ក្រុមហ៊ុន Evergrande ដែលជាក្រុមហ៊ុនយក្សរបស់ចិន មានឱបបំណុលជាប់ខ្លួនជាង៣០០ពាន់លានដុល្លារអាមេរិកនោះ នៅតែប្រឈមនឹងបញ្ហាដោះស្រាយមិនទាន់រួចនៅឡើយទេ។ ជាក់ស្ដែង តាមការចុះផ្សាយដោយសារព័ត៌មាន Bloombergបានឲ្យដឹងថា ភាគហ៊ុនក្រុមហ៊ុន Evergrand រួមទាំងភាគហ៊ុនរបស់ក្រុមហ៊ុនបុត្រសម្ព័ន្ធដូចជា Evergrande Property Services Group និង China Evergrande New Energy Vehicle Group ត្រូវបានផ្អាកការជួញដូរនៅក្នុងទីផ្សារភាគហ៊ុនហុងកុង ដោយមិនមានការបញ្ជាក់ពីហេតុផលនោះឡើយ។
សូមជម្រាបថា ការផ្អាកនេះធ្វើឡើងបន្ទាប់ពីក្រុមហ៊ុន Evergrande ដែលមានមូលដ្ឋាននៅទីក្រុងស៊ិនជិនប្រទេសចិនមួយនេះ បានបញ្ជាក់កាលពីខែមករាថា ខ្លួនមានគោលបំណងបង្ហាញសំណើររៀបចំរចនាសម្ព័ន្ធបឋមក្នុងរយៈពេលប្រាំមួយខែបន្ទាប់ ខណៈក្រុមហ៊ុននេះបានស្ថិតនៅចំកណ្តាលនៃវិបត្តិលំហូរសាច់ប្រាក់ក្នុងចំណោមអ្នកអភិវឌ្ឍន៍អចលនទ្រព្យរបស់ចិនបន្ទាប់ពីការបង្រ្កាបរបស់ទីក្រុងប៉េកាំង។
អត្ថបទគួរអាន
ជាមួយគ្នានេះ វិនិយោគិនក៏កំពុងសម្លឹងមើលសញ្ញានៃការលក់ទ្រព្យសកម្មបន្ថែមទៀតផងដែរ ខណៈដែលក្រុមហ៊ុននេះប្រឈមនឹងសម្ពាធពីម្ចាស់បណ្ណបំណុល និងម្ចាស់បំណុលនៅក្រៅប្រទេស ហើយវាទំនងអ្វីដែលគេហៅថា ជាការធ្វើរចនាសម្ព័ន្ធឡើងវិញដ៏ធំបំផុតមួយរបស់ក្រុមហ៊ុននៅក្នុងប្រទេសចិន។
សូមរំឭកថា ក្រុមហ៊ុន Evergrande Group ជំពាក់បំណុលច្រើនជាង ៣០០ ពាន់លានដុល្លារ ហើយស្ថិតនៅក្រោមសម្ពាធក្នុងការបង់ប្រាក់ឱ្យអ្នកផ្គត់ផ្គង់ និងកម្មករចំណាកស្រុក ព្រមទាំងការសាងសង់ផ្ទះមិនហើយរួចរាល់តាមផែនការផងដែរ។
គួរជម្រាបថា ភាគហ៊ុនរបស់ក្រុមហ៊ុន Evergrande Group បានកើនឡើង ៣,៨% នៅក្នុងទីក្រុងហុងកុងនៅឆ្នាំនេះ បន្ទាប់ពីដាំក្បាលចុះអស់ ៨៩% ក្នុងឆ្នាំ ២០២១៕
អត្ដបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
