ថ្មីៗនេះ ក្រសួងសេដ្ឋកិច្ច និងហិរញ្ញវត្ថុ បាននិងកំពុងរៀបចំ ឯកសារទស្សនាទាន សម្រាប់ការបង្កើតសាជីវកម្មធានាឥណទាននៅកម្ពុជា ដែលភាសាអង់គ្លេសហៅថា Credit Guarantee ដែលវាគឺជាយន្ដការឆ្លើយតបបន្ទាន់មួយរបស់រាជរដ្ឋាភិបាល ដើម្បីគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ច ក្នុងដំណាក់កាលនៃវិបត្តិជំងឺកូវីដ-១៩ ក៏ដូចជាការស្ដារ និងជំរុញសេដ្ឋកិច្ចក្រោយពីវិបត្តិ
លោក ផល វ៉ានឌី នាយកប្រតិបត្តិសមាគមមីក្រូហិរញ្ញវត្ថុកម្ពុជា បានលើកឡើងថា វាគឺជាជំហានមួយល្អសម្រាប់ប្រទេសកម្ពុជាក្នុងការបង្កើតឲ្យមានយន្ដការ សាជីវកម្មធានាឥណទាននេះឡើង ដែលវាស្របទៅតាមបរិបទចាំបាច់នាអំឡុងពេលនៃវិបត្តិកូវីដ-១៩នេះ។ លោក បន្ថែមថា សាជីវកម្មធានាឥណទាន នឹងជួយគាំពារដល់ប្រាក់កម្ចីដែលគ្រឹះស្ថានហិរញ្ញវត្ថុ ផ្ដល់ទៅឲ្យអតិថិជន ដូច្នេះ វានឹងអនុញ្ញាតឲ្យគ្រឹះស្ថានហិរញ្ញវត្ថុអាចផ្ដល់ឥណទានបន្ថែម កាន់តែច្រើន និងទូលំទូលាយថែមទៀតទៅដល់ពលរដ្ឋដែលត្រូវការប្រាក់កម្ចី។
អត្ថបទទាក់ទង!
លោក ផល វ៉ាន់ឌី ពន្យល់បន្ថែមថា សាជីវកម្មធានាឥណទាននេះ នឹងជួយឲ្យគ្រឹះស្ថានអាចមានលទ្ធភាពច្រើនជាងមុនក្នុងការផ្ដល់កម្ចីទៅកាន់ពលរដ្ឋពិសេសអ្នកដែលប្រកបអាជីវកម្មខ្នាតតូចៗ ដោយកន្លងមក អាជីវកម្មរបស់ពួកគាត់ខ្លះមានហានិភ័យខ្ពស់ ឬពួកគាត់ មិនមានលក្ខខណ្ឌគ្រប់គ្រាន់តាមការតម្រូវពីគ្រឹះស្ថានហិរញ្ញវត្ថុដើម្បីអាចទទួលបានប្រាក់កម្ចីនោះទេ ប៉ុន្ដែ នៅពេលមានសាជីវកម្មធានាឥណទាននេះ មានន័យថា គ្រឹះស្ថានហិរញ្ញវត្ថុអាចនឹងមានលទ្ធភាពច្រើនជាងមុនក្នុងការផ្ដល់ប្រាក់កម្ចីជូនដល់ពលរដ្ឋដែលលំបាកនឹងទទួលបានឥណទានទាំងនោះ។ បន្ថែមពីនេះ លោក ផល វ៉ាន់ឌី បញ្ជាក់ថា សាជីវកម្មធានាឥណទាន ក៏ជាយន្ដការមួយ ជួយរក្សានូវនិរន្តរភាព សម្រាប់ការផ្ដល់ឥណទាននៅកម្ពុជា ក៏ដូចជាការលូតលាស់នៃវិស័យធនាគារ និងហិរញ្ញវត្ថុ នៅអំឡុងពេលវិបត្តិកូវីដ-១៩នេះ ក៏ដូចជាការស្ដារ និងជំរុញសេដ្ឋកិច្ចងើបឡើងវិញផងដែរ។
ក្រសួងសេដ្ឋកិច្ច និងហិរញ្ញវត្ថុ បានអះអាងដែរថា សាជីវកម្មធានាឥណទានកម្ពុជា ឬហៅថា Credit Guarantee នេះ នឹងមានតួនាទី ផ្ដល់សេវាធានាឥណទានដល់ក្រុមហ៊ុនអាជីវកម្ម ធុរកិច្ច នៅក្នុងវិស័យអាទិភាព ដែលទទួលរងផលប៉ះពាល់ធ្ងន់ធ្ងរពីវិបត្តិកូវីដ-១៩ ដើម្បីបង្កើនលទ្ធភាពទទួលបានហិរញ្ញប្បទានសម្រាប់ជាទុនបង្វិលរបស់ក្រុមហ៊ុនទាំងនោះ សំដៅធានានិរន្តរភាព និងសម្របទៅតាមបរិបទថ្មី នៃធុរកិច្ចបន្ទាប់ពី វិបត្តិជំងឺកូវីដ-១៩។
នាយកប្រតិបត្តិសមាគមមីក្រូហិរញ្ញវត្ថុកម្ពុជា គូសបញ្ជាក់ទៀតថា ចំពោះការផ្ដល់ឥណទានរបស់គ្រឹះស្ថានមីក្រូហិរញ្ញវត្ថុនៅក្នុងឆមាសទី១ នៅឆ្នាំ ២០២០នេះ ហាក់មានការធ្លាក់ចុះបន្តិច ប៉ុន្ដែ លោកជឿជាក់ថា សម្រាប់ឆមាសទី២ នៅឆ្នាំនេះ តម្រូវការឥណទាន នឹងមានការងើបឡើងប្រសើរឡើងវិញ ដោយសារតែរាជរដ្ឋាភិបាលបានបន្ធូរបន្ថយការរឹតបន្ដឹងជាបណ្ដើរៗតាមរយៈការអនុញ្ញាតឲ្យអាជីវកម្មមួយចំនួនបើកដំណើរការឡើងវិញ។
គួរបញ្ជាក់ដែរថា តាមរបាយការណ៍ ពីធនាគារជាតិនៃកម្ពុជា នៅឆមាសទី ១ នៅឆ្នាំ២០២០នេះ ស្ថានភាពប្រព័ន្ធធនាគារនៅកម្ពុជា នៅតែរក្សាបាននូវកំណើនវិជ្ជមានដោយក្នុងនោះ ឥណទានអតិថិជនកើនឡើងជិត ២០% ដែលមានទំហំទឹកប្រាក់ជាង ៣៤ពាន់លានដុល្លារ ខណៈដែលប្រាក់បញ្ញើអតិថិជនវិញបានកើនឡើងជាង ១២% ដែលមានទំហំទឹកប្រាក់ ៣០.៥០០ លានដុល្លារអាមេរិក។ ជាមួយគ្នានេះ គ្រឹះស្ថានធនាគារ និងហិរញ្ញវត្ថុ ទទួលបានគណនីឥណទានអតិថិជន កើនដល់ ៣,២លានគណនី កើនឡើង ១៣% ខណៈដែលគណនីអ្នកដាក់ប្រាក់បញ្ញើមានដល់ ៨,២លានគណនី កើន ២០%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
