តាមព្យាកររបស់ក្រសួងសេដ្ឋកិច្ច និងហិរញ្ញវត្ថុ បានឲ្យដឹងទៀតថា សម្រាប់ឆ្នាំ២០២១ ទៅដល់ ឆ្នាំ២០២៤ សន្និធិបំណុលរបស់កម្ពុជានឹងត្រូវពង្រីកបន្ថែមទៀតប្រមាណជាង១ពាន់លានដុល្លារក្នុងមួយឆ្នាំៗ ដោយគិតដល់ឆ្នាំ២០២៤ សន្និធិបំណុលរបស់កម្ពុជានឹងមានដល់ទៅជិត ១៤ ពាន់លានដុល្លារអាមេរិក។
ក្រសួងសេដ្ឋកិច្ចបានគូសបញ្ជាក់ថា បើទោះបីជាទំហំនៃការខ្ចីនឹងត្រូវបន្ដកើនក្ដី ក៏ស្ថានភាពបំណុលសាធារណៈរបស់កម្ពុជា នៅតែត្រូវបានវាយតម្លៃថា ស្ថិតក្នុងភាពអាចគ្រប់គ្រងបាន ពោលគឺ នៅតែមានចីរភាព និងហានិភ័យកម្រិតទាបដដែល។
បើតាមក្រសួងសេដ្ឋកិច្ច ប្រាក់កម្ចីដែលរាជរដ្ឋាភិបាលបានខ្ចីពីដៃគូអភិវឌ្ឍន៍នានានោះ គឺសុទ្ធតែបានប្រើប្រាស់ចំគោលដៅ ក្នុងគម្រោងវិនិយោគសាធារណៈ និងវិស័យអាទិភាពរបស់រាជរដ្ឋាភិបាល សំដៅដល់ការរួមចំណែកទ្រទ្រង់ចីរភាពនៃកំនើនរយៈពេលវែង និងបង្កើនផលិតភាពសេដ្ឋកិច្ច ឬផលិតភាពផលិតកម្ម។
អត្ថបទទាក់ទង
នៅក្នុងឆមាសទី១ ឆ្នាំ២០២០នេះដែរ រាជរដ្ឋាភិបាលកម្ពុជា ក៏ទើបតែបានចុះកិច្ចព្រមព្រៀងខ្ចីឥណទានសម្បទានជាមួយនឹងដៃគូអភិវឌ្ឍន៍នានា សរុបប្រមាណ ៤៨០ លានដុល្លារអាមេរិក ឬស្មើនឹង ២៥% នៃពិដានច្បាប់ដែលបានកំណត់ ១.៤០០ លាន SDR ឬស្មើនឹងជិត២ពាន់លានដុល្លារ។
តាមទិន្នន័យពីក្រសួងហិរញ្ញវត្ថុដដែល បានឲ្យដឹងទៀតថា ក្នុងឆមាសទី១ ឆ្នាំ២០២០នេះដែរ រាជរដ្ឋាភិបាលក៏បានដកសាច់ប្រាក់ពីដៃគូអភិវឌ្ឍន៍យកមកប្រើប្រាស់ជាក់ស្ដែងសរុបប្រមាណ ៤៤៤ លានដុល្លារ។ ក្នុងនោះ ការដកសាច់ប្រាក់ ក្នុងក្របខណ្ឌទ្វេភាគី មានចំនួនប្រមាណ ៦៣% ត្រូវនឹងជាង ២៨០ លានដុល្លារ និងក្របខណ្ឌពហុភាគី មានប្រមាណ ៣៧% ត្រូវនឹងជាង ១៦០ លានដុល្លារអាមេរិក។
ដោយឡែក ចំពោះការទូទាត់សងបំណុលវិញ នៅក្នុងឆមាសទី១ ឆ្នាំ២០២០នេះ រាជរដ្ឋាភិបាលក៏បានទូទាត់សងសេវាបំណុលជូនដៃគូអភិវឌ្ឍន៍សរុបជាង ១៥០ លានដុល្លារផងដែរ
សូមបញ្ជាក់ថា បើគិតចាប់ពីឆ្នាំ១៩៩៣ មកដល់ដំណាច់ឆមាសទី១ ឆ្នាំ២០២០ រាជរដ្ឋាភិបាលកម្ពុជា បានចុះកិច្ចព្រមព្រៀងខ្ចីឥណទានសម្បទានជាមួយដៃគូអភិវឌ្ឍន៍នានា សរុបចំនួនជាង ១៣ ពាន់លានដុល្លារអាមេរិក។ រីឯ ការដកសាច់ប្រាក់ ពីដៃគូអភិវឌ្ឍន៍មកប្រើប្រាស់ជាក់ស្ដែងវិញ ប្រមាណ ៨ពាន់៥រយលានដុល្លារអាមេរិក ឬស្មើនឹងប្រមាណ ៦៥% នៃទំហំឥណទានសម្បទានសរុប។
ប្រទេស និងដៃគូដែលជាម្ចាស់បំណុលធំបំផុតរបស់កម្ពុជា គឺ ប្រទេសចិនដែលមាន ៣ពាន់៨រយលានដុល្លារ ឬស្មើនឹងជិត ៤៧% នៃសន្និបំណុលសរុប។ បន្ទាប់មក គឺប្រទេសជប៉ុន, កូរ៉េខាងត្បូង និងបារាំង រួមជាមួយនឹងធនាគារអភិវឌ្ឍន៍អាស៊ី និងធនាគារពិភពលោកជាដើម។
លោក David Freedman សេដ្ឋវិទូប្រចាំប្រទេស និងជាមន្រ្តីជាន់ខ្ពស់ផ្នែកសេដ្ឋកិច្ច របស់ធនាគារអភិវឌ្ឍន៍អាស៊ី ធ្លាប់បានលើកឡើងដែរថា កម្រិតបំណុលសាធារណៈរបស់កម្ពុជាដែលមាននាពេលបច្ចុប្បន្នគឺពិតជានៅមានទំហំតូចនៅឡើយ និងអាចមានលទ្ធភាពខ្ពស់ក្នុងពង្រីកបន្ថែម ពោលគឺកម្រិតបំណុលសាធារណៈរបស់កម្ពុជានៅមានទាបជាងប្រទេសដទៃទៀតដល់ទៅ ៣០%ឯណោះ ដែលវាសបញ្ជាក់ថា កម្ពុជានៅមានលទ្ធភាពក្នុងការខ្ចីបន្ថែមទៀត។
ទោះយ៉ាងណា លោកស្រី Sunniya Durrani-Jamal នាយិកាប្រចាំប្រទេសរបស់ធនាគារអភិវឌ្ឍន៍អាស៊ីក៏បានគូសបញ្ជាក់ដែរថា ការខ្ចីប្រាក់កម្ចី ដែលកម្ពុជាបានធ្វើនាពេលកន្លងមក គឺមានការប្រយ័ត្នប្រយែងខ្ពស់ណាស់។ លោកស្រីបន្ថែមថា កម្ពុជាអាចរក្សាបាននូវកម្រិតបំណុលសាធារណៈរបស់ខ្លួនឲ្យនៅទាបបាន តាមរយៈការទាក់ទាញការវិនិយោគផ្ទាល់ពីក្រៅប្រទេសបន្ថែម ក៏ដូចជាជំរុញការវិនិយោគក្នុងវិស័យឯកជន ហើយរាជរដ្ឋាភិបាលត្រូវធ្វើការកែលម្អទៅលើបរិយាកាសវិនិយោគឲ្យកាន់តែប្រសើរឡើង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
