សូមបញ្ជាក់ថា SDR គឺជាទ្រព្យសកម្មបម្រុងរបស់អន្តរជាតិ ដែលវាត្រូវបានបង្កើតដោយស្ថាប័នមូលនិធិរូបិយវត្ថុអន្តរជាតិ (IMF) តាំងពីឆ្នាំ ១៩៦៩ ដើម្បីបំពេញបន្ថែមលើប្រាក់បម្រុងផ្លូវការរបស់ប្រទេសជាសមាជិកនៃស្ថាប័ននេះ។ អត្រាប្ដូរប្រាក់ គិតនៅក្នុងខែមិថុនា ២០១៩នេះ ១ SDR ស្មើនឹងប្រមាណ ១,៣៨ ដុល្លារអាមេរិក។
ស្របពេលដែលរាជរដ្ឋាភិបាលបានកំណត់ទំហំកម្ចីថ្មីបន្ថែម ពីបរទេសនេះដែរ គេសង្កេតឃើញថា ទំហំបំណុលរបស់កម្ពុជា ដែលជំពាក់បរទេសនៅឆ្នាំ ២០១៨ មានប្រមាណ ៧ពាន់លានដុល្លារអាមេរិករួចទៅហើយ។ នេះបើតាមរបាយការណ៍ ពីក្រសួងហិរញ្ញវត្ថុ។
អត្ថបទទាក់ទង!
ក្នុងសារាចរណែនាំនោះ បានបញ្ជាក់ពីវិធានការផ្នែកចំណាយ ក្នុងក្របខ័ណ្ឌនៃគោលដៅ ទ្រទ្រង់ចលនការនៃការអភិវឌ្ឍសេដ្ឋកិច្ច ក្នុងបរិការណ៍ នៃការកើនឡើងនូវភាពមិនច្បាស់លាស់ និងហានិភ័យ ពាក់ព័ន្ធ ជាពិសេស លទ្ធភាពនៃការដកប្រព័ន្ធអនុគ្រោះពន្ធ EBA ដោយសហភាពអឺរ៉ុប រាជរដ្ឋាភិបាល បានដាក់ចេញនូវវិធានការជាក់លាក់ និងមុតស្រួចជាច្រើន ដើម្បី បង្កើនប្រសិទ្ធភាពចំណាយក្នុងឆ្នាំ២០២០។ វិធានការមួយ ក្នុងចំណោមនោះ គឺរាជរដ្ឋាភិបាល នឹងបន្ដអនុវត្ត ក្របខ័ណ្ឌ គោលនយោបាយ ស្ដីពីការគ្រប់គ្រងបំណុលសារធារណៈ ក្នុងគោលដៅ រក្សាចីរភាពបំណុល ទៅតាមវិធានការគោលនយោបាយគន្លឹះ ដែលបានគ្រោងទុក។ ក្នុងនោះ រាជរដ្ឋាភិបាល បានកំណត់ ទំហំនៃការខ្ចីថ្មីបន្ថែម ក្នុងរង្វង់ ១,៥ ពាន់លាន SDR (ប្រហែល ២ពាន់លានដុល្លារអាមេរិក) ទៅ ២ ពាន់លនា SDR (ប្រហែល ២.៨០០ លានដុល្លារអាមេរិក) ក្នុងមួយឆ្នាំ ទៅតាមបរិការណ៍ នៃគោលនយោបាយថវិកា និងវិវឌ្ឍនាការម៉ាក្រូសេដ្ឋកិច្ចជាក់ស្ដែងរបស់កម្ពុជា។
មិនតែប៉ុណ្ណោះ រាជរដ្ឋាភិបាល នឹងរក្សាអនុបាតតម្លៃបច្ចុប្បន្ននៃបំណុលសាធារណៈក្រៅប្រទេស (រួមទាំងបំណុលដែលមានការធានាពីរដ្ឋ) ធៀបនឹងផលិតផលក្នុងស្រុកសរុប ឲ្យស្ថិតនៅក្រោម ៤០%។
អត្ថបទគួរអាន!
ខ្ចីបំណុលបរទេសច្រើន កម្ពុជាពិតជាធ្លាក់ ចូលអន្ទាក់បំណុល ឬយ៉ាងណា?
ប្រមុខរាជរដ្ឋាភិបាលកម្ពុជា សម្ដេច ហ៊ុន សែន បានបញ្ជាក់នាពេលកន្លងទៅថ្មីៗនេះដែរថា កម្ពុជាទើបតែជំពាក់បំណុលបរទេសក្នុងចំនួនប្រមាណតែ ២១,៥% ប៉ុណ្ណោះ នៃផសស ខណៈដែលលទ្ធភាពអាចខ្ចីបាន គឺមានរហូតដល់ ៤០%ឯណោះ។ ណាមួយទៀតនោះ កម្ចីដែល កម្ពុជាបានខ្ចីពីបរទេសទាំងនោះ គឺជាកម្ចីឥណទានសម្បទាន ដោយអត្រាការប្រាក់ទាប និងរយៈពេលសងវែង ហើយប្រាក់កម្ចីទាំងនោះ គឺសុទ្ធតែយកមកប្រើប្រាស់បានចំគោលដៅ សម្រាប់ការអភិវឌ្ឍប្រទេស។
ប្រទេសចិន ត្រូវបានគេដឹងថា ជាម្ចាស់បំណុលធំមួយ របស់កម្ពុជា ហើយការបន្តខ្ចីបំណុលពីមហាមិត្តដែកថែបចិននេះទៀតសោត ត្រូវបានអ្នកតាមដាន សេដ្ឋកិច្ច សង្គម លើកឡើងពីក្ដី ព្រួយបារម្ភថា កម្ពុជា អាចនឹងធ្លាក់ចូលអន្ទាក់បំណុលរបស់ចិន។ ទោះយ៉ាងណា ទាក់ទងនឹងការលើឡើងនេះ សម្ដេច ហ៊ុន សែន បានបញ្ជាក់យ៉ាងដាច់ណាត់ថា កម្ពុជានឹងមិនធ្លាក់ចូលក្នុងអន្ទាក់បំណុលចិនវណ្ឌ ក នោះឡើយ។
សម្ដេច ហ៊ុន សែន បញ្ជាក់ថា មានហេតុផល ៣ យ៉ាង ដែលកម្ពុជា នឹងមិនធ្លាក់ចូលចូលក្នុងបន្ទាក់បំណុលចិន រួមមាន៖
ទី១ គឺ កម្ពុជារក្សាបានធិបតេយ្យភាពរបស់ខ្លួន ក្នុងការខ្ចីបំណុលពីចិន ពោលគឺខ្ចីទៅតាមគម្រោងដែលជាតម្រូវការសម្រាប់ការអភិវឌ្ឍ។ ម្យ៉ាងវិញទៀតនោះ ប្រទេសចិន គឺគោរពនូវការសម្រេចចិត្តរបស់កម្ពុជា ដោយមិនបានចាប់បង្ខំឲ្យកម្ពុជាត្រូវតែខ្ចីបំណុលពីចិននោះឡើយ។
ចំណុចសំខាន់ទី២នោះ គឺកម្ចីដែលកម្ពុជាបានខ្ចី គឺជាកម្ចីឥណទានសម្បទាន ដោយមានអត្រាការប្រាក់ទាប និងការសងត្រឡប់ទៅវិញនោះ មានរយៈពេលវែង។ លើសពីនេះកម្ពុជានឹងបន្ដខ្ចីកម្ចីបែបនេះ ថែមទៀត ហើយមិនមែនគ្រាន់តែខ្ចីពីចិននោះទេ អាចខ្ចីពីជប៉ុន និងជាមួយស្ថាប័នហិរញ្ញវត្ថុដទៃទៀតផងដែរ។
និងចំណុចសំខាន់ទី៣នោះ គឺកម្ពុជាមានការប្រុងប្រយ័ត្នខ្លាំងណាស់ ចំពោះការខ្ចីបុលពីបរទេសនេះ។ ជាក់ស្ដែង មកទល់ពេលនេះ កម្ពុជាទើបតែជំពាក់បំណុលបរទេសប្រមាណ ២១,៥% ប៉ុណ្ណោះ នៃអនុបាត៤០ ភាគរយដែលអនុញ្ញាតឲ្យខ្ចីបាន។
តើអ្នកបានអានអត្ថបទនេះ ហើយឬនៅ?
ជុំវិញនឹងការខ្ចីបំណុលពីបរទេសនេះដែរ ក្រុមអ្នកជំនាញសេដ្ឋកិច្ច បានលើកឡើងដែរថា ដើម្បីអាចអភិវឌ្ឍទៅមុខបានលឿន គឺកម្ពុជាពិតជាត្រូវការខ្ចីបំណុលពីបរទេសបន្ថែមទៀត ដើម្បីយកមកធ្វើការអភិវឌ្ឍ ដ្បិតថា លទ្ធភាពខ្ចីរបស់កម្ពុជានៅមានច្រើននៅឡើយ បើធៀបនឹងបណ្ដាប្រទេសផ្សេងៗទៀត។
ទោះយ៉ាងណា ក្រុមអ្នកតាមដានសេដ្ឋកិច្ច សង្គម ក៏បានគូសបញ្ជាក់ដែរថា កម្ពុជាទន្ទឹមនឹងការខ្ចីបំណុលបន្ថែមពីបរទេសនេះ រាជរដ្ឋាភិបាលគួតែបង្កើនសមត្ថភាពគ្រប់គ្រងបំណុលសាធារណៈនេះឲ្យកាន់តែប្រសើរឡើងថែមទៀត ពោលគឺ ប្រើប្រាស់ឲ្យបានចំគោលដៅ ក្នុងការអភិវឌ្ឍយ៉ាងមានប្រសិទ្ធភាព។
ឯកឧត្តម វង្ស៊ី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ធ្លាប់បានអះអាងថា ការគ្រប់គ្រងបំណុលសាធារណៈរបស់រាជរដ្ឋាភិបាល គឺមានប្រសិទ្ធភាពខ្ពស់ និងមានការប្រយ័ត្នប្រយែងខ្ពស់ណាស់។ មិនតែប៉ុណ្ណោះ បំណុលដែលកម្ពុជាបានខ្ចីពីបរទេសគឺសុទ្ធសឹងតែជាកម្ចីដែលមានការអនុគ្រោះ ពោលគឺអត្រាការប្រាក់ទាប និងការសងត្រឡប់ទៅវិញមានរយៈពេលវែង។
ការចំណាយ និងចំណូលថវិការដ្ឋ ឆ្នាំ២០២០
បើយើងពិនិត្យទៅមើល ការចំណាយ និងចំណូលរបស់រដ្ឋវិញ ឃើញថា នៅឆ្នាំ២០២០ ខាងមុខនេះ រាជរដ្ឋាភិបាលក៏មានគម្រោងនឹងពង្រីកការចំណាយ និងចំណូលរបស់ខ្លួនផងដែរ។
ដើម្បីសម្រេចគោលដៅ នៃក្របខ័ណ្ឌគោលនយោបាយ ម៉ាក្រូសេដ្ឋកិច្ច និងក្របខ័ណ្ឌគោលនយោបាយ ហិរញ្ញវត្ថុសាធារណៈ រាជរដ្ឋាភិបាលបានកំណត់គោលដៅ សូចនាករ ហិរញ្ញវត្ថុសាធារណៈមួយចំនួន សម្រាប់ឆ្នាំ ២០២០ ដូចជា ចំណូលក្នុងស្រុកនៅឆ្នាំ ២០២០ គ្រោងនឹងសម្រេចឲ្យបាន២២,៥២% នៃ ផលិតផលក្នុងស្រុកសរុប (ផសស) ក្នុងនោះ ចំណូលចរន្ដ ក្នុងទំហំ ២២,៣៦% នៃផសស និងចំណូលមូលធនក្នុងទំហំ ០,១៦% នៃផសស។ ដោយឡែក ការប្រមូលចំណូលពីអគ្គនាយកដ្ឋានពន្ធដារ ត្រូវគ្រោងសម្រេចឲ្យបាន ៩,៦៩% នៃផសស ខណៈចំណូលពីអគ្គនាយកដ្ឋានគយ និងរដ្ឋាករវិញ គ្រោងសម្រេចឲ្យបាន ៩,៧៨% នៃផសស។
អត្ថបទគួរឲ្យចាប់អារម្មណ៍!
ដោយឡែក ការចំណាយសរុបថវិការដ្ឋនៅឆ្នាំ ២០២០ វិញ រាជរដ្ឋាភិបាល កំណត់ក្នុងរង្វង់ ២៨,៤០% នៃផសស។
តាមរាជរដ្ឋាភិបាល កំណើនេសេដ្ឋកិច្ចកម្ពុជា នៅឆ្នាំ ២០១៩នេះ ត្រូវបានព្យាករថា អាចនឹងសម្រេចបានក្នុងរង្វង់ ៧,១% ខណៈឆ្នាំ២០១៨ សម្រេចបានកំណើនខ្ពស់ គឺ ៧,៥%។ ដោយឡែក នៅឆ្នាំ ២០២០ សេដ្ឋកិច្ចកម្ពុជា ត្រូវបានរំពឹងថា នឹងថមថយកំណើនមកត្រឹម ៦,៥% ប៉ុណ្ណោះ ដោយសារតែការរំពឹងទុកផលប៉ះពាល់នៃលទ្ធភាពក្នុងការដក ប្រព័ន្ធអនុគ្រោះពន្ធ EBAដែលអាចនឹងដាក់សម្ពាធដល់ការនាំចេញរបស់កម្ពុជា ជាពិសេសលើផលិតផលកាត់ដេរ ទៅកាន់ទីផ្សារអឺរ៉ុប៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
