ថ្លែងនៅក្នុងពិធីប្រគល់សញ្ញាបត្រជូននិស្សិតនៃវិទ្យាស្ថានមួយ ដែលធ្វើឡើង នៅមជ្ឈមណ្ឌលកោះពេជ្រ នាព្រឹកថ្ងៃទី ១០ ខែមីនានេះ សម្តេច តេជោ ហ៊ុន សែន បានបញ្ជាក់ថា រាជរដ្ឋាភិបាលកម្ពុជា បានត្រៀមកញ្ចប់ថវិកាបម្រុង ដើម្បីទប់ទល់នឹងបញ្ហាមេរោគ Covid-19 ដែលបាននិងកំពុងតែធ្វើឲ្យប៉ះពាល់ការលូតលាស់នៃកំណើនសេដ្ឋកិច្ចរបស់កម្ពុជា។ បើតាមសម្តេច ហ៊ុន សែន កញ្ចប់ថវិកាបម្រុងនេះ គឺរៀបចំសម្រាប់សេណារីយ៉ូ២ផ្សេងគ្នា ពោលគឺ សេណារីយ៉ូទីមួយ ប្រសិនបើបញ្ហាមេរោគ Covid-19 នេះ នៅបន្ដអូបន្លាយរយៈពេល ៦ខែ នោះកម្ពុជាមានថវិកាទប់ទល់ប្រមាណ ៨០០លានដុល្លារ ប៉ុន្ដែ បើវាអូសបន្លាយវែងជាងនេះ ឬរហូតដល់១ឆ្នាំ កម្ពុជានឹងមានថវិកាបម្រុងរហូតដល់ទៅ ២ពាន់លានដុល្លារអាមេរិក។
អត្ថបទទាក់ទង!
សម្តេច ហ៊ុន សែន មានប្រសាសន៍យ៉ាងដូច្នេះថា «រាជរដ្ឋាភិបាលបម្រុងទុកនៃថវិកា តាមសេណារីយ៉ូ ទី១ ឬទី២។ បើទី១ គឺត្រៀមបម្រុងប្រមាណជា ជិត ៨០០ លានដុល្លារ អាហ្នឹងបើសិនជា ចេញអា សេណារីយ៉ូ វិបត្តិ គេថា វិបត្តិអូសបន្លាយ៦ខែ។ អារឿងកូរ៉ូណាអូបន្លាយ៦ខែ គឺត្រៀមថវិកាប្រមាណ៨០០ លាន ដើម្បីស្រោចស្រង់សេដ្ឋកិច្ច។ ហើយបើវាទៅដល់១ឆ្នាំ យើងក៏បានប៉ាន់ស្មានថា បើ៦ខែ វាធ្លាក់សេដ្ឋកិច្ច ធ្លាក់កំណើនប៉ុនណា? ផលប៉ះពាល់វាធំប៉ុនណា? ហើយបាត់បង់ចំណូលប៉ុនណា? ប្រសិនបើវាកើតដល់មួយឆ្នាំ តើកំណើនសេដ្ឋកិច្ចរបស់យើងធ្លាក់នៅប៉ុនណា? ហើយយើងត្រូវប៉ះប៉ូវទំហំទឹកប្រាក់ប៉ុនណា? អញ្ចឹងវាស្ថិតនៅក្នុងចន្លោះ ពី៨០០លាន ទៅ២ពាន់លានប៉ុណ្ណឹង ដែលយើងត្រៀមបម្រុង»។
មិនមែនមានតែកម្ពុជា ដែលបានត្រៀមថវិកាបម្រុងដើម្បីចំណាយ ដោះស្រាយបញ្ហា Covid-19 នៅប្រទេសជាច្រើននៅជុំវិញពិភពលោក ក៏ដូចជាតំបន់ ក៏បានត្រៀមថវិការាប់ពាន់លានដុល្លារ ទប់ទល់នឹងឥទ្ធិពលរបស់មេរោគផ្លូវដង្ហើមមួយនេះផងដែរ តួយ៉ាង ប្រទេសថៃ មានត្រៀមកញ្ចប់ថវិកា ៣,២ពាន់លានដុល្លារអាមេរិក, ប្រទេសសិង្ហបុរី ត្រៀម ៤,៦ ពាន់លានដុល្លារអាមេរិក, ប្រទេសម៉ាឡេស៊ី មាន ៤,៨ ពាន់លានដុល្លារអាមេរិក។
ជុំវិញនឹងបញ្ហាផ្ទុះឡើងនៃមេរោគ Covid-19 នេះដែរ ក្រសួងសេដ្ឋកិច្ច និងហិរញ្ញវត្ថុ នាពេលកន្លងទៅថ្មីៗនេះ បានព្យាករកំណើនសេដ្ឋកិច្ចកម្ពុជា នៅឆ្នាំ២០២០នេះ ថានឹងអាចរក្សាបានជុំវិញ៦%ប៉ុណ្ណោះ ដោយក្រសួងបានផ្អែកទៅលើកត្តាហានិភ័យថ្មីៗចំនួនពីរ គឺបញ្ហាមេរោគ Covid-19 និង បញ្ហានៃការដកប្រព័ន្ធអនុគ្រោះពន្ធ EBA ផ្នែកខ្លះពីប្រទេសកម្ពុជា។ ទោះយ៉ាងណា ក្រសួងសេដ្ឋកិច្ច និងហិរញ្ញវត្ថុ អះអាងថា កំណើនសេដ្ឋកិច្ចជុំវិញ ៦%របស់កម្ពុជានេះ នៅតែជាកំណើនមួយខ្ពស់នៅក្នុងតំបន់។
ទោះយ៉ាងណា អ្នកជំនាញសេដ្ឋកិច្ចខ្លះ បានអះអាងថា កំណើនសេដ្ឋកិច្ចកម្ពុជានៅឆ្នាំនេះ អាចនឹងថមថយក្រោម ៦%ទៅទៀត ខណៈដែលស្ថាប័នស្រាវជ្រាវអន្តរជាតិមួយ គឺ Moody’s ក៏បានព្យាករកំណើនសេដ្ឋកិច្ចកម្ពុជា នៅឆ្នាំ២០២០នេះដែរថា គឺអាចនឹងមានត្រឹមតែ ៥,៥% ប៉ុណ្ណោះ។
សូមបញ្ជាក់ថា បញ្ហាមេរោគ Covid-19 នេះបាននិងកំពុងធ្វើឲ្យប៉ះពាល់ដល់ការលូតលាស់របស់ប្រទេសជាច្រើននៅទូទាំងពិភពលោក។ ជាក់ស្ដែង សម្រាប់កម្ពុជា វិស័យសំខាន់ចំនួន២ ដែលត្រូវបានគេមើលឃើញថា កំពុងប្រឈមខ្លាំងជាងគេ គឺវិស័យទេសចរណ៍ និងវិស័យកាត់ដេរ។
គិតមកទល់ម៉ោងនេះ ចំពោះប្រទេសកម្ពុជា ទើបតែមានករណីឆ្លងមេរោគ Covid-19 នេះ ចំនួន ២ករណីប៉ុណ្ណោះ ដោយមួយករណី កើតឡើងបុរសជនជាតិចិន តែត្រូវបានព្យាបាលសះស្បើយ និងត្រឡប់ទៅប្រទេសចិនវិញហើយ និងមួយករណីទៀត គឺបានឆ្លងលើបុរសជនជាតិខ្មែរម្នាក់ ដែលបានឆ្លងពីបុរសជនជាតិជប៉ុន ដែលបានចូលមក និងចាកចេញពីកម្ពុជា កាលពីពេលថ្មីៗនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
