ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានបញ្ជាក់ថា ប្រទេសកម្ពុជា បាននិងកំពុងរៀបចំច្បាប់វិនិយោគថ្មី និងច្បាប់ស្តីពីតំបន់សេដ្ឋកិច្ចពិសេស ដើម្បីបង្កើតនូវ ក្របខណ្ឌគតិយុត្ត ដែលមានលក្ខណៈគ្រប់ជ្រុងជ្រោយ និងមានតុល្យភាព ស្របទៅនឹងលក្ខខណ្ឌនៃការវិនិយោគ ជាមួយនឹងផលប្រយោជន៍របស់ប្រទេសកម្ពុជា។
យ៉ាងណាមិញ សម្តេចតេជោ បានបន្ថែមថា ការលើកកម្ពស់ការអភិវឌ្ឍសហគ្រាសធុនតូច និងមធ្យមនៅកម្ពុជា គឺជាគោលដៅអាទិភាពរបស់រាជរដ្ឋាភិបាល ដោយមានការលើកទឹកចិត្តផ្នែកពន្ធ ហើយវិស័យអាទិភាព រួមមាន វិស័យកសិកម្ម, កសិ-ឧស្សាហកម្ម, ការផលិត និងកែច្នៃម្ហូបអាហារ, ការស្រាវជ្រាវ និងអភិវឌ្ឍបច្ចេកវិទ្យាព័ត៌មានជាដើម។
អត្ថបទទាក់ទង!
គួរបញ្ជាក់ថា បើតាមទិន្នន័យពី ក្រុមប្រឹក្សាអភិវឌ្ឍន៍កម្ពុជា បច្ចុប្បន្ននៅទូទាំងប្រទេសកម្ពុជា មានតំបន់សេដ្ឋកិច្ចពិសេស ដែលមានដំណើរការចំនួន២៣ កន្លែង ដែលមានរោងចក្រចំនួន៤៩០ និងបង្កើតការងារបានចំនួន ប្រមាណជាង ១៣ម៉ឺនកន្លែង។
ការបង្កើតតំបន់សេដ្ឋកិច្ចពិសេស គឺជាទីតាំងវិនិយោគដែលបង្កើតឡើងសម្រាប់ទាក់ទាញការវិនិយោគផ្ទាល់ពីបរទេស ដែលជាទូទៅរដ្ឋាភិបាលបានផ្តល់លក្ខខណ្ឌលើកទឹកចិត្តផ្សេងៗ ដូចជា ការអនុគ្រោះពន្ធ ការបម្រើជូនសេវាច្រកចេញចូលតែមួយ ការសម្រួលបែបបទនាំចេញ នាំចូលទំនិញ ការសម្រួលបែបបទរដ្ឋបាលនានា និងលក្ខខណ្ឌផ្សេងៗទៀតជាច្រើន ដើម្បីជំរុញសកម្មភាពវិនិយោគ។
សូមជម្រាបថា ក្នុងរយៈពេល ៣ត្រីមាស ឆ្នាំ ២០១៩នេះ ការវិនិយោគក្នុងតំបន់សេដ្ឋកិច្ចពិសេសមាន ៨១គម្រោង ដែលមានទំហំទុនវិនិយោគជាង ៦៥០លានដុល្លារអាមេរិក មានការកើនឡើងខ្ពស់បើធៀបនឹងរយៈពេលដូចគ្នា កាលពីឆ្នាំ ២០១៨ ដែលមានការវិនិយោគ ៥៥គម្រោង ក្នុងទំហំទឹកប្រាក់ ៣០៩លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
