ការនំាចេញ-នាំចូលទំនិញកម្ពុជាថមថយកម្លាំងក្នុងឆ្នាំ២០១៦
ព័ត៌មាន
•
ឆ្នាំ២០១៦មួយឆ្នាំពេញ ការនំាចេញ-នាំចូលទំនិញសរុបរបស់កម្ពុជា ជាមួយនឹងបណ្តាប្រទេសជាដៃគូនៅលើពិភពលោក ហាក់មានកំណើ…
រយៈពេល១ឆ្នាំពេញ ២០១៦ វិស័យទេសចរណ៍កម្ពុជាហាក់បីដូចជាមិនមានសន្ទុះកើនឡើងខ្លាំងដូចបណ្តាឆ្នាំមុនៗឡើយ។ បើតាមការបញ្ជាក់អះអាងពីរដ្ឋមន្រ្តីក្រសួងទេសចរទេសណ៍ ថា ចំនួនភ្ញៀវទេសចរបរទេសដែលមកទស្សនាកម្ពុជា ក្នុងឆ្នាំ២០១៦ មានចំនួនប្រមាណជិត ៥លាននាក់ បើធៀបនឹងរយៈពេលដូចគ្នា កាលពីឆ្នាំ២០១៥ ចំនួនភ្ញៀវទេសចរអន្តរជាតិ មានប្រមាណ៤លាន៧សែននាក់ ពោលគឺកើនឡើងតែ ៥ភាគរយប៉ុណ្ណោះ។ នេះគឺជាការកើនឡើងតិចតួច ដែលមិនធ្លាប់មាននៅក្នុងរយៈពេល១០ឆ្នាំកន្លងមកនេះ។
ចំណែកទឹកបា្រក់ដែលកម្ពុជារកចំណូលបានមកពីឧស្សាហកម្មទេសចរណ៍ក្នុងឆ្នាំ២០១៦ មានចំនួនប្រមាណ ៣ពាន់២០០លានដុល្លារអាមេរិក លើសពីឆ្នាំមុន ១០០លានដុល្លារតែប៉ុណ្ណោះ ដែលមានទឹកប្រាក់ប្រមាណ ៣ពាន់១០០លានដុល្លារអាមេរិក។
ក្រុមអ្នកជំនាញនៅក្នុងវិស័យទេសចរណ៍បានអះអាងថា ការកើនឡើងយឺតនៃភ្ញៀវទេសចរមកទស្សនាប្រទេសកម្ពុជា គឺដោយសារមូលហេតុមួយចំនួនដូចជា ការរឹតត្បិតការចំណាយរបស់ប្រជាជនក្នុងពិភពលោក ខណៈកំណើនសេដ្ឋកិច្ចពិភពលោកក្នុងឆ្នាំ២០១៦ ហាក់បីដូចជាមិនមានភាពប្រាកដប្រជានោះទេ ពោលគឺកើនឡើងយឺត និងទីពីរ គឺការភ័យខ្លាចរអាពីក្រុមភេរវករដែលតែងតែធ្វើសកម្មភាពបំផ្ទុះគ្រាប់បែក និងទីបី ភ័យខ្លាចជំងឺឆ្លងផ្សេងៗមួយចំនួន។ល។
ទេសចរបរទេសមកទស្សនាកម្ពុជាកើនឡើងបន្តិចបន្តួចក្នុងឆ្នាំ២០១៦។
ទោះបីយ៉ាងណាក៏ដោយ លោក ថោង ខុន រដ្ឋមន្ត្រីក្រសួងទេសចរណ៍ បានអះអាងថា វិស័យទេសចរណ៍នៅតែជាវិស័យនាំមុខមួយក្នុងការជំរុញកំណើនសេដ្ឋកិច្ចជាតិ ពោលគឺបាននិងកំពុងធ្វើឲ្យវិស័យដទៃទៀតកើនឡើងទៅតាមនោះដែរ។ ដូច្នេះ បើកាលណាចំនួនភ្ញៀវទេសចរអន្តរជាតិចូលមកកាន់តែច្រើន យើងចាំបាច់ត្រូវការការអភិវឌ្ឍបន្ថែមលើគ្រប់វិស័យ រួមមាន វិស័យហេដ្ឋារចនាសម្ព័ន្ធ ពង្រីកការអភិវឌ្ឍកំពង់ផែ និងពង្រីកការផលិតទំនិញកសិកម្មបន្ថែមជាដើម។
លោក ថោង ខុន រំពឹងថា តាមផែនការនៅឆ្នាំ២០១៧ កម្ពុជានឹងអាចទាក់ទាញភ្ញៀវទេសចរបរទេស កើនដល់ ៥លាន៥សែននាក់ និងរំពឹងថា ឆ្នាំ២០២០ អាចទាក់ទាញទេសចរបាន ៧លាននាក់។ លោកបន្តថា កន្លងមក ទិសដៅទេសចរដែលមកទស្សនាកម្ពុជាប្រមាណ ៧៧ភាគរយ មកពីអាស៊ីប៉ាស៊ីហ្វិក ១៨ភាគរយ មកពីអឺរ៉ុប ៧ភាគរយមកពីអាមេរិក។
កម្ពុជាត្រូវពង្រឹងនិងពង្រីកវិស័យហេដ្ឋារចនាសម្ព័ន្ធដឹកជញ្ជូនសម្រាប់ទាក់ទាញភ្ញៀវទេសចរ
ជាមួយគ្នានេះដែរ ក្រុមអ្នកជំនាញទេសចរណ៍ពិភពលោក បានអះអាងថា ប្រទេសកម្ពុជាមានសក្តានុពលខ្លាំងផ្នែកទេសចរណ៍ដោយសារកម្ពុជាមានវប្បធម៌ដ៏សំបូរបែប សំណង់បុរាណ ធម្មជាតិ ដែលធ្វើឲ្យភ្ញៀវទេសចរមិនត្រឹមតែមកទេសចរណ៍ប៉ុណ្ណោះទេ ថែមទាំងមានការផ្សារភ្ជាប់ខ្លួនទៅនឹងវប្បធម៌របស់កម្ពុជាទៀតផង។
ប៉ុន្តែអ្វីដែលកម្ពុជាគួរធ្វើនៅពេលនេះតទៅ គឺការពង្រឹងនិងពង្រីកវិស័យហេដ្ឋារចនាសម្ព័ន្ធនិងដឹកជញ្ជូនសម្រាប់ទាក់ទាញភ្ញៀវទេសចរកាន់តែច្រើនថែមតៀត។
លោកស្រី ផាន់ ស៊ី ហូ អគ្គលេខាធិការនៃវេទិកាទេចរណ៍សេដ្ឋកិច្ចសកល បានកត់សំគាល់ឃើញថា ការអភិវឌ្ឍបន្ថែមលើហេដ្ឋារចនាសម្ព័ន្ធ និង ការតភ្ជាប់បណ្តាញដឹកជញ្ជូន គឺជាអ្វីដែលកម្ពុជាត្រូវយកចិត្តទុកដាក់ធ្វើបំផុត។ ហើយកម្ពុជាត្រូវការចំណេះ ជំនាញ បទពិសោធន៍ ដើម្បីធ្វើយ៉ាងណាឲ្យអ្នកទេសចរដែលចូលមកទស្សនាប្រទេសកម្ពុជាចំណាយពេលវេលាស្នាក់នៅរយៈពេលយូរ និងធ្វើឲ្យពួកគាត់មានអារម្មណ៍ចង់ត្រលប់មកទស្សនាកម្ពុជាម្តងទៀត។
លោកស្រីលើកឧទាហរណ៍ពីទីក្រុងម៉ាកាវជាទីកោះតូចមួយ ប៉ុន្តែមានការតភ្ជាប់ជាពិភពលោកជាច្រើន និង បានពង្រឹងលើបទពិសោធន៍អ្នកទេសចរណ៍លើផ្នែកសិល្បៈ វប្បធម៌ លើវិស័យសណ្ឋាគារ និងទេសចរណ៍ ដែលអាចទាក់ទាញភ្ញៀវទេសចរបាន ៣០លាននាក់ ជាមួយនឹង ចំណូលបានពីវិស័យទេសចរណ៍ប្រមាណជាង ៦ពាន់លានដុល្លារ ក្នុងឆ្នាំ២០១៥ និង ៣០ពាន់លានដុល្លារ បានមកពីចំណូលវិស័យកាស៊ីណូ។
កម្ពុជារំពឹងខ្ពស់ពីភ្ញៀវទេសចរចិនក្នុងឆ្នាំ២០២០
សម្រាប់ឆ្នាំ២០២០ កម្ពុជាកំពុងត្រៀមទទួលភ្ញៀវចិន ខណៈចិនប្រកាសថា ភ្ញៀវទេសចរចិនចេញក្រៅប្រទេសប្រមាណ ២០០លាននាក់នៅក្នុងពិភពលោក ខណៈបច្ចុប្បន្នភ្ញៀវចិនក្នុងទីផ្សារអាស៊ានទើបមាន២០លាននាក់ ក្នុងនោះកម្ពុជាទើបទទួលភ្ញៀវចិនបាន ៧០ម៉ឺននាក់ប៉ុណ្ណោះ ដូច្នេះឆ្នាំនេះភ្ញៀវចិនមកកម្ពុជាប្រមាណ ៩០ម៉ឺននាក់ ប៉ុន្តែ បើតាមផែនការឆ្នាំ២០២០ កម្ពុជានឹងអាចទាក់ទាញភ្ញៀវចិនឲ្យបាន២លាននាក់។
របាយការណ៍អង្គការទេសចរណ៍ពិភពលោក បង្ហាញថា នៅទូទាំងពិភពលោកមានភ្ញៀវធ្វើដំណើរទេសចរណ៍សរុប ១ពាន់២រយលាននាក់ និងមានការរំពឹងទុកថា នឹងកើនឡើងនៅចន្លោះ ៥ភាគរយជារឿងរាល់ឆ្នាំ។
ចំនួនភ្ញៀវទេសចរដ៏ច្រើននេះបានផ្តល់ឱកាសជាច្រើនសម្រាប់ប្រទេសជាគោលដៅទេសចរណ៍។ ចំណែកឯកម្ពុជាវិញ គេរំពឹងថា នឹងទទួលបានភ្ញៀវទេសចរប្រមាណ ៧លាន៥សែននាក់ក្នុងឆ្នាំ២០២០៕
អត្ថបទដោយ ពុទ្ធិកា រង្សី។ លោកអ្នកអាចទាក់ទងមកម្ចាស់អត្ថបទដោយអ៊ីម៉េលមកកាន់ [email protected]។
រូបភាពកាំជ្រួចក្នុងពិធីបុណ្យអុំទូក យកមកពីគេហទំព័រហ្វេសប៊ុកនាយករដ្ឋមន្ត្រីកម្ពុជា។
រូបភាពទេសចរនៅមុខអង្គរវត្ត យកមកពីទីភ្នាក់ងារព័ត៌មានជាតិ AKP។
