មហោស្រពបច្ចេកវិទ្យាហិរញ្ញវត្ថុពិភពលោក ឆ្នាំ២០២០ គឺជាលំនាំថ្មីមួយទៀតនៃមហោស្រពបច្ចេកវិទ្យាហិរញ្ញវត្ថុសិង្ហបុរី (Singapore Fintech Festival) ដែលបានប្រារព្ធដំបូងគេកាលពីឆ្នាំទៅមិញ នៅប្រទេសសិង្ហបុរី ដោយមានអ្នកចូលរួម ៦ម៉ឺននាក់ មកពី ១៤០ប្រទេស ក្នុងនោះមានទាំងប្រមុខរដ្ឋ អ្នកធ្វើគោលនយោបាយ និងអ្នកដឹកនាំនៅក្នុងវិស័យហិរញ្ញវត្ថុនិងបច្ចេកវិទ្យា ។
មហោស្រពបច្ចេកវិទ្យាហិរញ្ញវត្ថុពិភពលោក (World Fintech Festival) រៀបចំដោយអាជ្ញាធររូបិយវត្ថុសិង្ហបុរី និង សហគ្រាសសិង្ហបុរី (Enterprise Singapore) នឹងមានទម្រង់ជាវេទិកាកូនកាត់ ដោយរួមមានកម្មវិធីអនឡាញ ២៤ម៉ោងមួយ អមដោយព្រឹត្តិការណ៍រណបចំនួនជាង ៤០ទៀត មកពីជុំវិញពិភពលោក ។ អ្នករៀបចំសង្ឃឹមថា គំរូកូនកាត់ថ្មីនេះនឹងផ្ដល់លទ្ធភាពដល់អ្នកចូលរួមកាន់តែប្រសើរជាងមុន ក្នុងការជួបជាមួយសហគមន៍ FinTech ពិភពលោក ។
អត្ថបទទាក់ទង
ធនាគារជាតិនៃកម្ពុជា, សមាគមធនាគារនៅកម្ពុជា, និងសមាគមសហព័ន្ធហិរញ្ញវត្ថុនិងបច្ចេកវិទ្យានៃកម្ពុជា (CAFT) នឹងធ្វើជាម្ចាស់ផ្ទះរៀបចំព្រឹត្តិការណ៍រណបពីកម្ពុជា ពីថ្ងៃទី៧ ដល់ថ្ងៃទី១១ ខែធ្នូ ឆ្នាំ២០២០ ដែលនឹងបង្ហាញកិច្ចពិភាក្សាតុមូល ដោយមានការចូលរួមពីវាគ្មិនជាតិនិងអន្តរជាតិ លើប្រធានបទនានា រាប់តាំងពីការលេចឡើងនូវរូបិយបណ្ណឌីជីថល, ផលប៉ះពាល់នៃបច្ចេកវិទ្យា 5G ក្នុងការពន្លឿនការអភិវឌ្ឍបច្ចេកវិទ្យាហិរញ្ញវត្ថុ រហូតដល់របៀបដែលបច្ចេកវិទ្យាហិរញ្ញវត្ថុអាចគាំទ្រវិស័យនានាដែលរងផលប៉ះពាល់ធ្ងន់ធ្ងរ ដោយជំងឺរាតត្បាតកូវីដ-១៩ ។
លោក Tomas Pokorny អគ្គលេខាធិការរបស់ CAFT បាននិយាយថា "ការជួបជុំគ្នានៃអ្នកជំនាញជាតិនិងអន្តរជាតិ នៅក្នុងមហោស្រពនេះ គឺជាឱកាសដ៏ល្អអស្ចារ្យសម្រាប់យើងទាំងអស់គ្នា ចែករំលែកបទពិសោធន៍ និងគំនិតនានា អំពីរបៀបដែលបច្ចេកវិទ្យាអាចជួយធ្វើឲ្យប្រសើរឡើងនៅក្នុងការរកប្រាក់ សន្សំប្រាក់ និងចាយប្រាក់របស់យើង ។"
លោក Tomas និយាយបន្តថា "វាគ្មិនមួយរូបដែលខ្ញុំចាប់អារម្មណ៍ជាពិសេស គឺ ប្រធានគម្រោងពិសេសរបស់ក្រុមហ៊ុន Safaricom មកពីប្រទេសកេនយ៉ា ដែលបានបង្កើតសេវាទូទាត់ប្រាក់តាមទូរសព្ទចល័តមួយ ឈ្មោះ M-Pesa ដែលបានក្លាយជាគំរូដ៏ជោគជ័យបំផុត នៅក្នុងធុរកិច្ចផ្នែកនេះ នៅតាមបណ្ដាប្រទេសកំពុងអភិវឌ្ឍ ។"
វាគ្មិន អ្នកចូលរួម និងអ្នកឧត្ថម្ភព្រឹត្តិការណ៍នេះ រួមមាន Prudential, Cellcard, True Money, Wing, AMK, CBC, Acleda, Kooming Bank, Ezecom, ABA Bank, PPCB, JTrust, KE, E-Money, Sabay និង QED ៕
