ឯកឧត្តម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម បាននិយាយថា កិច្ចព្រមព្រៀងពាណិជ្ជកម្មសេរីនេះ អាចចូលជាធរមាន លុះត្រាប្រទេសទាំងពីរកម្ពុជា-ចិន បានបំពេញនីតិវិធីផ្ទៃក្នុងរួចរាល់ ហើយមានការឯកភាពពីថ្នាក់ដឹកនាំប្រទេសរៀងៗខ្លួន។ យ៉ាងណាមិញ បច្ចុប្បន្ន កម្ពុជា បានបំពេញនីតិវិធីផ្ទៃក្នុងរួចរាល់ហើយ និងគ្រោងដាក់ឆ្លងទៅអង្គនីតិបញ្ញត្តិក្នុងពេលឆាប់ៗខាងមុខនេះ។
ទោះបីជា កិច្ចព្រមព្រៀងពាណិជ្ជកម្មសេរី កម្ពុជា មិនទាន់ចូលជាធរមានក្ដី ប៉ុន្ដែឯកឧត្តម ប៉ែន សុវិជាតិ អះអាងថា លំហូរពាណិជ្ជកម្មរវាងប្រទេសកម្ពុជាជាមួយចិននៅតែរក្សាកំណើននាំចេញនិងចូលគួរឲ្យកត់សម្គាល់។ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មធ្លាប់បានបង្ហាញក្តីរំពឹងកន្លងមកថា ការនាំចេញផលិតផលរបស់កម្ពុជាទៅកាន់ទីផ្សារចិន នឹងកើនឡើង២៥%បន្ថែមទៀត ប្រសិនបើកិច្ចព្រមព្រៀងពាណិជ្ជកម្មសេរីកម្ពុជា-ចិន ចូលជាធរមាន។ តាមរយៈកិច្ចព្រមព្រៀងនេះ ផលិតផលកម្ពុជាជាង ៣០០មុខនឹងនាំចេញទៅទីផ្សារចិនដោយមិនចាំបាច់បង់ពន្ធ។
អត្ថបទគួរអាន អត្ថបទទាក់ទង
របាយការណ៍ពីក្រសួងពាណិជ្ជកម្មបង្ហាញថា កាលពីឆ្នាំ២០២០ ទំហំពាណិជ្ជកម្មរវាងកម្ពុជា-ចិនមានប្រមាណ ៨ពាន់លានដុល្លារអាមេរិក ធ្លាក់ចុះជាង៥%។ ក្នុងនោះកម្ពុជានាំចេញទៅចិនមានជាង១ពាន់លានដុល្លារ កើនជាង៨% ខណៈដែលចិននាំចូលកម្ពុជាវិញមានជាង៧ពាន់លានដុល្លារ ធ្លាក់ចុះជិត៧%។
ដោយឡែក នៅខែមករាដំបូងនៅឆ្នាំ២០២១នេះវិញ ទំហំពាណិជ្ជកម្មរវាងប្រទេសទាំងពីរសម្រេចបានជាង៨០០លានដុល្លារ ក្នុងនោះ កម្ពុជានាំចេញទៅចិនមានជាង១០០លានដុល្លារ ខណៈចិននាំចូលមកកម្ពុជាមានជាង៧០០លានដុល្លារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
