របាយការណ៍របស់អគ្គនាយកដ្ឋានពន្ធដារ បានឲ្យដឹងថា ៣ខែ ដំបូង នៃឆ្នាំនេះ ចំណូលពន្ធមានការកើនឡើងខ្ពស់ជាង៣ខែ ដើមឆ្នាំមុន ប្រមាណ ជាង៧៣ លានដុល្លារអាមេរិក ឬស្មើនឹងកំណើនជាង១២%។ បើគិតត្រឹមតែខែមីនា មួយប៉ុណ្ណោះ ចំណូលពន្ធ អាករ ដែលអគ្គនាយដ្ឋានពន្ធដារប្រមូលបានមានចំនួនជាង ៤៧៦ លានដុល្លារអាមេរិក ស្មើនឹងជិត២១% នៃផែនការប្រចាំឆ្នាំ ហើយបើធៀបនឹងខែមីនាកាលពីឆ្នាំ២០១៨ ឃើញថាមានការកើនឡើងជាង៦%។
ខ្ញុំសូមរំឭកបន្តិចដែរ ថា នៅពេញមួយឆ្នាំ ២០១៨ កន្លងទៅនេះ អគ្គនាយកដ្ឋានពន្ធដារ ក៏បានប្រមូលពន្ធ-អាករគ្រប់ប្រភេទ តាមប្រព័ន្ធគ្រប់គ្រងទិន្នន័យចំណូលអនឡាន សរុបមានប្រមាណ ២.២០០ លានដុល្លារអាមេរិក ដែលស្មើនឹងប្រមាណជាង ១១៤% នៃផែនការប្រចាំឆ្នាំ ដែលបានកំណត់។ ពោលមានការកើនឡើងជាង ១៣%ធៀបនឹងឆ្នាំ២០១៧។
អត្ថបទទាក់ទង!
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារធ្លាប់បានអះអាងថា ការប្រមូលចំណូលពន្ធររបស់អគ្គនាយកដ្ឋានពន្ធដារ នៅរយៈពេល ៥ឆ្នាំ ចុងក្រោយនេះ ឃើញថា ចំណូលពន្ធដារ បានកើនឡើងក្នុងរង្វង់ ២០% ក្នុងមួយឆ្នាំ។
សូមបញ្ជាក់ដែរថា បើយើងនិយាយពីស្ថាប័នរដ្ឋប្រមូលចំណូលជូនជាតិសំខាន់ៗ ក្រៅពីអគ្គនាយកដ្ឋានពន្ធដារនេះ ក៏មានស្ថានប័នប្រមូលចំណូលមួយទៀតក៏សំខាន់ណាស់ដែរ គឺ អគ្គនាយកដ្ឋានគយ និងរដ្ឋាករ។ តួយ៉ាង របាយការណ៍ ប្រចាំឆ្នាំរបស់អគ្គនាយកដ្ឋានគយ និងរដ្ឋាករបានបង្ហាញឲ្យដឹងថា នៅឆ្នាំ២០១៨ ចំណូលពន្ធគយ ដែលប្រមូលបានមានជាង ២.៥០០ លានដុល្លារអាមេរិក ពោលគឺ មានខ្ពស់ជាង ចំណូលពន្ធដារ ៣០០ លានដុល្លារអាមេរិក។
បើយើងបូកចំណូលពន្ធដារ និងពន្ធគយកាលពីឆ្នាំ២០១៨ បញ្ចូលគ្នា ឃើញថា រដ្ឋប្រមូលចំណូលតាមរយៈស្ថាប័នជាតិទាំងពីរនេះ មានរហូតដល់ជិត ៥ពាន់ លានដុល្លារអាមេរិកឯណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
