ថ្លែងនៅក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងមជ្ឈមណ្ឌលបណ្ដុះធុរកិច្ចថ្មី «តេជោ» និងសមាគមធនាគារនៅកម្ពុជា នាពេលថ្មីៗនេះ ឯកឧត្តម គង់ ម៉ារី អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងថា ការវិវត្តនយ៉ាងលឿននៃបច្ចេកវិទ្យា បាននិងកំពុងផ្លាស់ប្ដូរអ្វីៗគ្រប់យ៉ាងរបស់មនុស្ស រួមទាំងរបៀបរស់នៅផងដែរ ដែលវាបង្ហាញយ៉ាងច្បាស់ថា យើងកំពុងស្ថិតនៅក្នុងដំណាក់កាលនៃការចាប់ផ្ដើមបដិវដ្ដន៍ឧស្សាហកម្មទី ៤។
ឯកឧត្តម បានគុសបញ្ជាក់ថា «ដើម្បីធានាបាននូវនិរន្ដរភាពនៃកំណើនសេដ្ឋកិច្ច និងសម្រេចបាននូវចក្ខវិស័យរបស់ខ្លួន រាជរដ្ឋាភិបាលកម្ពុជាត្រូវមានការប្ដេជ្ញាចិត្តខ្ពស់ លើការជំរុញការធ្វើពិពិធកម្មសេដ្ឋកិច្ច ដែលតាមនិន្នាការតំបន់ និងសកល។ ក្នុងនោះ ការអភិវឌ្ឍនសេដ្ឋកិច្ចឌីជីថល គឺជាទិសដៅមួយត្រូវគិតគូរ ដើម្បីបានជាសសរស្ដម្ភថ្មី សម្រាប់ទ្រទ្រង់សេដ្ឋកិច្ចឲ្យបានរឹងមាំ និងជៀសផុតពីវិបត្តិហិរញ្ញវត្ថុនានា»។
អត្ថបទទាក់ទង!
មន្ត្រីជាន់ខ្ពស់ក្រសួងសេដ្ឋកិច្ចរូបនេះ បានអះអាងទៀតថា បច្ចេកវិទ្យាឌីជីថល គឺជានិន្នាការសំខាន់មួយ នៃបដិវដ្ដន៍ឧស្សាហកម្មទី៤ កំពុងតែក្លាយជាកត្តាលីករថ្មីមួយ សម្រាប់ជំរុញការអភិវឌ្ឍសេដ្ឋកិច្ច តាមរយៈការចូលរួមបង្កើនផលិតផល ប្រសិទ្ធភាពការងារ ព្រមទាំងផ្ដល់លទ្ធភាពឲ្យធុរកិច្ចក្នុងស្រុកអាចភ្ជាប់ខ្លួន ទៅនឹងខ្សែចង្វាក់ផលិតកម្មតំបន់ និងសកល ក៏ដូចជាស្វែងរកភាពច្នៃប្រឌិត និងនវានុវត្តន៍ ក្នុងផលិតកម្ម ទំនិញ និងសេវាកម្ម។ សំខាន់ជាងនេះទៀត បច្ចេកវិទ្យាឌីជីថល ផ្ដល់កាលានុវត្តភាពនូវការធ្វើបដិវត្តកម្មធុរកិច្ចប្រពៃណី ទៅរកធុរកិច្ចថ្មីឌីជីថល ដែលមានឱកាសលូតលាស់ឆាប់រហ័ស។
ឌីជីថលភាវូបនីយកម្មតាមរយៈបច្ចេកវិទ្យាឌីជីថលនានាកំពុងតែធ្វើទំនើបកម្មក្នុងគ្រប់វិស័យ រួមមានវិស័យបច្ចេកវិទ្យាហិរញ្ញវត្ថុផងដែរ។ វិស័យបច្ចេកវិទ្យាហិរញ្ញវត្ថុនៅកម្ពុជា ឬហៅថា Fintech ត្រូវបានអ្នកជំនាញអះអាងថា កំពុងមានសន្ទុះគួរឲ្យកត់សម្គាល់ ប៉ុន្ដែ វស័យនេះនៅមានភាពក្មេងខ្ចីសម្រាប់ទីផ្សារកម្ពុជា។
អត្ថបទគួរអាន!
ឯកឧត្តម គង់ ម៉ារី បានគុសបញ្ជាក់ថា ដើម្បី លើកស្ទួយវិស័យបច្ចេកវិទ្យាហិរញ្ញវត្ថុនេះ មជ្ឈមណ្ឌលបណ្ដុះបណ្ដាលធុរកិច្ចថ្មី «តេជោ» បានធ្វើការងារមួយចំនួនរួចហើយ ដូចជាបានសិក្សាស្រាវជ្រាវលើអេកូឡូស៊ីវិស័យបច្ចេកវិទ្យាហិរញ្ញវត្ថុទាំងមូល ដើម្បីកំណត់ពីបញ្ហាគន្លឹះៗ និងដាក់ចេញជាអនុសាសន៍ និងបានសហការជាមួយនឹងដៃគូមួយចំនួនក្នុងវិស័យឯកជន ក្នុងការបណ្ដុះធុរកិច្ចថ្មីលើវិស័យបច្ចេកវិទ្យាហិរញ្ញវត្ថុ និងអនុញ្ញាតឲ្យធុរកិច្ចថ្មីនានាអាចប្រើប្រាស់ payment Sandbox សម្រាប់សាកល្បងលើការទូទាត់តាមប្រព័ន្ធអនឡាញលើផលិតផល ឬសេវាកម្មរបស់ខ្លួនដោយឥតគិតថ្លៃ។
លោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា បានលើកឡើងដែរថា ការចុះហត្ថលេខាលើអនុស្សរណៈយោគយល់គ្នា រវាងមជ្ឈមណ្ឌលធុរកិច្ចថ្មី «តេជោ» និងសមាគមធនាគារនៅកម្ពុជា គឺក្នុងក្របខណ្ឌនៃកិច្ចសហការ ក្នុងការបង្កើត និងគាំទ្រប្រព័ន្ធអេកូឡូស៊ីបច្ចេវិទ្យាហិរញ្ញវត្ថុ ដើម្បីរួមចំណែកអភិវឌ្ឍសេដ្ឋកិច្ចឌីជីថល និងបរិយាបន្នហិរញ្ញវត្ថុ។
លោកបណ្ឌិត អ៊ិន ចាន់នី បន្ថែមថា «បច្ចេកវិទ្យាហិរញ្ញវត្ថុក៏នឹងផ្ដល់គុណប្រយោជន៍ដល់ប្រទេសកម្ពុជា ក្នុងការទទួលយកកម្មវិធីបច្ចេកវិទ្យាចុងក្រោយមកប្រើប្រាស់ ដោយពុំមានឧបសគ្គ»។
សូមបញ្ជាក់ថា នៅកម្ពុជាបច្ចេកវិទ្យាហិរញ្ញវត្ថុកំពុងលូតលាស់យ៉ាងខ្លាំងនាប៉ុន្មានឆ្នាំចុងក្រោយនេះ ដែលយើងអាចមើលឃើញតាមរយៈកំណើននៃចំនួនធនាគារ និងគណនី e-Wallet ដែលភ្ជាប់នឹងការប្រើប្រាស់កម្មវិធីទូរស័ព្ទដៃសម្រាប់ការទូទាត់ និងបើកប្រាក់ ព្រមទាំងកំណើននៃប្រតិបត្តិការទូទាត់តាមប្រព័ន្ធអនឡាញជាដើម។
ទោះយ៉ាងណា បើតាមការគូសបញ្ជាក់ពីអ្នកជំនាញ វិស័យបច្ចេកវិទ្យាហិរញ្ញវត្ថុ នៅតែមានឧបសគ្គចម្បងៗមួយចំនួនដែលត្រូវដោះស្រាយ ដូចជាកង្វះខាតមូលដ្ឋានច្បាប់ និងបទប្បញ្ញត្តិ, កង្វះយន្ដការសម្របសម្រួលអន្តរស្ថាប័ន, កង្វះខាតទិន្នន័យដើម្បីវាយតម្លៃហានិភ័យ និងកង្វះធនធានមនុស្សក្នុងវិស័យនេះជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
