យ៉ាងហោចណាស់ មានកិច្ចព្រមព្រៀងពាណិជ្ជកម្មសេរីធំៗចំនួន២ ដែលកម្ពុជាបាននិងកំពុងឈានទៅសម្រេចចុះហត្ថលេខាឆាប់ៗ និងត្រូវចូលជាធរមាននៅក្នុងឆ្នាំ២០២២ខាងមុខ។ ក្នុងនោះ បើមិនមានអ្វីប្រែប្រួលទេ រដ្ឋាភិបាលកម្ពុជា និងសាធារណរដ្ឋកូរ៉េ គ្រោងចុះហត្ថលេខាលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នៅដើមខែតុលា ឆ្នាំ២០២១ ខាងមុខនេះ បន្ទាប់ពីភាគីទាំងពីរបានចុះហត្ថលេខាបិទបញ្ចប់កិច្ចចរចាតាមប្រព័ន្ធអនឡាញកាលពីអំឡុងខែកុម្ភៈ កន្លងមក។ ឯកឧត្តម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មជឿជាក់ថា សេចក្ដីព្រាងច្បាប់ស្តីពី កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងអាចចូលជាធរមាននៅដើមឆ្នាំ២០២២ ក្នុងករណីកិច្ចព្រមព្រៀងនេះ ត្រូវបានចុះហត្ថលេខាតាមពេលវេលា ដែលបានគ្រោងគ្រោងទុក។
បើតាមឯកឧត្តម ប៉ែន សុវិជាតិ ប្រសិនបើស្ថានភាពនៃការឆ្លងរាលដាលជំងឺកូវីដ-១៩ នៅប្រទេសទាំងពីរមានភាពធូរស្បើយ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នឹងធ្វើដំណើរទៅចុះហត្ថលេខាលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នៅសាធារណរដ្ឋកូរ៉េផ្ទាល់តែម្តង។ ប៉ុន្តែបើស្ថានភាពកូវីដ-១៩ មិនអំណោយផលការចុះហត្ថលេខានឹងធ្វើឡើងតាមប្រព័ន្ធអនឡាញ។
ជុំវិញនឹងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េនេះដែរ នៅក្នុងជំនួបជាមួយឯកឧត្តម ឆុង អើយយ៉ុង រដ្ឋមន្ត្រីការបរទេសនៃសាធារណរដ្ឋកូរ៉េពេលទៅបំពេញទស្សនកិច្ចផ្លូវការនៅប្រទេសកូរ៉េ កាលពីពេលថ្មីៗនេះ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជាបានថ្លែងដោយឡើងឡើងពីក្ដីរំពឹងថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងជំរុញពាណិជ្ជ និងការវិនិយោគរវាងប្រទេសទាំងពីរឲ្យកាន់តែមានភាពល្អប្រសើរ ជាពិសេសជួយពន្លឿនការស្តារសេដ្ឋកិច្ចក្រោយវិបត្តិជំងឺកូវីដ-១៩។
អត្ថបទទាក់ទង
ក្នុងករណីកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ បានចូលជាធរមានមែននោះ វានឹងក្លាយជាកិច្ចព្រមព្រៀងពាណិជ្ជកម្មសេរីទីពីរ បន្ទាប់ពីកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលគ្រោងចូលជាធរមាននៅដើមឆ្នាំ២០២២ ខាងមុខនេះ បន្ទាប់ពីកិច្ចព្រមព្រៀងនេះទទួលបានការអនុម័តគាំទ្រពីរដ្ឋសភា។ ឯកឧត្តម ប៉ែន សុវិជាតិ បានបញ្ជាក់ថា ក្រោយកិច្ចព្រមព្រៀងពាណិជ្ជកម្មសេរីកម្ពុជា-ចិន បានចូលជាធរមាន ក្រសួងពាណិជ្ជកម្មនឹងរៀបចំសិក្ខាសាលា ដើម្បីផ្សព្វផ្សាយឲ្យធុរជន និងអ្នករកស៊ីយល់ដឹងកាន់តែទូលំទូលាយ ដើម្បីត្រៀមខ្លួនចាប់យកឱកាសទីផ្សារដ៏ធំមួយនេះ។
សូមបញ្ជាក់ថា ក្រោមកិច្ចព្រមព្រៀងពាណិជ្ជកម្មសេរីកម្ពុជា-ចិន កម្ពុជាអាចនាំចេញទំនិញជាង៣០០មុខទៅកាន់ទីផ្សារចិនដោយមិនចាំបាច់បង់ពន្ធ។ ថ្នាក់ដឹកនាំក្រសួងពាណិជ្ជកម្មរំពឹងថា កិច្ចព្រមព្រៀងនេះនឹងជួយជំរុញឲ្យការនាំចេញទំនិញរបស់កម្ពុជាទៅទីផ្សារចិនកើនឡើង២៥%បន្ថែមទៀត។
ដោយឡែក បើតាមការចុះផ្សាយរបស់ទីភ្នាក់ងារព័ត៌មានកូរ៉េខាងត្បូងយ៉ុនហាប់ ក្រោមកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងកិច្ចព្រមព្រៀងថ្នាក់តំបន់ RCEP កម្ពុជានឹងលើកលែងពន្ធប្រមាណ ៩៣.៨% នៃផលិតផលនាំចូលពីកូរ៉េខាងត្បូង ហើយកូរ៉េខាងត្បូងនឹងលើកលែងពន្ធប្រមាណ៩៥.៦% លើផលិផលរបស់កម្ពុជាផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
