារម្ភចំពោះច្បាប់សន្តិសុខជាតិដ៏ចម្រូងចម្រាសរបស់ទីក្រុងប៉េកាំងនៅហុងកុង។ ទីក្រុងកង់បេរ៉ាបានរិះគន់រដ្ឋាភិបាលទីក្រុងប៉េកាំង ដែលដាក់ច្បាប់សន្តិសុខជាតិនៅហុងកុង ព្រមទាំងការផ្លាស់ប្តូរ ប្រព័ន្ធបោះឆ្នោតនៅទីនោះផងដែរផងដែរ។ សូមរំឭកថា ប្រទេសចិនបានដាក់ច្បាប់សន្តិសុខជាតិកាលពីថ្ងៃទី៣០ ខែមិថុនា ឆ្នាំមុន ដើម្បីជាការឆ្លើយតប ចំពោះការតវ៉ាប្រឆាំងរបស់ពលរដ្ឋហុងកុងដែលរីករាលដាលក្នុងឆ្នាំ ២០១៩។អត្ថបទគួរអាន
ដូចនេះហើយ អូស្ត្រាលីបាននិយាយថា ខ្លួនបានបើកផ្លូវឱ្យកាន់តែងាយស្រួលដល់ការស្នាក់នៅអចិន្ត្រៃយ៍សម្រាប់ទាំងអ្នកកាន់លិខិតឆ្លងដែនហុងកុង បើប្រៀបធៀបជាមួយពលរដ្ឋនៃប្រទេសដទៃទៀត។
គួរបញ្ជាក់ថា ក្រៅពីអូស្ត្រាលី ប្រទេសអង់គ្លេសកាលពីខែកក្កដាឆ្នាំមុន ក៏បានបើកភ្លើងខៀវសម្រាប់ពលរដ្ឋហុងកុងឲ្យចូលទៅរស់នៅអង់គ្លេសផងដែរ។ ជាក់ស្ដែងពលរដ្ឋហុងកុងប្រមាណជិត ៦ម៉ឺន ៥ ពាន់នាក់ បានដាក់ពាក្យស្នើសុំសញ្ជាតិអង់គ្លេសបើគិតត្រឹមខែសីហា។
យ៉ាងណាមិញ ការផ្លាស់ប្តូរ និងការបង្កើតច្បាប់ថ្មីនេះ ក៏នឹងផ្តល់ផលប្រយោជន៍ដល់ប្រទេសអូស្ត្រាលីខ្លួនឯងផងដែរ ព្រោះវាទាញយកអត្ថប្រយោជន៍ ក្នុងការទាក់ទាញទេពកោសល្យវ័យក្មេងរបស់ពលរដ្ឋហុងកុង ដែលមានសមត្ថភាពខ្ពស់ដើម្បីបំពេញចន្លោះខ្វះខាតនៃការអភិវឌ្ឍរបស់អូស្ត្រាលី ខណៈដែលទីក្រុងហុងកុង ត្រូវបានគេចាត់ទុកថា គឺជាមជ្ឈមណ្ឌលហិរញ្ញវត្ថុដ៏សំខាន់របស់ពិភពលោក៕អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
