មេ CDC អះអាងថា កម្ពុជានៅបន្តទទួលបានគម្រោងវិនិយោគ ទោះបីកូវីដ-១៩ តាមរំខាន!

ថ្នាក់ដឹកនាំជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជា (CDC) អះអាងថា បើទោះបីជាមានការរីករាលដាលនៃជំងឺកូវីដ ១៩ ដែលធ្វើឲ្យមានការរំខានដល់សេដ្ឋកិច្ចសកល ក៏ដូចជាកម្ពុជា យ៉ាងណាក្តី ក៏កម្ពុជានៅតែទទួលបានគម្រោងវិនិយោគថ្មីៗ មកបណ្តាក់ទុនជាបន្តបន្ទាប់ ពោលគឺជារៀងរាល់សប្តាហ៍ តែងតែមានសំណើសុំវិនិយោគរបស់អ្នកវិនិយោគមកកាន់ក្រុមប្រឹក្សាអភិវឌ្ឍន៍កម្ពុជាដើម្បីធ្វើការអនុម័តជាហូរហែ។

ឯកឧត្ដម សុខ ចិន្ដាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា ថ្លែងក្នុងពិធីសម្ពោធផ្សារ ម៉ាក្រូ ថ្ងៃទី១៧ ធ្នូ ២០១៧។ រូបភាព៖ ហេង ភារម្យ

ឯកឧត្តម សុខ ចិន្តាសោភា ប្រតិភូរាជរដ្ឋាភិបាលទទួលបន្ទុកជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC)បានលើកឡើងនាពេលថ្មីៗនេះថា កម្ពុជាបច្ចុប្បន្ននូវតែទទួលបានអ្នកវិនិយោគមកស្នើសុំធ្វើគម្រោងវិនិយោគ ជាបន្តបន្ទាប់ដដែល សម្រាប់រយៈពេលប៉ុន្មានខែចុងក្រោយនេះ បើទោះបីជាមានការរាតត្បាតនៃជំងឺកូវីដ-១៩ នៅបន្ដក៏ដោយ ក៏និន្នាការនៃការស្នើសុំវិនិយោគនឹងនៅតែបន្តមានជាហូរហែរដូចកាលពីឆ្នាំ២០១៩ និងឆ្នាំ២០១៨ កន្លងទៅដែរ។

ឯកឧត្តម សុខ ចិន្តាសោភា បន្តទៀតថា តាមរយៈការដាក់ពាក្យស្នើសុំនាំចូលនូវវត្ថុធាតុដើមសម្រាប់បម្រើការងារវិនិយោគនៅតែដំណើរការមិនមានការថមថយនោះឡើយ ប៉ុន្តែឯកឧត្តមក៏ទទួលស្គាល់ថា វិស័យទេសចរណ៍កំពុងរងផលប៉ះពាល់ខ្លាំងជាងគេពីជំងឺកូវីដ ១៩ និង ក្រៅពីនោះ វិស័យផលិតកម្មផ្សេងៗដូចជាការកែច្នៃកសិផលជាដើមគឺមិនទាន់ទទួលរងផលប៉ះពាល់ខ្លាំងក្លាប៉ុន្មាននោះឡើយ៕