ចាប់តាំងពីខែមករាមក អឺរ៉ុបបានកំណត់យកពន្ធលើអង្ករនាំចូលពីកម្ពុជា និងមីយ៉ាន់ម៉ា សម្រាប់រយ:ពេល៣ឆ្នាំ។ ឆ្នាំទី១ គឺឆ្នាំ២០១៩នេះ ពន្ធគយត្រូវបានកំណត់ក្នុងតម្លៃ ១៧៥ អឺរ៉ូ ឬស្មើនឹងប្រមាណ ២០០ដុល្លារអាមេរិកក្នុងអង្ករមួយតោន។ នៅឆ្នាំទី២ ពន្ធត្រូវបានកំណត់ មកនៅត្រឹម ១៥០ អឺរ៉ូ ឬស្មើនឹងជាង ១៧០ដុល្លារអាមរិក និងឆ្នាំទី៣ ការដកហូតពន្ធនឹងថយចុះមកនៅ ១២៥ អឺរ៉ូ ឬស្មើនឹងជាង ១៤០ ដុល្លារអាមេរិក នៅក្នុងអង្ករមួយតោន។
ការយកពន្ធនេះមានគោលបំណងដើម្បីការពារអ្នកផលិតអង្កររបស់អឺរ៉ុប បន្ទាប់ពីមានការតវ៉ាពីប្រទេសមួយចំនួន រូមមាន ប្រទេសអ៊ីតាលី ដោយសារតែមានការកើនឡើងខ្លាំងនៃការនាំចូលអង្ករពីប្រទេសកម្ពុជានិងមីយ៉ាន់ម៉ា។
យោងតាមតួលេខពីលេខាធិការដ្ឋានច្រកចេញចូលតែមួយ ការនាំចេញអង្ករទៅកាន់ប្រទេសចិនបានកើនឡើង ៦៦ភាគរយ ក្នុងរយៈពេល ៦ខែ នៃឆ្នាំនេះ ដោយមានចំនួន ១១៨ ៤០១ តោន ខណៈដែលការនាំចេញអង្ករសរុបរបស់កម្ពុជាបានកើនឡើង ៣,៧ភាគរយ ឬស្មើនឹង ២៨១.៥៣៨តោន។
អត្ថបទទាក់ទង
ក្នុងរយៈពេលដូចគ្នានៃឆ្នាំនេះដែរ ការនាំចេញអង្ករទៅសហភាពអឺរ៉ុបបានធ្លាក់ចុះ ៣២ភាគរយ គឺមានចំនួនតែគឺ ៩៣.៥០៣តោន តែប៉ុណ្ណោះ។
លោក កាន់ គន្ធី អនុប្រធានក្រុមហ៊ុននាំចេញអង្ករ Amru Rice (Cambodia) Co Ltd, បាននិយាយថា ប្រទេសអូស្រ្តាលីក៏បានក្លាយជាទីផ្សារថ្មីមួយផងដែរ សម្រាប់អង្ករកម្ពុជា។ លោកបានអះអាងថា ក្រុមហ៊ុនលោកបានក្លាយជាអ្នកផ្គត់ផ្គង់តែមួយគត់សម្រាប់ក្រុមហ៊ុននាំចូលអង្ករអូស្រ្តាលី កាលពីឆ្នាំមុន។
លោក កាន់ គន្ធី បាននិយាយដូច្នេះថា ៖ «តាមពិតទៅ Amru បានធ្វើការជាមួយក្រុមហ៊ុននាំចូលអង្ករធំបំផុតមួយរបស់អូស្ត្រាលី អស់រយៈពេលពីរឆ្នាំមកហើយ (SunRice)។ យើងទើបតែអាចចុះកិច្ចព្រមព្រៀងនេះកាលពីចុងឆ្នាំមុន។»
លោក កាន់ គន្ធី បានរំពឹងថា នឹងអាចនាំចេញប្រហែលជា ៦ម៉ឺនតោននៅឆ្នាំនេះ។
យោងតាមលេខាធិការដ្ឋានច្រកចេញចូលតែមួយ ការនាំចេញទៅអូស្ត្រាលីបានកើនឡើងដល់ ៨០៣៥តោននៅក្នុងឆមាសទីមួយនៃឆ្នាំនេះ។
លោក កាន់ គន្ធី បាននិយាយផងដែរថា ការយកពន្ធលើអង្ករកម្ពុជា មានន័យថា អង្កររបស់កម្ពុជាមិនមានការប្រកួតប្រជែងទៀតទេ នៅផ្សារអឺរ៉ុប។
លោក កាន់ គន្ធី បាននិយាយដូច្នេះថា ៖ «ការបាត់បង់ទីផ្សារមិនដែលល្អទេ ប៉ុន្តែ រឿងល្អគឺថា យើងរកទីផ្សារផ្សេងបាន»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
