ឯកឧត្តម វេង សាខុន រដ្ឋមន្ត្រីក្រសួងសិកម្មបានបង្ហាញថា ផលិតផលកសិកម្មដែលបាននាំចេញក្នុងរយៈពេល៧ខែ ឆ្នាំ២០២០នេះ មានដូចជាអង្ករចំនួន ជាង ៤២ម៉ឺនតោន ក្នុងនោះចិនមានចំណែកទីផ្សារច្រើនជាងគេប្រមាណ ៣៦ភាគរយ ដែលមានបរិមាណនាំចេញជាង ១៥,៥ម៉ឺនតោន ទីផ្សារអឺរ៉ុបជាង ១៤,៤ម៉ឺនតោន ខណៈទីផ្សារអាស៊ានជាង ៥ម៉ឺនតោន និងទីផ្សារគោលដៅផ្សេងទៀតមានចំនួនជិត ៧ម៉ឺនតោន។
របាយការណ៍ដដែលបង្ហាញទៀតថា ផលិតផលកសិកម្មសំខាន់ដែលត្រូវបាននាំចេញទៀតនោះ គឺចំណិតដំឡូងមីក្រៀម មានបរិមាណសរុបជាង ១លានតោន និងដំឡូងមីស្រស់ ជាង ៤៣ម៉ឺនតោន ត្រូវបាននាំចេញទៅកាន់ប្រទេសថៃ និងវៀតណាម។ ចំណែកម្សៅដំឡូងមី វិញក៏ត្រូវបាននាំចេញក្នុងបរិមាណជាង១ម៉ឺនតោនផងដែរ។
អត្ថបទទាក់ទង!
មុខទំនិញកសិផលបន្ទាប់មានគ្រាប់ស្វាយចន្ទីត្រូវបាននាំចេញក្នុងបរិមាណជាង
១៩ម៉ឺនតោន គ្រាប់ពោតជាង ១៤ម៉ឺនតោន គ្រាប់សណ្តែកបាយជាង ៣ពាន់តោន ផ្លែចេកជាង
១៦ម៉ឺនតោន ផ្លែស្វាយជាង ៤ម៉ឺនតោន ដូងប្រេងជាង ៣ម៉ឺនតោន និងម្រេចជាង ៣ពាន់តោន
ថ្នាំជក់ជាង ៤ពាន់តោន ខណៈបន្លែជាង៧៣តោន និងមុខទំនិញនៃដំណាំផ្សេងទៀតជាង
៤ម៉ឺនតោន។
សូមជម្រាបផងដែរថា ក្រោមកិច្ចព្រមព្រៀងពាណិជ្ជកម្មសេរីកម្ពុជា និងចិន បានបង្ហាញពីលទ្ធផលល្អប្រសើរដោយទំនិញជាង ៣៤០ មុខទំនិញនឹងត្រូវនាំចូលទៅកាន់ទីផ្សារប្រទេសចិន ដែលភាគច្រើនសុទ្ធសឹងជាផលិតផលកសិកម្ម និងផលិតផលសម្រេចកែច្នៃក្នុងវិស័យឧស្សាហកម្មរបស់កម្ពុជា។
តាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជានិងចិនដែលគ្រោងនឹងចុះហត្ថលេខាឆាប់ៗនេះ
នឹងជំរុញដល់ផែនការនាំចេញកសិផលរបស់កម្ពុជាឲ្យមានការកើនឡើងជាបន្តទៀតសម្រាប់ឆ្នាំខាងមុខៗ
ក្នុងនោះ ផលិតផលកសិកម្មដែលនឹងត្រូវនាំចេញ ទៅទីផ្សារចិនរួមមានម្រេច ម្ទេសក្រៀម
ផលិតផលកែច្នៃពីស្វាយចន្ទី ខ្ទឹម ទឹកឃ្មុំ និងផលិតផលពីគ្រឿងសមុទ្រ
រួមមាន គ្រំ ក្តាម និងខ្យង ជាដើម។
ជាការអះអាងរបស់ ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មថ្លែង នៅក្នុងសន្និសីទសារព័ត៌មានស្តីពីលទ្ធផលបញ្ចប់កិច្ចចរចាកិច្ចព្រមព្រៀងពាណិជ្ជកម្មសេរីកម្ពុជា និងចិនកាលពីពេលថ្មីនេះថា កម្ពុជាមានលទ្ធភាពគ្រប់គ្រាន់ក្នុងការផលិតទំនិញនាំចេញទៅប្រទេសចិន ពិសេសបន្លែ ផ្លែឈើ ត្រី សាច់សត្វ រួមមានជ្រូក មាន់ ទា គោ និងពពែជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
