ជាក់ស្តែង ក្រុមហ៊ុនចិន SAIC Motor បានបញ្ចប់ការសាងសង់ដំណាក់កាលទី១ របស់ខ្លួន លើគម្រោងបង្កើតរោងចក្រផលិតរថយន្តធំជាងគេបង្អស់ ដែលដំណាក់កាលដំបូងនេះ ចាយទុនប្រមាណ ២ពាន់ ៨រយលានដុល្លារអាមេរិក ហើយមានមូលដ្ឋាននៅក្នុងតំបន់ឆ្នេរភាគអាគ្នេយ៍នៃប្រទេសចិន។
គម្រោងដំណាក់ទី១នេះ ចាប់ផ្តើមកាលពីខែមេសា ឆ្នាំ២០១៨ កន្លងទៅ ហើយបន្ទាប់ពីបញ្ចប់ ក្រុមហ៊ុន SAIC Motor មានសមត្ថភាពផលិតរថយន្ត ៣សែនគ្រឿង ក្នុងមួយឆ្នាំ រីឯតម្លៃទិន្នផលប្រចាំឆ្នាំ ដែលសម្រេចបានវិញនោះ នឹងលើស ៧ពាន់លានដុល្លារអាមេរិក។
អត្ថបទទាក់ទង
លោក វ៉ូ លីមីន ប្រធានដឹកនាំគម្រោងគាំទ្ររបស់ក្រុមហ៊ុន SIAC Motor បានឲ្យដឹងថា ក្រុមហ៊ុនចាប់ផ្តើមដំឡើងសម្ភារៈ និងធ្វើតេស្តសាកល្បង ហើយកន្លែងដំឡើងរថយន្តនឹងចាប់ផ្តើមដំណើរការនៅដំណាច់ខែកញ្ញានេះ។
លោកបន្តថា នៅពេលរោងចក្រនៅតំបន់ឆ្នេរភាគអាគ្នេយ៍នេះបញ្ចប់គម្រោងសាងសង់ទាំងស្រុងនោះ វានឹងជួយជំរុញដល់ខ្សែចង្វាក់វិស័យឧស្សាហកម្មរថយន្តទាំងស្រុង ជាពិសេស ជួយដល់ការបង្កើនប្រសិទ្ធភាពឧស្សាហកម្មក្នុងតំបន់ ដោយរួមមាន ការកែលម្អរថយន្ត ដំឡើងម៉ាស៊ីន និងផលិតគ្រឿងបង្គុំ។
សូមបញ្ជាក់ដែរថា សម្រាប់ដំណាក់កាលទី២ នៃគម្រោងនេះ រំពឹងនឹងទទួលបានទិន្នផលប្រចាំឆ្នាំ ដូចទៅនឹងដំណាក់កាលទី១ដែរ សរុបមក គឺអាចបង្កើតទិន្នផលបាន ១៤ពាន់លានដុល្លារអាមេរិក ក្នុងមួយឆ្នាំ ហើយគម្រោងនេះ នឹងក្លាយជាគម្រោងធំជាងគេបង្អស់នៅតំបន់ឆ្នេរភាគអាគ្នេយ៍នៃប្រទេសចិន ដែលអាចផ្គត់ផ្គង់ទីផ្សារអាស៊ីអាគ្នេយ៍ថែមទៀតផង៕
