ស្របពេលដែលភាពតានតឹងបញ្ឆេះដោយជម្លោះពាណិជ្ជកម្មកើនឡើងឥតស្រាកស្រាន្ត រវាង ចិន និងរដ្ឋការលោកប្រធានាធិបតី ដូណាល់ ត្រាំ សហរដ្ឋអាមេរិកបានក្រើនរំឭកដល់បណ្ដាប្រទេសកំពុងអភិវឌ្ឍន៍ ជាពិសេស ប្រទេសនៅក្នុងទ្វីបអាមេរិក ឡាទីន ឲ្យប្រយ័ត្នប្រយែងចំពោះផែនការជំរុញសេដ្ឋកិច្ចរបស់ក្រុងប៉េកាំង។
សារព័ត៌មានពិភពលោក AFP ថ្មីៗនេះ ផ្សាយដោយដកស្រង់សម្ដីរបស់រដ្ឋមន្ត្រីការបរទេសអាមេរិក លោក Mike Pompeo ដែលនិយាយថា សហរដ្ឋអាមេរិកស្វាគមន៍«ការប្រកួតប្រជែងផ្នែកពាណិជ្ជកម្មជាមួយចិន ដោយឈរលើមូលដ្ឋានភាពត្រឹមត្រូវ និងបដិការ» ប៉ុន្តែ «នៅពេលដែលចិនបង្ហាញខ្លួនជាមួយនឹងការសូកប៉ាន់មេដឹកនាំជាន់ខ្ពស់នៅតាមបណ្ដាប្រទេសនានា ជាថ្នូរនឹងគម្រោងហេដ្ឋារចនាសម្ព័ន្ធ ដែលនឹងបង្កផលប៉ះពាល់ដល់ប្រជាជននៃប្រទេសនោះ ខ្ញុំគិតថា គំនិតនៃការកសាងអាណាចក្របែបនេះ គឺមិនល្អទេ សម្រាប់ប្រទេសនីមួយៗ»។
លោករដ្ឋមន្ត្រីការបរទេស Pompeo ថ្លែងថា «ការជំរុញផ្នែកសេដ្ឋកិច្ចរបស់ចិន ពិតណាស់ គឺជាហានិភ័យចំពោះផលប្រយោជន៍របស់សហរដ្ឋអាមេរិក ហើយយើងនឹងប្រឆាំងនឹងហានិភ័យនេះ នៅគ្រប់ច្រកល្ហក»។ លោក Pompeo បន្ថែមថា ចិនទើបតែដើរបាចលុយជុំវិញពិភពលោកកាន់តែច្រើនឡើងៗ នៅក្នុងរយៈពេល ២ ទៅ ៣ឆ្នាំកន្លងទៅថ្មីៗនេះប៉ុណ្ណោះ។
តើអ្នកបានអានអត្ថបទនេះ ឬនៅ?
កាលពីឆ្នាំ២០១៥ លោកប្រធានាធិបតីចិន ស៊ីន ជិនពីង បានសន្យាទឹកប្រាក់វិយោគផ្ទាល់ ២៥០ពាន់លានដុល្លារអាមេរិក នៅក្នុងតំបន់អាមេរិក ឡាទីន និងសមុទ្រការីអ៊ីប និងពីរដងច្រើនជាងនេះថែមទៀត ជាពាណិជ្ជកម្ម ដែលមានន័យថា ចិននឹងជំនួសអាមេរិកក្នុងតំណែងជាដៃគូសេដ្ឋកិច្ចធំបំផុត នៅក្នុងប្រទេសមួយចំនួន។
ប្រទេសចិនថ្លែងការពារគោលនយោបាយពាណិជ្ជកម្មរបស់ខ្លួន ថា គឺដើម្បីផលប្រយោជន៍ទៅវិញទៅមក និងនិយាយថា ខុសពីមហាអំណាចលោកខាងលិច ចិននឹងមិនជ្រៀតជ្រែកកិច្ចការផ្ទៃក្នុងរបស់ប្រទេសផ្សេងទេ។
ប៉ុន្តែ អ្នករិះគន់និយាយថា ផលប្រយោជន៍របស់ចិននៅអាមេរិក ឡាទីន និងអាហ្វ្រិក ស្ទើរតែទាំងអស់ គឺពាក់ព័ន្ធនឹងអាជីវកម្មលើធនធានធម្មជាតិ ឬបើមិនដូច្នេះទេ គឺដើម្បីតែលើកកម្ពស់សេដ្ឋកិច្ចរបស់ខ្លួន ដោយមិនគិតពីប្រយោជន៍របស់កម្មករក្នុងស្រុក ឬការលូតលាស់រយៈពេលវែងរបស់សាមីប្រទេសឡើយ៕
