នៅក្នុងរបាយការណ៍របស់ ការិយាល័យស្ថិតិជាតិនៃប្រទេសចិន គូសបញ្ជាក់ឲ្យឃើញថា ប្រទេសមហាអំណាចសេដ្ឋកិច្ចមួយនេះ បានប្រឈមមុខនឹងការបិទទីក្រុងយ៉ាងទូលំទូលាយ ដើម្បីទប់ស្កាត់ការឆ្លងរីករាលដាលនៃ មេរោគកូវីដ១៩ ដែលជាលទ្ធផល GDP របស់ចិន សម្រេចបាន ២,៩ទ្រីលានដុល្លារអាមេរិក ធ្លាក់ចុះខ្លាំងរហូតដល់ទៅ ៦,៨%។
របាយការណ៍ដដែលបានបង្ហាញទៀតថា នៅក្នុងខែមីនា កន្លងទៅនេះ សេដ្ឋកិច្ចចិន នៅតែស្ថិតក្រោមសម្ពាធធ្ងន់ធ្ងរ ដោយវិស័យឧស្សាហកម្ម និងវិស័យលក់រាយ បានធ្លាក់ចុះយ៉ាងខ្លាំង បន្ទាប់ពីដួលរលំ នៅក្នុងខែមករា និងខែកុម្ភៈ។
លើសពីនេះ ក្នុងខែមីនា ការនាំចេញរបស់ចិន បានធ្លាក់ចុះ ៦,៦% ដោយសារតែ មានការលុបចោលនូវ ការបញ្ជាទិញទំនិញពីបរទេស អំឡុងពេលដែល សេដ្ឋកិច្ចសកល កំពុងប្រឈមមុខនឹងមេរោគដ៏កាចសាហាវ។
សេដ្ឋកិច្ចវិទូ និងក្រុមអ្នកស្រាវជ្រាវចិន បានគូសបញ្ជាក់ថា ផលប៉ះពាល់សេដ្ឋកិច្ច នៅប៉ែកអឺរ៉ុប និងអាមេរិក អាចនឹងមានបញ្ហាធ្ងន់ធ្ងរ ដូច្នេះហើយ ប្រទេសចិន ពុំទាន់អាចពង្រឹងសេដ្ឋកិច្ចបានឡើងវិញភ្លាមៗនោះទេ នៅពេលដែលសេដ្ឋកិច្ចសកលកំពុងរងគ្រោះ។
អត្ថបទពិសេស!
យ៉ាងណាក៏ដោយ អ្នកនាំពាក្យនៃការិយាល័យស្ថិតិជាតិចិន
រំពឹងថា ចិន នឹងអាចសម្រេចបាននូវ កំណើនសេដ្ឋកិច្ច ៥% ក្នុងឆ្នាំ ២០២០ ហើយអ្វីៗ
នឹងកាន់តែប្រសើរឡើងវិញ នៅក្នុងត្រីមាសទី ២ និងពេលបន្តបន្ទាប់ បើសិនជាមេរោគកូវីដត្រូវបានគ្រប់គ្រងបានល្អ។
ជាចុងក្រោយសេដ្ឋកិច្ចវិទូចិន បានអះអាងថា ផលប៉ះពាល់ពីមេរោគកូវីដ១៩ មិនជះឥទ្ធិពលខ្លាំងដល់ ការលូតលាស់រីកចម្រើន រយៈពេលវែង របស់ប្រទេសចិន នោះឡើយ ដោយសារតែបញ្ហាមេរោគនេះ កាន់តែធូរស្បើយច្រើន ហើយរដ្ឋាភិបាលចិន ក៏បានដាក់ចេញនូវ វិធានការសង្គ្រោះសំខាន់ៗ ដើម្បីទប់ស្កាត់ការឆ្លងរីករាលដាល ក៏ដូចជា ជួយស្រោចស្រង់សេដ្ឋកិច្ចឡើងវិញ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
