មានមនុស្សជាច្រើនពិតជាបានស្គាល់ ក្រុមហ៊ុន Charoen Pokphand Group ដែលនៅកម្ពុជាស្គាល់ឈ្មោះថា ក្រុមហ៊ុន ស៊ីភី នោះ ត្រូវបានគេដឹងថា ជាក្រុមហ៊ុនកំពូលមួយថៃ និងមានវិនិយោគនៅបណ្ដាប្រទេសជាច្រើនផងដែរ រួមទាំងកម្ពុជាផងដែរ។ បច្ចុប្បន្ន CP កំពុងវិនិយោគរកស៊ីជាច្រើនវិស័យ នៅកម្ពុជា ដូចជា កសិដ្ឋានចិញ្ចឹមសត្វ និងរោងចក្រកែច្នៃសាច់ ហើយកាលពីឆ្នាំកន្លងទៅនេះ បានវិនិយោគរកស៊ីវិស័យលក់រាយ គឺផ្សារទំនើប Makro នៅកម្ពុជាផងដែរ។ បុរសនៅពីក្រោយភាពជោគជ័យដ៏សម្បើមរបស់ក្រុមហ៊ុននេះ ត្រូវបានគេស្គាល់ថា គឺជាលោក Dhanin Chearavanont ដែលបច្ចុប្បន្ន ជាមហាសេដ្ឋីប្រាក់ពាន់លានដុល្លារ លេខ ១ នៅប្រទេសថៃ។
អត្ថបទទាក់ទង!
តើ លោក Dhanin Chearavanont ជានរណា?
បច្ចុប្បន្ន លោក Dhanin មានអាយុ ៨០ឆ្នាំហើយ និងទ្រព្យសម្បត្តិកត់ត្រាដោយទស្សនាវដ្ដី Forbes នៅឆ្នាំ ២០១៩ គឺមានរហូតដល់ ២៩,៥ ពាន់លានដុល្លារអាមេរិក ដែលឈរនៅលំដាប់លេខ១ ក្នុងចំណោមមហាសេដ្ឋីថៃជាច្រើនរូបទៀត។
ក្នុងចំណោមបងប្អូនបង្កើតប្រុសចំនួន៤នាក់ លោកគឺជាកូនពៅគេ តែជាមនុស្សដែលមានទេពកោសល្យជាងគេក្នុងការស្នងតំណែងរកស៊ីគ្រួសារ។
ក្រោយពីចូលប្រឡូកក្នុងរបរជាមួយឪពុកនៅអាយុ២៥ ឆ្នាំ នៅប្រមាណ ៥ឆ្នាំក្រោយមក លោកត្រូវបានក្រុមហ៊ុនលើកឲ្យកាន់តំណែងជាប្រធានក្រុមហ៊ុន និង១៩ឆ្នាំក្រោយមក បានក្លាយជាប្រធានក្រុមប្រឹក្សាភិបាលនៃក្រុមហ៊ុន CP Group។
ក្រោយពី ធ្វើជាប្រធានក្រុមប្រឹក្សាភិបាលក្រុមហ៊ុន CP Group បាន៤៨ ឆ្នាំ លោកបានសម្រេចចិត្តលាលែងពីតំណែង នៅឆ្នាំ២០១៧ ប៉ុន្ដែ នៅធ្វើជាប្រធានក្រុមប្រឹក្សាភិបាលជាន់ខ្ពស់វិញ។
តើក្រុមហ៊ុន CP Group កកើតឡើងយ៉ាងដូចម្ដេច និងមានឆ្លងកាត់ការដឹកនាំបែបណាខ្លះ ទើបជោគជ័យដល់បច្ចុប្បន្ន?
តាមរយៈការស្រាវជ្រាវលើសារព័ត៌មានអន្តរជាតិធំៗជាច្រើន បានឲ្យដឹងថា លោក Dhanin Chearavanont គឺជាជនជាតិថៃ ដែលមានឪពុកធ្លាប់រស់នៅប្រទេសចិន តែក្រោយពីត្រឡប់ពីប្រទេសចិន មកកាន់ប្រទេសថៃវិញ ឪពុករបស់លោក គឺ លោក Chia Ek Chor បានបង្កើតហាងមួយលក់ គ្រាប់ធញ្ញជាតិនាំចូលពីប្រទេសចិន សម្រាប់កសិករថៃ នៅឆ្នាំ១៩២១។
ក្រោយមកនៅឆ្នាំ ១៩៤៦ ក្រុមហ៊ុននេះ បានប្ដូរឈ្មោះ មកជា Charoen Pokphand ដែលឈ្មោះនេះ មានអត្ថន័យថា វិបុលភាពសម្រាប់អ្នកប្រើប្រាស់។ នៅ២ទស្សវត្សរ៍ក្រោយមក ក្រុមហ៊ុន CP បានងាកចេញពីការរកស៊ីផ្គត់ផ្គង់គ្រាប់ធញ្ញជាតិ មករស៊ីលើការចិញ្ចឹមសត្វនិងពាណិជ្ជកម្ម។ ក្រោយមក ក្រុមហ៊ុន CP បានពង្រីករោងចក្រចំណីសត្វរបស់ខ្លួនជាបន្តបន្ទាប់ នៅហុងកុង តៃវ៉ាន់ និងម៉ាឡេស៊ី។
ប៉ុន្ដែ នៅពីក្រោយការរីកចម្រើននេះ គឺត្រូវបានគេដឹងថា ដោយសារតែមានបុគ្គលដែលមានឥទ្ធិពលមួយរូបដែលដឹកនាំក្រុមហ៊ុននេះ បានយ៉ាងល្អបំផុត។ ក្នុងបងប្អូនប្រុស៤នាក់ លោក Dhanin គឺជាកូនពៅគេ តែមានទេពកោសល្យខ្ពស់ជាងគេងក្នុងការរកស៊ី។ នៅអាយុទើបតែ ៣០ ឆ្នាំប៉ុណ្ណោះ លោកត្រូវបានតែងតាំងជាប្រធានក្រុមប្រឹក្សាភិបាលនៃក្រុមហ៊ុន CP Group។
ការសិក្សាមួយរបស់សាលា Harvard អំពីអាជីវកម្មរបស់ក្រុមហ៊ុន CP Group បានឲ្យដឹងថា វាជាសក្ខីភាពមួយនៃទំនាក់ទំនងដ៏រឹងមាំនៃគ្រួសារដែលមានបងប្រុសទាំង៣ បានទទួលស្គាល់ពីសមត្ថភាព ទេពកោសល្យរបស់លោក Dhanin ថែមទាំងបានផ្ដល់សិទ្ធិឲ្យលោក គ្រប់គ្រងទាំងស្រុង ទោះបីជាពួកគេត្រូវរក្សាភាគហ៊ុនស្មើៗគ្នានៅក្នុងក្រុមហ៊ុនក៏ដោយ។
លោក Dhanin Chearavanont និងបងប្រុសទាំងបី (https://www.ft.com/)
នៅឆ្នាំ ១៩៧៨ អាជីវកម្មរបស់ក្រុមហ៊ុននេះ មានការពង្រីកខ្លួន លោក Dhanin បានកែប្រែរចនាសម្ព័ន្ធ ក្រុមហ៊ុនពីអាជីវកម្មលក្ខណៈគ្រួសារ ទៅជាក្រុមហ៊ុនច្បាស់លាស់។ ទោះបីជាយ៉ាងណា នៅពេលធ្វើកំណែប្រែដំបូង វាបានធ្វើឲ្យប៉ះពាល់ខ្លះៗដែរ ដល់ផលប្រយោជន៍របស់បងៗពីរនាក់របស់លោក ប៉ុន្ដែ ពួកគេមានការយោគយល់គ្នា និងបានព្រមព្រៀងលើការកែប្រែនេះ។
ដើម្បីធ្វើឲ្យក្រុមហ៊ុនមានការគ្រប់គ្រងបែបស្ដង់ដារ លោក Dhanin និងបងប្រុសរបស់លោក បានព្រមព្រៀងគ្នានាពេលនោះថា ភរិយា ប្អូនស្រី កូនស្រី មិនត្រូវបានអនុញ្ញាតឲ្យជាប់ទាក់ទងនឹងអាជីវកម្មរបស់ក្រុមហ៊ុននោះឡើយ។
តាមការស្រាវជ្រាវដោយសាកលវិទ្យាល័យ Harvard Business School បានឲ្យដឹងថា លោក Dhanin ធ្លាប់បានមានគម្រោងថា ចូលនិវត្តន៍នៅវ័យ៥៨ ឆ្នាំ ប៉ុន្ដែ នៅពេលត្រូវប្រឈមមុខនឹងវិបត្តិហិរញ្ញវត្ថុនៅអាស៊ី លោកបានកែប្រែគំនិតជាថ្មី និងបានចរចាជាមួយនឹងបងប្រុសទាំង៣ ដែលជាម្ចាស់ភាគហ៊ុន ក្នុងការបន្ដតំណែងរបស់ខ្លួនបន្តទៀត។ ដោយមានការដឹកនាំរបស់លោក Dhanin ហើយនៅគ្រានោះ ក្រុមហ៊ុន CP Group ក៏បានឆ្លងផុតដំណាក់កាលដ៏លំបាកលំបិននោះ
បច្ចុប្បន្ន ក្រុមហ៊ុន CP Group មិនត្រឹមតែរកស៊ីក្នុងវិស័យកសិឧស្សាហកម្មនោះទេ តែក៏មានការពង្រីកខ្លួនរកស៊ីជាបន្តបន្ទាប់រហូតដល់បច្ចុប្បន្ន មានវិនិយោគរកស៊ីក្នុងវិស័យសំខាន់ៗចំនួន៨ រួមមាន កសិកម្ម-ចំណីអាហារ (៥ក្រុមហ៊ុន) វិស័យលក់រាយ (៤ក្រុមហ៊ុន) វិស័យទូរគមនាគមន៍ និងប្រព័ន្ធផ្សព្វផ្សាយ (១ក្រុមហ៊ុន) វិស័យពាណិជ្ជកម្មអេឡិចត្រូនិក និងឌីជីថល (២ក្រុមហ៊ុន) វិស័យអចលនទ្រព្យ (១ក្រុមហ៊ុន) វិស័យឧស្សាហកម្មយានយន្ដ(៣ក្រុមហ៊ុន) វិស័យសុខាភិបាល (១ក្រុមហ៊ុន) និងវិស័យហិរញ្ញវត្ថុ (២ក្រុមហ៊ុន)។
បច្ចុប្បន្ន ក្រុមហ៊ុន CP Group មានវិនិយោគនៅប្រទេសចំនួន ៣០ ទូទាំងសកលលោក ភាគច្រើនគឺនៅតំបន់អាស៊ី ។ លោក Dhanin បានប្រកាន់ខ្ជាប់នូវគោលការណ៍សំខាន់មួយក្នុងការរកស៊ី ដែលលោកបានហៅថា គោលការណ៍ប្រយោជន៍ទាំងបី (3 Benefit) គឺបង្កើតវិបុលភាពសម្រាប់ប្រទេស សហគមន៍មូលដ្ឋាន ក៏ដូចជា ក្រុមហ៊ុន និងបុគ្គលិក។
ចំពោះការដឹកនាំវិញ លោក Dhanin Chearavanont ឲ្យតម្លៃខ្ពស់លើធនធានមនុស្ស ដោយលោកបានលើកឡើងជាទស្សនៈថា «មនុស្សរបស់យើង គឺជាសសរទ្រូងដ៏សំខាន់បំផុតសម្រាប់អនាគតរបស់យើង។ ដើម្បីអាចឈរជើងរឹងមាំបាន យើងត្រូវការអ្នកដឹកនាំជំនាន់ថ្មី ដែលពោរពេញដោយសមត្ថភាព និងចំណេះដឹង ដើម្បីគ្រប់គ្រង និងដឹកនាំ ស្ថាប័នឆ្ពោះទៅមុខកាន់តែឆ្ងាយជាមួយគ្នា»។
កាលពីឆ្នាំ ២០១៧ កន្លងទៅ ក្រុមហ៊ុន CP Group មានប្រាក់ចំណូល ប្រមាណជាង ៥០ ពាន់លានដុល្លារអាមេរិក ជាមួយនឹងបុគ្គលិកបម្រើការសរុបជាង ៣០ម៉ឺននាក់។ ក្នុងចំណោមប្រាក់ចំណូលទាំងនោះ មាន ៥៩% គឺបានមកពីប្រតិបត្តិការអាជីវកម្មក្នុងប្រទេសថៃ ខណៈប្រទេសចិន មាន២៩% និង១២% ទៀតគឺមកពីបណ្ដាប្រទេសផ្សេងៗទៀត៊។ ជាមួយគ្នានេះ ចំណូលភាគច្រើន គឺបានមកពីវិស័យកសិឧស្សាហកម្ម និងចំណីអាហារ ដែលមាន ៥៤% និងបន្ទាប់មក គឺបានមកពីវិស័យលក់រាយ និងការចែកចាយ ដែលមាន ៣១% និងវិស័យទូរគមនាគមន៍មាន ៨% និងវិស័យផ្សេងៗទៀតមាន៧%។
អត្ថបទពិសេស!
អាជីវកម្មដែលលេចធ្លោជាងគេរបស់ក្រុមហ៊ុន CP Group ត្រូវបានគេស្គាល់ថា គឺជាកសិដ្ឋានចិញ្ចឹមសត្វមាន់ និងជ្រូក ជាមួយនឹងរោងចក្រផលិតកែច្នៃសាច់ដ៏ធំផងដែរ។ បន្ថែមពីនេះ ក្រុមហ៊ុនមួយនេះ ក៏ត្រូវបានគេដឹងថា មានឥទ្ធិពលខ្លាំងក្នុងវិស័យលក់រាយផងដែរ ដូចជានៅប្រទេសថៃ ក្រុមហ៊ុននេះ ទទួលបានសិទ្ធិគ្រប់គ្រងប្រតិបត្តិការផ្សារ 7-Elven និងមានការគ្រប់គ្រងលើអាជីវកម្មផ្សារទំនើបMakro ផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
