លោកឧកញ៉ា ហ៊ួត អៀងតុង ប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុហត្ថាកសិករបានមានប្រសាសន៍បញ្ជាក់ថា ធនាគារក៏ដូចជាគ្រឹះស្ថានមីក្រូហិរញ្ញវត្ថុ គឺនៅតែទទួលយកក្រដាសប្រាក់ ១ដុល្លារ ២ដុល្លារ និង៥ដុល្លារពីអតិថិជនដដែលទេ។ ដូច្នេះសូមប្រជាពលរដ្ឋរក្សាភាពស្ងប់ស្ងាត់ និងនៅតែបន្តចាយក្រដាសប្រាក់ដុល្លារតូចៗនេះ នៅតាមទីផ្សារដូចសព្វដង ពីព្រោះវិធានការរបស់ធនាគារជាតិនៃកម្ពុជា មិនមែនមានន័យថា ជាការហាមឃាត់ចរាចរណ៍ក្រដាសប្រាក់ដុល្លារអាមេរិកប្រភេទតូចៗទាំងនេះ លើទីផ្សារនោះទេ។
លោកឧកញ៉ាបញ្ជាក់ថា «ធនាគារជាតិនៃកម្ពុជាកាលពីថ្ងៃទី២៨ ខែឧសភា ឆ្នាំ២០២០នេះ បានបញ្ជាក់យ៉ាងច្បាស់នៅក្នុងសេចក្តីប្រកាសព័ត៌មានរបស់ខ្លួនហើយថា ក្រដាសប្រាក់ដុល្លារអាមេរិកប្រភេទ ១ដុល្លារ ២ដុល្លារ និង ៥ដុល្លារ នៅតែចាយបានដូចធម្មតានៅលើទីផ្សារ មិនមានការហាមឃាត់នោះទេ ប៉ុន្តែអ្វីដែលគ្រឹះស្ថានធនាគារ ក៏ដូចគ្រឹះស្ថានមីក្រូហិរញ្ញវត្ថុត្រូវធ្វើនោះ គឺត្រូវចំណាយថវិកាខ្លះក្នុងការបង់ថ្លៃសេវាទៅធនាគារជាតិដូចដែលបានដឹងហើយថា ត្រូវបង់ប្រាក់ ៣,៥ភាគរយសម្រាប់ថ្លៃដឹកជញ្ជូនក្រដាសប្រាក់ដុល្លារតូចៗនេះទៅអាមេរិកវិញតែប៉ុណ្ណោះ ក្រោយពីការសម្រេចទុកពេល៣ខែបន្ទាប់ ចាប់ពីខែកញ្ញាឆ្នាំ២០២០តទៅ»។
អត្ថបទទាក់ទង!
វិធានការរបស់ធនាគារជាតិនៃកម្ពុជា លើប្រាក់ដុល្លារតូចៗនេះ គឺធ្វើឡើងបន្ទាប់ពីមានកិច្ចប្រជុំពិភាក្សាគ្នាជាមួយនឹងតំណាងគ្រឹះស្ថានធនាគារ និងហិរញ្ញវត្ថុ ដោយពិនិត្យឃើញថា ទាំងក្នុងឃ្លាំងគ្រឹះស្ថានធនាគារ និងហិរញ្ញវត្ថុ និងធនាគារជាតិនៃកម្ពុជា មានការគរជន់ក្រដាសប្រាក់ដុល្លារអាមេរិក ប្រភេទ ១ដុល្លារ ២ដុល្លារ និង៥ដុល្លារ ដែលនេះត្រូវបានធនាគារជាតិ បញ្ជាក់ថា តម្រូវការនៃក្រដាសប្រាក់ទាំងនេះ មានកម្រិតទាបក្នុងទីផ្សារ។
បើតាមធនាគារជាតិនៃកម្ពុជា ក្នុងរយៈពេល ៦ខែ ចុងក្រោយនេះ ប្រាក់រៀល ក៏ដូចជារូបិយបណ្ណក្នុងតំបន់ បានធ្លាក់ចុះថ្លៃ គួរឲ្យកត់សម្គាល់ ធៀបនឹងប្រាក់ដុល្លារអាមេរិក។ ចំពោះប្រទេសក្នុងតំបន់ តម្លៃ រូបិយប័ណ្ណរបស់គេធ្លាក់ថ្លៃ គឺជាចម្បងដោយសារតែការធ្លាក់ចុះនៃការនាំចេញ និងលំហូរចេញនៃមូលធន។ ចំណែកឯកម្ពុជាវិញ ការធ្លាក់ចុះថ្លៃប្រាក់រៀល គឺដោយសារតែតម្រូវការ ប្រាក់រៀលធ្លាក់ចុះ ដែលជាកត្តាចម្បងបណ្ដាលមកពី ការថមថយនៃសកម្មភាពសេដ្ឋកិច្ចក្នុងស្រុក និងការធ្លាក់ចុះតម្រូវការប្រាក់រៀលសម្រាប់បង់ពន្ធ។ល។
បើតាមធនាគារជាតិ ការធ្លាក់ថ្លៃប្រាក់រៀល ធៀបនឹងដុល្លារអាមេរិកនេះ មានឥទ្ធិពលអវិជ្ជមានទៅលើប្រជាកសិករ ដែលមានចំណូលជាប្រាក់រៀល។ ដូច្នេះ ដើម្បីជំរុញតម្រូវការប្រើប្រាស់ប្រាក់រៀលនៅក្នុងចរន្ដសេដ្ឋកិច្ច ជាពិសេសសម្រាប់ប្រតិបត្តិការដែលមានទំហំតូច ការប្រើប្រាស់ក្រដាសប្រាក់ដុល្លារអាមេរិក ប្រភេទតូចៗគួរតែត្រូវជំនួសដោយប្រើប្រាស់ប្រាក់វៀលវិញ។
លោកឧកញ៉ា ហ៊ួត អៀងតុងបញ្ជាក់ទៀតថា ការសម្រេចរបស់ធនាគារជាតិនេះ គឺជាយន្តការមួយ ដែលអាចជួយបានច្រើនក្នុងដំណើរការប្រើប្រាស់ប្រាក់រៀលកាន់តែច្រើន ជួយឲ្យសេដ្ឋកិច្ចកម្ពុជាមានស្ថិរភាពល្អ និងអត្រាប្តូរប្រាក់ក៏មានស្ថិរភាពល្អដែរ ប្រសិនបើកម្ពុជាបានប្រើប្រាស់ប្រាក់រៀលទូលំទូលាយ។
លោកឧកញ៉ាបន្តថា យ៉ាងណាក៏ដោយការសម្រេចរបស់ធនាគារជាតិនេះ មានរយៈពេលខ្លីបន្តិច សម្រាប់ការជូនដំណឹងទៅអតិថិជនក្នុងការផ្លាស់ប្តូររបៀបនៃការប្រើប្រាស់ប្រាក់ដុល្លារតូចៗនេះ។ ហើយនៅពេលនេះដែរ សម្រាប់គ្រឹះស្ថានមីក្រូហិរញ្ញវត្ថុហត្ថាកសិករក៏គ្មានអ្វីជាឧបសគ្គនោះទេ ខណៈប្រាក់ដុល្លារតូចៗ ដែលបានរក្សាទុកក្នុងទូរចំនួនត្រឹម ៨ម៉ឺនដុល្លារ ក្នុងចំណោមប្រាក់បង្កកក្នុងទូរសរុបជាង ១លានដុល្លារអាមេរិក។
ធនាគារជាតិនៃកម្ពុជាបានអះអាងថា ធនាគារជាតិនឹងនៅតែបន្ដពិភាក្សាជាមួយនឹងគ្រឹះស្ថានធនាគារ និងហិរញ្ញវត្ថុ ដើម្បីឈានទៅកំណត់ពេលវេលាណាមួយសមស្រប ដើម្បីផ្អាកការទទួលក្រដាសប្រាក់ដុល្លារអាមេរិកប្រភេទតូចទាំងស្រុង ពីគ្រឹះស្ថានធនាគារ និងហរិញ្ញវត្ថុផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
