បើយើងពិនិត្យទៅលើដ្យាក្រាមអំពីតម្លៃមាសនៅលើទីផ្សារសកលដែលបានបង្ហាញដោយស្ថាប័ន Market Insiderបានឲ្យដឹងថា តម្លៃមាសបានកើនឡើងជាលំដាប់ និងមិនមានការធ្លាក់ចុះទេ គិតតាំងពីដើមខែមិថុនារហូតមកទល់ថ្ងៃទី ២២ ខែកក្កដានេះ ហើយតម្លៃមាស នៅពេលបច្ចុប្បន្ននេះ អាចនិយាយបានថា គឺជាតម្លៃមួយខ្ពស់បំផុតមិនធ្លាប់មានក្នុងរយៈពេលជិត១០ឆ្នាំមកនេះ។
លោកស្រី ស៊ាង លីម ម្ចាស់ហាងប្ដូរប្រាក់ និងលក់គ្រឿងអលង្ការលីហួរ បានអះអាងនៅថ្ងៃនេះថា តម្លៃមាស មានការកើនឡើងក្រឺតៗជាលំដាប់ ប៉ុន្ដែ អ្វីដែលជាការកត់សម្គាល់នោះ គឺវាបានហក់កើនឡើងខ្លាំងតាំងពីម្សិលមិញរហូតមកទល់ថ្ងៃនេះ ដោយតម្លៃមាសគីឡូលក់ចេញបានកើនដល់ ២.២៣០ ដុល្លារ ក្នុងមួយតម្លឹង ខណៈដែលតម្លៃមាសទិញចូលមានតម្លៃ ២.២២០ ដុល្លារក្នុងមួយតម្លឹង។
អត្ថបទទាក់ទង!
លោកស្រី ស៊ាង លីម លើកឡើងយ៉ាងដូច្នេះថា «ឡើងកន្លមក [តម្លៃមាស] វាតិចៗទេ [តែ] យប់មិញវាឡើងខ្លាំង។ ថ្ងៃមុនគេទិញចូល ២.១៨០ [ដុល្លារក្នុងមួយតម្លឹងមាស] លក់ចេញ ២.២០០ [ដុល្លារក្នុងមួយតម្លឹងមាស]»។
អាជីវករលក់មាសរូបនេះ បានឲ្យដឹងទៀតថា បើធៀបនឹងតម្លៃមាសកាលពីប៉ុន្មានថ្ងៃមុន គឺតម្លៃមាសគីឡូលក់ចេញមានត្រឹមតែ ២.២០០ ដុល្លារ ខណៈដែលមាសទិញចូលមានតម្លៃ២.១៤០ ដុល្លារដូច្នេះ វាសបញ្ជាក់ថា តម្លៃមាសលក់ចេញ បានកើន៣០ ដុល្លារក្នុងមួយតម្លឹង និងមាសលក់ចេញកើនថ្លៃ ៤០ដុល្លារក្នុងមួយតម្លឹង។
ដោយឡែក បើធៀបនឹងតម្លៃមាសនៅថ្ងៃទី ២២ ខែកក្កដានេះ នឹងតម្លៃមាសកាលពីសប្ដាហ៍មុន ឃើញថា តម្លៃមាសលក់ចេញនៅថ្ងៃនេះ បានកើនថ្លៃរហូតដល់ទៅ ៦០ ដុល្លារក្នុងមួយតម្លឹង ខណៈដែលមាសទិញចូលវិញ កើនថ្លៃ ៧០ដុល្លារ ក្នុងមួយតម្លឹង។
អាជីវករលក់មាសនៅផ្សារស្ទឹងមានជ័យថ្មី បានលើកឡើងស្រដៀងគ្នានេះដែរថា តម្លៃមាសពិតជាបានហក់ឡើងថ្លៃខ្ពស់មែននៅប៉ុន្មានថ្ងៃមកនេះ។ អាជីវកររូបនេះ បន្ដថា ស្របពេលដែលតម្លៃមាសឡើងថ្លៃ មានភ្ញៀវដែលមកហាងលោកស្រីប្រមាណ ៧០% គឺជាអ្នកយកមាសមកលក់ ខណៈដែលអ្នកទិញមាសមានប្រមាណតែ ៣០%ប៉ុណ្ណោះ។ លោកស្រីបន្ថែមថា នៅពេលដែលមានអ្នកមកលក់មាសច្រើនជាងអ្នកទិញយ៉ាងដូច្នេះ វាក៏បានធ្វើឲ្យប៉ះពាល់ដល់ចរន្ដសាច់ប្រាក់របស់ហាងលោកស្រីខ្លះៗដែរ ប៉ុន្ដែលោកស្រីថា របរទិញលក់មាសនេះ គឺត្រូវការមានទំនួលខុសត្រូវខ្ពស់ ពោលគឺ បើគេយកមាសមកលក់ ជាម្ចាស់ហាងត្រូវតែមានទុនបម្រុងដើម្បីប្រមូលទិញវិញ។
យ៉ាងណាក៏ដោយចុះ អាជីវករមាសបានបញ្ជាក់ថា តម្លៃមាសលក់ចេញ ទិញចូល អាចនឹងមានការល្អៀងគ្នាបន្តិចបន្តួចទៅតាមហាងនីមួយៗ។
អត្ថបទគួរអាន!
បើទោះបីជា តម្លៃមាសហក់កើនឡើងខ្ពស់ក្ដី ប៉ុន្ដែ តាមការបញ្ជាក់របស់លោកស្រី ស៊ាង លីម ម្ចាស់ហាងមាសលីហួរ បានឲ្យដឹងថា ចំពោះហាងលោកស្រី មិនសូវសម្បូរអតិថិជនចូលមកទិញ ឬលក់មាសច្រើនដូចមុននោះទេ នៅអំឡុងពេលមានមេរោគ រាតត្បាតកូវីដ-១៩នេះ ដោយភ្ញៀវធ្លាប់ទទួលបាន១០០% បានធ្លាក់ចុះ និងមានមកនៅត្រឹមតែ២០% ប៉ុណ្ណោះនាពេលបច្ចុប្បន្ននេះ។
សូមបញ្ជាក់ថា តាមទិន្នន័យដែលបង្ហាញដោយ Market Insider បានឲ្យដឹងថា គិតតាំងពីដើមឆ្នាំ២០២០ មកទល់ថ្ងៃនេះ តម្លៃមាសមានការធ្លាក់ចុះខ្លាំងបំផុតនោះ គឺនៅពាក់កណ្ដាលខែមិថុនា ហើយតាំងពីនោះមក វាបានងើបឡើងវិញក្រឺតៗជាលំដាប់។
បើយើងក្រឡេកទៅមើលទីផ្សារតម្លៃមាសនៅវៀតណាម និងថៃវិញ សុទ្ធតែបានបង្ហាញពីការកើនឡើងខ្ពស់ដូចគ្នាដែរ ដោយទីផ្សារមាសនៅប្រទេសជិតខាងកម្ពុជាទាំងពីរ បានកើនឡើងថ្លៃខ្ពស់បំផុតមិនធ្លាប់មានក្នុងរយៈពេល ៩ឆ្នាំមកនេះ។
តម្លៃមាសលក់ចេញនៅវៀតណាមកាលពីថ្ងៃអង្គារម្សិលមិញ មាន ២.២១៣ ដុល្លារអាមេរិក ក្នុងមួយតម្លឹង កើនឡើងជិត១% ធៀបនឹងថ្ងៃចន្ទ។ រីឯតម្លៃមាសនៅថៃវិញ កាលពីថ្ងៃអង្គារដូចគ្នានេះដែរ បានកើនឡើងដល់ ២.១៨៩ ដុល្លារក្នុងមួយតម្លឹង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
