ក្នុងរយៈពេលបីខែដំបូងដើមឆ្នាំ២០១៨ នេះ របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បង្ហាញថា មានប្រទេសចំនួន ៥ ដែលបានបោះទុនវិនិយោគនៅក្នុងសំណង់កម្ពុជាច្រើនជាងគេ ក្នុងនោះ មានដូចជា ប្រទេសន័រវែស ចិន ចិនតៃវ៉ាន ជប៉ុន សឹង្ហបុរី និង បារាំង។
ក្នុងរយៈពេល៣ខែដំបូងឆ្នាំនេះដដែល ក្រសួងគ្រប់គ្រងដែនដី បានបន្តផ្តល់លិខិតអនុញ្ញាតសាងសង់ ដល់អ្នកវិនិយោគ និង ប្រជាពលរដ្ឋ សរុប ប្រមាណ ៨៧៩ គម្រោង ជាមួយនឹងទុនវិនិយោគ ៥០០លានដុល្លារ ក្នុងនោះ នៅរាជធានីភ្នំពេញ ៥៥ គម្រោង ជាមួយទុនវិនិយោគ ៣៧៦ លានដុល្លារ និង នៅតាមបណ្តាខេត្តមានគម្រោងសរុប ៨២៤ គម្រោង ជាមួយទុន ១២៩ លានដុល្លារអាមេរិក។
ទន្ទឹមនឹងនេះដែរ ប្រមុខដឹកនាំកម្ពុជា ក្រុមអ្នកអភិវឌ្ឍន៍លំនៅដ្ឋាន អ្នកបម្រើសេវាកម្មអចលនទ្រព្យនៅកម្ពុជា សុទ្ធតែបានប្រកាសជាសាធារណៈថា គ្មានសញ្ញាអ្វីដែលធ្វើឲ្យរាំងស្ទះដល់ការវិនិយោគនៅកម្ពុជាឡើយ ពិសេសវិស័យសំណង់ និងអចលនទ្រព្យនៅកម្ពុជា មិនមានសញ្ញាអ្វីប្រែប្រួលនោះទេ ពិសេសរិតតែបង្ហាញពីសញ្ញាល្អនៃការកើនឡើងជាងបណ្តាឆ្នាំកន្លងទៅនេះថែមទៀតផង។
រីឯអ្នកវិនិយោគអភិវឌ្ឍន៍ ទៅលើសំណង់លំនៅដ្ឋាន ក៏នៅតែសម្រុក ការសាងសង់ឥតឈប់ឈរ ដោយមិនអើពើរពីរឿងស្ថានភាពបោះឆ្នោតជាតិ ឬក៏មានវិបត្តិនយោបាយអ្វីនោះឡើយ។ ចុះសួរថា ហេតុអ្វីបានជា ពួកអ្នកវិនិយោគគ្រាក់ៗទាំងអស់នោះ មានទំនុកចិត្តកាន់តែខ្លាំងទៅលើការវិនិយោគនៅកម្ពុជា? ចម្លើយ គឺ មិនមានអ្វីជាតឹកតាងធំដុំ ដែលធ្វើឲ្យអ្នកវិនិយោគទុកចិត្តវិនិយោគកាន់តែខ្លាំងនៅប្រទេសកម្ពុជានៅពេលនេះ និង ពេលក្រោយ លើសពីចម្លើយ ដែលលើកឡើងថា ដោយសារភាពជឿជាក់ ស្ថេរភាពនយោបាយ គួបផ្សំនឹងកំណើនសេដ្ឋកិច្ចល្អជារៀងរាល់ឆ្នាំ និង ភាពចាស់ទុំរបស់អ្នកនយោបាយខ្មែរ នោះឡើយ។
អត្ថបទទាក់ទង!
គេនៅចាំបានថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា ធ្លាប់មានប្រសាសន៍ នៅក្នុងកម្មវិធីបើក ដាក់ឲ្យដំណើរការសណ្ឋាគារផ្កាយ៥ នៅលើកោះរុង នាពេលកន្លងទៅថ្មីៗនេះថា កម្ពុជាមិនមានវិបត្តិនយោបាយណាមួយកើតឡើងនោះទេ កម្ពុជាកំពុងបន្តលើផ្លូវអភិវឌ្ឍន៍របស់ខ្លួនឆ្ពោះទៅមុខ ជាមួយនឹងកំណើនសេដ្ឋកិច្ចដ៏រឹងមាំ និង ការវិនិយោគបន្តយ៉ាងរលួន ពិសេសឆ្នាំ២០១៨នេះគឺជាឆ្នាំដែលខុសប្លែកពីឆ្នាំមុនៗ ពោលគឺតម្លៃដីធ្លីមិនមានការធ្លាក់ថ្លៃនោះឡើយ បើទោះបី ជាឆ្នាំបោះឆ្នោតក៏ដោយ។
ពាក់ព័ន្ធទៅនឹងបញ្ហាខាងលើនេះដែរ ឯកឧត្តម ទេសរដ្ឋមន្ត្រី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ក៏បានលើកឡើងនៅក្នុងពិធីបើកការដ្ឋានសាងសង់គម្រោងអភិវឌ្ឍន៍លំនៅដ្ឋាន ឌឹផាម របស់លោក ឧកញ៉ា សៀ ឫទ្ធី នាពេលថ្មីៗនេះថា តម្លៃដីធ្លីនៅឆ្នាំ២០១៨នេះ មានស្ថានភាពល្អប្រសើរ ដោយនៅបន្តកើនឡើងជាគំហុកនៅក្នុងរាជធានីភ្នំពេញ និងបណ្តាខេត្តគោលដៅទេសចរសំខាន់ៗ ពិសេសគឺខេត្តព្រះសីហនុតែម្តង។
ឯកឧត្ដម ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
អ្នកជំនួញ និង អ្នកវិនិយោគធំៗក្នុងស្រុកមួយចំនួន ក៏បានអះអាងថា នៅក្នុងឆ្នាំ២០១៨ នេះ ស្ថានភាពនិងដំណើរការសកម្មភាពមុខជំនួញរបស់ពួកគេ នៅតែដំណើរការដោយមិនមានការភ័យព្រួយពីរឿងជិតបោះឆ្នោតជាតិនោះឡើយ គឺនៅតែអភិវឌ្ឍន៍ដើម្បីជំរុញឲ្យដំណើរការសេដ្ឋកិច្ចជាតិមានការរីកលូតលាស់។
លោកឧកញ៉ា សៀ ឫទ្ធី
ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន WorldBridge
Group បានលើកឡើងថា សម្រាប់កម្ពុជា
ការបោះឆោ្នតជាតិនេះគឺមិនមែនជាលើកទី១នោះទេ ដូច្នេះ កម្ពុជាមានភាពចាស់ទុំនៅក្នុងការបោះឆោ្នត
តាមរយៈបទពិសោធន៍នាពេលកន្លងមក។ មិនតែប៉ុណ្ណោះ តាមរយៈសុខសន្ដិភាពនាពេលបច្ចុប្បន្ន
លោកឧកញ៉ាយល់ឃើញយ៉ាងច្បាស់ថា ការបោះឆ្នោតជាតិលើកក្រោយនេះ ក៏មិនអាចធ្វើឲ្យមានផលប៉ះពាល់អ្វីធំដុំដល់វិស័យជំនួញនៅកម្ពុជាដែរ។
លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន Worldbridge Group។
លោកឧកញ៉ា សៀ ឫទ្ធី បានបញ្ជាក់អះអាងថា តួយ៉ាង ដូចជា កាលពីការបោះឆ្នោតជាតិអាណតិ្តមុនៗ កម្ពុជានៅតែរក្សាបានកំណើនសេដ្ឋកិច្ចរបស់ខ្លួនដដែល ខណៈវិនិយោគិនបរទេសនៅតែបានបន្តហូរចូលមកបណ្ដាក់ទុនរកស៊ីកាន់តែច្រើនឡើងៗនៅកម្ពុជា។
លោកឧកញ៉ាបន្ថែមថា ក្នុងនាមជាវិនិយោគិនក្នុងស្រុកមួយរូប លោកជឿជាក់លើការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រីដឹកនាំប្រទេស និង ជាពិសេស ការផ្ដល់ឱកាសនិងលើកទឹកចិត្តដល់វិនិយោគិន។
ជាការអះអាងដូចគ្នាដែរ គឺ អ្នកអភិវឌ្ឍន៍គម្រោងលំនៅដ្ឋានធំៗនៅកម្ពុជា មានដូចជា គម្រោងអភិវឌ្ឍន៍លំនៅដ្ឋានរបស់ឯកឧត្តម អ្នកឧកញ៉ា លី យ៉ុងផាត់ ដែលមានឈ្មោះថា ឌឹ ព្រីមមៀ លែន សែនសុខ បានបោះទុនវិនិយោគជិត ១០០លានដុល្លារកំពុងដំណើរការសាងសង់ និង មានគម្រោងវិនិយោគធំៗជាច្រើនទៀតកំពុងតែដំណើរការយ៉ាងសស្រាក់សស្រាំផងដែរ។
ជាមួយគ្នានេះដែរ លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា និង ជាអ្នកវិនិយោគគម្រោងលំនៅដ្ឋានដ៏ល្បីល្បាញមួយនៅកម្ពុជាក៏ធ្លាប់អះអះប្រាប់ខេមបូណូមីសដែរថា មិនមានសញ្ញាអាក្រក់ឡើយសម្រាប់សុខភាពវិស័យអចលនទ្រព្យនៅក្នុងឆ្នាំនេះ និងឆ្នាំក្រោយ។ ល្អត្រង់ថា អ្នកវិនិយោគមានទំនុកចិត្តលើស្ថិរភាពនយោបាយ និងកំណើនសេដ្ឋកិច្ច គួបផ្សំនឹង ការជឿជាក់លើភាពចាស់ទុំនៃអ្នកនយោបាយនៅកម្ពុជា។
ឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុន លី ហួរ គ្រុប (រូបថត៖ ហេង ភារម្យ)
ហើយបើយើងក្រឡេកទៅមើលគម្រោងអភិវឌ្ឍន៍បុរី ប៉េង ហួត បុរីពិភពថ្មី និង គម្រោងអភិវឌ្ឍន៍បុរីជាច្រើនទៀតនៅកម្ពុជា ឃើញថា ដូចមិនចាប់អារម្មណ៍រឿងវិបត្តិ នយោបាយ វិបត្តិសង្គមអីនោះទេ ពួកគេនៅតែបន្ថែមគម្រោងសាងសង់ និង បន្ថែមល្បឿនសាងសង់ជាបន្តបន្ទាប់ៗដដែល។ ទាំងអស់នេះគឺបង្ហាញពីទំនុកចិត្តនៅក្នុងប្រទេសរបស់ខ្លួន ដែលបានថ្នាក់ដឹកនាំត្រួសត្រាយផ្លូវ និង រក្សាសុខសុវត្តិភាព និងស្ថិរភាពជូនអ្នកវិនិយោគទាំងអស់នៅកម្ពុជា មិនថា ខ្មែរ មិនថា បរទេសនោះទេ។
លោកឧកញ៉ា ចេង ខេង ស្ថាបនិក និងជាអគ្គនាយកក្រុមហ៊ុនអចលនទ្រព្យ CPL។
អ្នកជំនាញនៅក្នុងវិស័យអចលនទ្រព្យកម្ពុជាលោកឧកញ៉ា ចេង ខេង អគ្គនាយកក្រុមហ៊ុន អចលនទ្រព្យ ស៊ីភីអិល បានគូសបញ្ជាក់ដែរថា ក្នុងឆ្នាំ២០១៨ នេះ មានសញ្ញានៃការកើនឡើងនៅក្នុងវិស័យសំណង់ជាច្រើនជាពិសេសក្នុងរាជធានីភ្នំពេញ និង ខេត្តព្រះសីហនុ សៀមរាប និង ខេត្តផ្សេងៗនេះ។ ហើយពិសេសជាងនេះទៅទៀតនោះ ឧកញ៉ា ចេង ខេង ដែលជាប្រធានក្រុមប្រឹក្សាភិបាលសមាគមអ្នកវាយតម្លៃនិង ភា្នក់ងារអចលនទ្រព្យកម្ពុជា បានបន្តថា នៅដើមឆ្នាំនេះ គេសង្កេតឃើញថា ការអភិវឌ្ឍវិស័យសំណង់ និងអចលនទ្រព្យមានសន្ទុះកើនឡើងគួរឲ្យកត់សម្គាល់នៅតំបន់ជាយៗរាជធានីភ្នំពេញ និងទីប្រជុំជនតាមបណ្តាខេត្តនានា។
លោកឧកញ៉ា នួន រិទ្ធី អគ្គនាយកក្រុមហ៊ុនសេវាអចលនទ្រព្យ KFA។
ដោយឡែកលោកឧកញ៉ា នួន រិទ្ធី អគ្គនាយកក្រុមហ៊ុន អចលនទ្រព្យ KFA ក៏បានឲ្យដឹងដែរថា សំណង់លំនៅដ្ឋានថ្មីៗកំពុងរីកចម្រើនខ្លាំង ស្របនឹងកំណើនសេដ្ឋកិច្ចខ្ពស់ ក៏អាស្រ័យដោយគោលនយោបាយលើកទឹកចិត្តរបស់រាជរដ្ឋាភិបាលក្នុងការជំរុញឲ្យមានការអភិវឌ្ឍ សំណង់អគារថ្មីៗឲ្យបានកាន់តែច្រើន។
លោកឧកញ៉ា បន្ថែមថា នៅឆ្នាំ២០១៨នេះ និងឆ្នាំបន្តបន្ទាប់ទៀត វិស័យសំណង់នៅកម្ពុជានឹងនៅតែបន្តរីកចម្រើនខ្លាំងក្លាដដែល។ យើងហ៊ានអះអាងដូច្នេះដោយសារតែកម្លាំងទិញលំនៅដ្ឋាន ការជួលអគារស្នាក់នៅ និងការជួលអគារការិយាល័យមានច្រើន ហើយតម្រូវការច្រើនទាំងអស់នេះក៏ដោយសារតែកម្ពុជាមានស្ថិរភាពនយោបាយ និងសេដ្ឋកិច្ចរឹងមាំដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
