ទំហំពាណិជ្ជកម្មកម្ពុជា និង កូរ៉េ កើនតិចតូច ខណៈប្រទេសទាំងពីរចាប់ផ្តើមសិក្សាពាណិជ្ជកម្មសេរី!

បើផ្អែកទៅលើទិន្នន័យជាផ្លូវការ​ពីសមាគមពាណិជ្ជកម្ម​អន្តរជាតិកូរ៉េ បានបញ្ជាក់ឲ្យដឹងថា ក្នុងរយៈពេល ១០ខែ ដើមឆ្នាំ ២០១៩នេះ កន្លងទៅថ្មីៗនេះ ទំហំពាណិជ្ជកម្ម​ទ្វេភាគី រវាង ប្រទេសកម្ពុជា និងសាធារណរដ្ឋកូរ៉េ សម្រេចបានជាង ៨៦០លាន​ដុល្លារអាមេរិក ដែលមាន​កំណើនប្រមាណ ៥ភាគរយ ធៀបនឹងរយៈពេលដូចគ្នា កាលពីឆ្នាំមុន។

ទន្ទឹមនឹងកំណើន​ពាណិជ្ជកម្ម​តិចតូចនេះដែរ កម្ពុជា និង កូរ៉េខាងត្បូង បានចុះហត្ថលេខា​រួចជាស្រេចលើ សេចក្តីថ្លែងការណ៍រួម ស្តីពី ការចាប់ផ្តើម​ការសិក្សាលទ្ធភាព ក្នុងការបង្កើត​ កិច្ចព្រមព្រៀង​ពាណិជ្ជកម្មសេរី រវាងគ្នា ដែលរំពឹង​ផងដែរថា កិច្ចព្រមព្រៀងនេះ នឹងអាចជួយ​ពង្រឹង និងពង្រីក​ទំហំពាណិជ្ជកម្ម​នៃប្រទេស​ទាំងពីរ ខណៈការធ្វើ​ពាណិជ្ជកម្ម​ជាមួយគ្នា កំពុងបង្ហាញ​ពីសញ្ញាវិជ្ជមាន។ នេះបើយោង​តាមសេចក្តី​ប្រកាស​របស់ ក្រសួងពាណិជ្ជកម្ម​កម្ពុជា។

ឯកឧត្តម ប៉ាន សូរស័ក្តិ រដ្ឋមន្រ្តីក្រសួង​ពាណិជ្ជកម្ម​កម្ពុជា បានអះអាងថា កិច្ចព្រមព្រៀង​ពាណិជ្ជកម្ម​សេរីនេះ រំពឹងថា​នឹងពង្រឹង និងពង្រីក​ទំហំពាណិជ្ជកម្ម​ទ្វេភាគី ព្រមទាំងបង្កើត​ឱកាសការងារ​ក្នុងស្រុក ការនាំចេញទំនិញ និងសេវា និងពង្រីកវិនិយោគ​បន្ថែមផងដែរ។

ក្នុងអំឡុងពេល ១០ខែនេះ កូរ៉េ បាននាំចូលមក កម្ពុជា ប្រមាណ ៥៨១លានដុល្លារ​អាមេរិក មានកំណើន ៧ភាគរយ ហើយកម្ពុជា​បាននាំចេញ​ទៅកាន់កូរ៉េវិញ ក្នុងទំហំ​ទឹកប្រាក់ ២៨១លាន​ដុល្លារ​អាមេរិក មានកំណើន ២ភាគរយ ដែលធ្វើឲ្យកម្ពុជា មានឱនភាព​ពាណិជ្ជកម្ម​ជាមួយកូរ៉េ ជាង ៣០០​លានដុល្លារអាមេរិក។

របាយការណ៍ដដែល​បានបញ្ជាក់​ឲ្យដឹងថា ក្នុង ខែតុលា កម្ពុជា បាននាំចេញ​ទៅកាន់កូរ៉េ មានទំហំទឹក​ប្រាក់ជាង ២២លានដុល្លារ​អាមេរិក ខណៈដែរ ទំហំទឹកប្រាក់ ដែលកូរ៉េ បាននាំចូល​មកកាន់ កម្ពុជា វិញ គឺមានជាង ៦២លាន​ដុល្លារ​អាមេរិក។

បើតាមទិន្នន័យពី ក្រសួងពាណិជ្ជកម្ម​កម្ពុជា បានបង្ហាញថា ទំហំពាណិជ្ជកម្ម​រវាងកម្ពុជា-កូរ៉េ កាលពីឆ្នាំ ២០១៨កន្លងទៅ សម្រេចបានជាង ៧៥៦ដុល្លារអាមេរិក មានកំណើន ១៤ភាគរយ ធៀបនឹងឆ្នាំ ២០១៧ ហើយទំនិញ​នាំចេញ​សំខាន់ៗ របស់កម្ពុជា ទៅកូរ៉េ រួមមាន សម្លៀកបំពាក់ ផ្នែកគ្រឿង​អេឡិចត្រូនិក ស្បែកជើង វ៉ាលី និងកៅស៊ូធម្មជាតិ ខណៈដែរ កម្ពុជា នាំចូលពី កូរ៉េ មកវិញ រួមមាន រថយន្ត ក្រណាត់ គ្រឿងអេឡិចត្រូនិក គ្រឿងចក្រ និងផលិតផលថែរក្សាសម្រស់។

សូមជម្រាបផងដែរថា ប្រមុខរាជរដ្ឋាភិបាល​កម្ពុជា សម្តេច តេជោ ហ៊ុន សែន បានប្រកាសកាល​ពីពេលថ្មីៗនេះថា កម្ពុជា នឹងចិន បានកំណត់ យក ថ្ងៃទី ០៤ ខែធ្នូ ឆ្នាំ២០១៩នេះ ដើម្បីបើកការចរចាកិច្ច​ព្រមព្រៀងពាណិជ្ជកម្ម​សេរី​ជាមួយគ្នា​ជាលើកដំបូង ដើម្បីពង្រីក​ការធ្វើពាណិជ្ជកម្ម​រវាងប្រទេសទាំងពីរ​កាន់តែទូលំទូលាយ។ ជាមួយគ្នានេះ ក្រសួងពាណិជ្ជកម្ម ដែលមាន​តួនាទីសំខាន់ ក្នុងការចរចានេះ បានអះអាងថា ក្រសួងបានត្រៀម​ខ្លួនរួចរាល់​ហើយ សម្រាប់កិច្ចចរចានេះ ហើយរំពឹងថា ការចរចាជាមួយ​ភាគីចិន នឹងមិនប្រើពេល​យូរនោះឡើយ ដើម្បីឈាន​ទៅសម្រេចកិច្ចចរចា​ពាណិជ្ជកម្មនេះ៕