នៅថ្ងៃទី ០២ ខែធ្នូ ឆ្នាំ ២០២០ ក្រុមហ៊ុន ហ៊ុនទី បានសាកល្បងដឹកជញ្ជូនផ្លែស្វាយស្រសង់មួយកុងតឺន័រពីប្រទេសកម្ពុជាឆ្លងកាត់ប្រទេសវៀតណាម ឆ្ពោះទៅកាន់ទីផ្សារប្រទេសចិន។
បើតាមក្រសួងកសិកម្ម ក្រុមហ៊ុន ហ៊ុនទី នេះ បានបោះទុនវិនិយោគវិស័យកសិកម្មនៅកម្ពុជា លើការលាងសម្អាត ការវេចខ្ចប់ ការបង្កើតឃ្លាំងស្ដុកត្រជាក់ និងការនាំចេញផលិតផលកសិកម្មនៅកម្ពុជាកាលពីឆ្នាំ២០១៧។
អត្ថបទទាក់ទង!
តាមការបញ្ជាក់របស់ក្រុមហ៊ុននាំចេញស្វាយខាងលើនេះបានឲ្យដឹងថា៖ ក្រោយពីបញ្ចប់នៃការសាងសង់ និងដំឡើងឧបករណ៍សម្លាប់សមាសភាពចង្រៃ (ពងរុយ) នៅក្នុងផ្លែស្វាយរួចរាល់មក ក្រុមហ៊ុនបានចាប់ផ្តើមដឹកជញ្ជូនស្វាយពីចម្ការមកសម្អាត និងវេចខ្ចប់ ដោយបានចាប់ផ្តើមបណ្តុះបណ្តាលកម្មករចំនួន ៧០ នាក់ ជាបឋម ដោយត្រូវប្រើប្រាស់រយៈពេលបីថ្ងៃ ដើម្បីដាក់បញ្ចូលទៅក្នុងមួយ Container ។ ក្រុមហ៊ុនក៏មានក្តីសង្ឃឹមថា ក្រោយពីទទួលបានបទពិសោធន៍ពីការលាងសម្អាត និងវេចខ្ចប់ក្នុងរយៈពេលបីថ្ងៃកន្លងមកនេះ នឹងជួយដល់ក្រុមហ៊ុនបង្កើនល្បឿននៃការនាំចេញផ្លែស្វាយស្រស់ពីកម្ពុជាទៅកាន់ទីផ្សារប្រទេសចិននាពេលខាងមុខ ។
បើតាមស្ថានទូតចិនប្រចាំប្រទេសកម្ពុជាធ្លាប់បានលើកឡើងកាលពីខែមិថុនាកន្លងទៅ បានឲ្យដឹងថា យ៉ាងហោចណាស់ កម្ពុជា អាចនឹងនាំចេញផ្លែស្វាយស្រស់ទៅកាន់ទីផ្សារចិន ៥០ម៉ឺនតោនជារៀងរាល់ឆ្នាំ ក្រោយពីមានពិធីសារផ្លូវការសម្រាប់បើកផ្លូវដល់ការនាំចេញនេះ។
ក្រោយពីមានពិធីសារនាំចេញផ្លែស្វាយត្រូវបានចុះហត្ថលេខារួចមក អគ្គនាយកដ្ឋានកសិកម្ម បានទទួលពាក្យស្នើសុំចុះបញ្ជីចម្ការស្វាយ និងទីតាំងវេចខ្ចប់សម្រាប់នាំចេញផ្លែស្វាយស្រស់កម្ពុជា ទៅកាន់ប្រទេសចិន ចំនួន៤៨ក្រុមហ៊ុន/ម្ចាស់ចម្ការ/សហគមន៍កសិកម្ម។
របាយការណ៍ពីក្រសួងកសិកម្មបានបង្ហាញថា នៅរយៈពេល១១ ខែឆ្នាំ ២០២០នេះ ផ្លែស្វាយស្រស់ចំនួនជាង ៩ម៉ឺន តោន ត្រូវបាននាំចេញទៅកាន់ទីផ្សារក្រៅប្រទេស ដែលមានកំណើន ៨៣,៥០% ធៀបទៅនឹងរយៈពេលដូចគ្នាកាលពីឆ្នាំ២០១៩៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
