កម្ពុជារកឃើញអ្នកឆ្លងកូវីដ-១៩ចំនួន ៦១៨នាក់ ទៀតស្របពេលអ្នកជាសះស្បើយមាន៦០នាក់

ក្រសួងសុខាភិបាលកម្ពុជា នៅថ្ងៃទី១៨ខែមេសាឆ្នាំ២០២១នេះ បានចេញសេចក្តីប្រកាសព័ត៌មានពីការរកឃើញអ្នកឆ្លងជំងឺកូវីដ-១៩ចំនួន៦១៨នាក់បន្ថែមទៀត ខណៈអ្នកជាសះស្បើយមានចំនួន៦០នាក់។

បុគ្គលិកសុខាភិបាល និងរថយន្តកំពុងត្រៀមនាំយកពលរដ្ឋ ដែលវិជ្ជមានកូវីដ១៩ទៅសម្រាកព្យាបាលនៅមន្ទីរពេទ្យ។ រូបភាព៖ គ្រូពេទ្យស្ម័គ្រចិត្តយុវជនសម្តេចតេជោ

សេចក្តីប្រកាសព័ត៌មានរបស់ក្រសួងសុខាភិបាលបានឲ្យដឹងថា ក្នុងចំណោមអ្នកវិជ្ជមានកូវីដ១៩ទាំង ៦១៨នាក់នោះ ជាករណីចម្លងក្នុងសហគមន៍នៃ «ព្រឹត្តិការណ៍២០កុម្ភៈ» ទាំងអស់ ខណៈដែលអ្នកជាសះស្បើយមានចំនួន៦០នាក់ ដែលតម្រូវឲ្យចេញពីមន្ទីរពេទ្យ ហើយបន្តធ្វើចត្តាឡីស័កនៅផ្ទះ១៤ថ្ងៃបន្ថែមទៀតដោយខ្លួនឯង។

សម្រាប់អ្នកវិជ្ជមានករណីសហគមន៍ទាំង៦១៨នាក់ រួមមាន៤៩៣ករណីរកឃើញនៅរាជធានីភ្នំពេញ, កណ្តាល៣១ករណី, ស្វាយរៀង៨ករណី, ខេត្តព្រះសីហនុ៧៥ករណី, តាកែវ ២ករណី និងកំពង់ចាម១ករណី កំពង់ស្ពឺ៣ករណី និងខេត្តព្រៃវែង៥ករណី។

សូមបញ្ជាក់ថា គិតត្រឹមថ្ងៃទី១៨ ខែមេសា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ៦៣៨៩នាក់ ក្នុងនោះអ្នកជាសះស្បើយចំនួន ២៤៧៦នាក់, អ្នកកំពុងសម្រាកព្យាបាលជំងឺ ចំនួន៣៨៦៥នាក់ និងស្លាប់បាត់បង់ជីវិតចំនួន៤៣នាក់៕