ក្រុមអ្នកជំនាញបានបង្ហាញការយល់ឃើញថា ការធ្លាក់ចុះនៃការនាំចេញរបស់កម្ពុជា ទៅកាន់ទីផ្សារអន្តរជាតិ មិនមែនជាបញ្ហាថ្មីនោះទេ ក្រោយពិភពលោកបានជួបនូវបញ្ហាប្រឈមជាបន្តបន្ទាប់ ជាពិសេស វិបតិ្តជំងឺកូវីដ១៩ បញ្ហាសង្រ្គាមនៅអ៊ុយក្រែន និងបញ្ហាសាកលផ្សេងៗទៀត។ ឧកញ៉ា លឹម ហេង អនុប្រធានសភាកម្ពុជា បានកត់សម្គាល់ឃើញថា បញ្ហាប្រឈមដែលធ្វើឲ្យការនាំចេញរបស់កម្ពុជា បន្តធ្លាក់ចុះនៅត្រីមាសទី១ឆ្នាំ២០២៣នេះ ព្រោះតែឥទ្ធិពលនៃវិបត្តិពិភពលោកនៅតែបន្តអូសបន្លាយ ដែលធ្វើឲ្យការបញ្ជាទិញរបស់កម្ពុជាពីទីផ្សារគោលដៅត្រូវថយចុះ ជាពិសេសទីផ្សារអឺរ៉ុប និងសហរដ្ឋអាមេរិកតែម្ដង ដែលជាទីផ្សារគោលដៅដ៏ធំរបស់កម្ពុជា។
ជាមួយគ្នានោះ លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ច និងប្រធានមជ្ឈមណ្ឌលសិក្សាចិននៃរាជ្យបណ្ឌិតសភាកម្ពុជា បានយល់ឃើញថា ការធ្លាក់ចុះនៃការនាំចេញទំនិញកម្ពុជា ទៅកាន់ទីផ្សារអន្តរជាតិ មិនមែនជាបញ្ហាថ្មីសម្រាប់កម្ពុជា នោះទេ ហើយបញ្ហានេះ ក៏បានកើតឡើងដោយសារតែវិបត្តិសង្រ្គាមរុស្សី និងអ៊ុយក្រែន ផងដែរ ដែលបានធ្វើឲ្យការផ្គត់ផ្គង់នូវប្រព័ន្ធសេដ្ឋកិច្ចសាកល ត្រូវបែកខ្ញែកចេញពីគ្នា និងធ្វើឲ្យពិភពលោកកើតមាននូវអតិផរណា។
អត្ថបទគួរអាន
បើតាមបណ្ឌិត ហុង វណ្ណៈ កត្តានេះ បានធ្វើឲ្យប្រាក់ចំណូលនិងការចំណាយរបស់ប្រជាពលរដ្ឋមិនមានសមតុល្យ ហើយវាបានប៉ះពាល់ដល់ខ្សែចង្វាក់ផ្គត់ផ្គង់របស់បណ្ដាក្នុងតំបន់ ក៏ដូចជា ពិភពលោក រួមទាំងកម្ពុជា ផងដែរ។ ម្យ៉ាងវិញទៀត ការធ្វើពាណិជ្ជកម្មរបស់កម្ពុជា គឺពឹងផ្អែកទៅលើកត្តា២យ៉ាង គឺការវិនិយោគដោយធុរៈជននៅក្នុងស្រុក និងវិនិយោគិនផ្ទាល់ពីបរទេស ក៏ប៉ុន្តែ នៅពេលពិភពលោកមានការបែងចែករវាងតំបន់ពាណិជ្ជកម្មអាមេរិក និងចិន វាក៏អាចប៉ះពាល់ដល់ប្រព័ន្ធផលិតកម្មរបស់កម្ពុជាដូចគ្នាដែរ។
សូមបញ្ជាក់ថា នៅត្រីមាសទី១ឆ្នាំនេះ សហរដ្ឋអាមេរិក គឺជាទីផ្សារដ៏ធំជាងគេសម្រាប់ការនាំចេញរបស់កម្ពុជា ដែលមានទំហំទឹកប្រាក់ប្រមាណ ១ពាន់៨រយលានដុល្លារ ពោលគឺ បានក្ដោបចំណែកទីផ្សារជាង ៣៣% នៃការនាំចេញសរុបរបស់កម្ពុជា។ បន្ទាប់មកគឺប្រទេសវៀតណាម ស្ថិតក្នុងចំណាត់ថ្នាក់លេខ២ ដោយបានក្ដោបចំណែកទីផ្សារជិត ១៧% ក្នុងទំហំទឹកប្រាក់ជិត ១ពាន់លានដុល្លារ។ ខណៈចិនគឺជាទីផ្សារធំទី៣ ដែលបានក្ដោបចំណែកទីផ្សារជាង ៦% និងបាននាំចេញក្នុងទំហំទឹកប្រាក់ជាង ២៣៨លានដុល្លារ។ នេះបើយោងតាមរបាយការណ៍របស់អគ្គនាយកដ្ឋានគយនិងរដ្ឋាករកម្ពុជា៕
