ជាភស្តុតាងនៅក្នុងថ្ងៃនេះ ធនាគារ ភីភីស៊ី ប៊ែង(PPC Bank) បានចុះបញ្ជីលក់មូលបត្របំណុលរបស់ខ្លួន ក្នុងផ្សារមូលបត្រកម្ពុជា ជាផ្លូវការហើយ ខណៈក្រុមហ៊ុន RMA Cambodia និងគ្រឹះស្ថានមីក្រូហិរញ្ញវត្ថុប្រាសាក់ គ្រោងនឹងចុះបញ្ជីនៅចុងខែមេសានេះ។ រីឯ ធនាគារពាណិជ្ជដ៏ធំជាងគេមួយនៅកម្ពុជា គឺអេស៊ីលីដា នឹងចុះបញ្ជីលក់មូលបត្រកម្មសិទ្ធិជាលើកដំបូងគេបង្អស់ នៅដើមខែឧសភាខាងមុខ។
ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជា បានគូសបញ្ជាក់ថា ធនាគារភ្នំពេញពាណិជ្ជកម្ម ឬហៅថា ភីភីស៊ី ប៊ែង(PPC Bank) បានក្លាយជាក្រុមហ៊ុនចុះបញ្ជីទី៩ហើយ នៅលើទីផ្សារមូលបត្រកម្ពុជា ហើយក៏ជាក្រុមហ៊ុនទី៤ ដែលបោះផ្សាយលក់មូលបត្របំណុល ដោយបានប្រមូលទុនប្រមាណ ៤០ពាន់លានរៀល ក្នុងដំណាក់កាលទី១ ចំពេលនៃការរាតត្បាតនៃជំងឺកូវីដ១៩។
អត្ថបទគួរអាន
ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា បានមានប្រសាសន៍ឲ្យដឹងថា នៅក្នុងស្ថានការណ៍ដ៏លំបាកនេះ មានក្រុមហ៊ុនមួយចំនួន បានយកបញ្ហាមេរោគកូវីដ១៩ ជាមូលហេតុដកថយចេញពីគោលដៅរបស់ខ្លួន ដោយឡែក ធនាគារ ភីភីស៊ី ប៊ែង(PPC Bank) មិនដកថយនោះទេ ដោយបន្តបោះផ្សាយលក់មូលបត្របំណុលសុរប ៨០ពាន់លានរៀល គ្រាន់តែបែងចែកចេញជា ២ដំណាក់កាល ដោយដំណាក់កាលទី ២ នឹងធ្វើឡើងនៅក្នុងពេលឆាប់ៗខាងមុខ។
លោក ស៊ិន ចាង មូ នាយកប្រតិបត្តិធនាគារ ភីភីស៊ី ប៊ែង(PPC Bank) បានលើកឡើងថា ការចុះបញ្ជីសញ្ញាប័ណ្ណសាជីវកម្មនេះ គឺជាព្រឹត្តិការណ៍ដ៏សំខាន់របស់ធនាគារ ចំពេលនៃភាពមិនប្រាកដប្រជាខ្ពស់ និងមានការប្រែប្រួលនៅក្នុងទីផ្សារ ដូច្នេះហើយការធានាបាននូវ សុវត្ថិភាពសាច់ប្រាក់ គឺមានសារៈសំខាន់ជាងពេលណាទាំងអស់។
ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា
ដោយឡែក អំឡុងពេលដ៏លំបាកដោយសារតែមេរោគកូវីដ ១៩នេះ នៅមានតួអង្គសំខាន់ៗ ៣ផ្សេងទៀត ដែលគ្រោងនឹងចុះបញ្ជីជាផ្លូវការនៅលើ ផ្សារមូលបត្រកម្ពុជា រួមមាន ក្រុមហ៊ុន RMA Cambodia គ្រោងបោះផ្សាយលក់មូលបត្របំណុល ៨០ពាន់លានរៀល និងគ្រឹះស្ថានមីក្រូហិរញ្ញវត្ថុប្រាសាក់ គ្រោងនឹងលក់មូលបត្របំណុលសរុបជាង ១២០ពាន់លានរៀល ដោយក្រុមហ៊ុនទាំង ២ រំពឹងនឹងចុះបញ្ជីនៅចុងខែមេសានេះ ខណៈដែរ ធនាគារអេស៊ីលីដា នឹងចុះបញ្ជីលក់មូលបត្រកម្មសិទ្ធិជាផ្លូវការ នៅថ្ងៃទី ៤ ខែឧសភាខាងមុខ។
អ្នកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សារនៃ ក្រុមហ៊ុនផ្សារមូលបត្រកម្ពុជា បានបញ្ជាក់ ថា ក្រៅពីក្រុមហ៊ុន ៤ខាងលើ គឺនៅមានក្រុមហ៊ុនប្រមាណជា ២ ទៅ ៣ក្រុមហ៊ុនផ្សេងទៀត ដែលគ្រោងនឹងបោះផ្សាយភាគហ៊ុន និងចុះបញ្ជីនៅក្នុងឆ្នាំនេះ ក៏ប៉ុន្តែ ផ្សារមូលបត្រកម្ពុជា ពុំទាន់ទទួលបានពាក្យស្នើសុំជាផ្លូវការនោះទេ ដោយគម្រោងទាំងនេះ អាចនឹងមានការពន្យារពេល ដោយសារផលប៉ះពាល់ពីមេរោគកូវីដ១៩។
អ្នកស្រី បន្ថែមថា យ៉ាងណាក៏ដោយ ក្នុងអំឡុងពេលមានវិបត្តិនេះ សកម្មភាពជួញដូរ នៅក្នុងផ្សារមូលបត្រកម្ពុជា ក្នុងខែមេសានេះ មានសកម្មភាពមធ្យម ប្រហាក់ប្រហែលទៅនឹង ត្រីមាសទី ១ ដើមឆ្នាំកន្លងមក ដែលក្នុងមួយថ្ងៃ មានការជួញដូរប្រមាណ ១ម៉ឺនដុល្លារអាមេរិក។
គួរបញ្ជាក់ដែរថា គិតត្រឹមពេលនេះ ក្រុមហ៊ុនចុះបញ្ជីនៅលើ ផ្សារមូលបត្រកម្ពុជា សរុបមានចំនួន ៩ក្រុមហ៊ុន ដោយក្នុងនោះមាន ៥ លក់មូលបត្រកម្មសិទ្ធិ និងមាន ៤ក្រុមហ៊ុនទៀត លក់មូលបត្របំណុល ដោយក្រុមហ៊ុនទាំងអស់ប្រមូលទុនសរុបបាន ១៧១លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
