រដ្ឋាភិបាលកម្ពុជា និង គ្រីសអេនើជី បានចុះកិច្ចព្រមព្រៀងដើម្បីអភិវឌ្ឍអណ្តូងប្រេងក្នុងប្លុក A ដែលមានទំហំ ៣០៨៨គីឡូម៉ែត្រការ៉េ កាលពីឆ្នាំ២០១៧ ដែលនៅពេលនោះ ក៏មានការប្រកាសផងដែរថា កម្ពុជាអាចមានប្រេងដំបូងបង្អស់ពីអណ្តូងប្រេងឈ្មោះ អប្សរា នៅឆ្នាំ២០១៩នេះ។
ក៏ប៉ុន្តែ Fitch Solutions Macro Research បាននិយាយនៅក្នុងរបាយការណ៍របស់ខ្លួនថា ក្តីសុបិនរបស់កម្ពុជាដើម្បីបានប្រេងដំបូងនៅត្រឹមឆ្នាំ២០២០នេះ មានភាពមិនច្បាស់លាស់នៅឡើយទេ នៅពេលនេះ។
Fitch Solutions Macro Research បាននិយាយដូច្នេះថា «ប្រេងដំបូងបង្អស់ពីអណ្តូងប្រេងអប្សរា ត្រូវបានគេរំពឹងទុកជាមុន ថានឹងបាន នៅត្រឹមឆ្នាំ២០២០ ទោះបីយ៉ាងណា គេនៅចាំមើលថា តើផែនការនេះនឹងត្រូវរងផលប៉ះពាល់ដោយការធ្លាក់ចុះហិរញ្ញវត្ថុចុងក្រោយរបស់ គ្រីសអេនើជី ឬយ៉ាងណា។»
អត្ថបទទាក់ទង
Fitch Solutions Macro Research បានអះអាងថា សូម្បីតែមុនពេលដែលខ្លួនជួបនឹងបញ្ហាបំណុលនេះ, ក្រុមហ៊ុន គ្រីសអេនើជី បានស្វែងរកដៃគូសក្តានុពលដើម្បីជួយចែករំលែកថ្លៃដើមនៃការអភិវឌ្ឍប្លុក A ដែលមានតម្លៃ ២០០លានដុល្លារសម្រាប់ដំណាក់កាលទី១។
គិតត្រឹមខែកញ្ញានេះ ក្រុមហ៊ុន គ្រីសអេនើជី កំពុងស្ថិតក្នុងដំណើរការរៀបចំរចនាសម្ព័ន្ធឡើងវិញនូវបំណុលចំនួន ៤៧៦លានដុល្លារអាមេរិក ហើយបានស្នើសុំឲ្យមានការផ្អាកការសងបំណុលបណ្ដោះអាសន្នរយៈពេល ៦ខែ ពីតុលាការជាន់ខ្ពស់សិង្ហបុរី ដើម្បីកុំទាន់ឲ្យមានការអនុវត្តច្បាប់និងនីតិវិធីច្បាប់របស់ម្ចាស់បំណុល។ នេះបើយោងតាម Fitch Solutions Macro Research។
បញ្ហាមួយទៀតសម្រាប់អណ្តូងប្រេង អប្សរា គឺត្រូវការចំណាយខ្ពស់។ នេះបើយោងតាម Fitch Solutions Macro Research ដដែល។
លោក ជាប សួរ អ្នកនាំពាក្យនិងជាអគ្គនាយកនៃអគ្គនាយកដ្ឋានប្រេងនៅក្រសួងរ៉ែនិងថាមពល បាននិយាយនៅថ្ងៃពុធ ទី១១ ខែកញ្ញានេះ ថា លោកបានទទួលដំណឹងអំពីការរៀបចំរចនាសម្ព័ន្ធឡើងវិញនូវបំណុលនិងការស្នើទៅតុលាការសិង្ហបុរីនេះ ក៏ប៉ុន្តែលោកមិនបានដឹងលម្អិតនោះទេ។
លោក ជាប សួរ បាននិយាយដូច្នេះថា «ក្រុមហ៊ុនថា គាត់នៅដំណើរការធម្មតា។ អ៊ីចឹង យើងមិនដឹងថា យ៉ាងម៉េចទេ។ ចាំមើលបន្តិចទៀតមើល៍»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
