ចិនត្រូវបានគេស្គាល់ថាជាប្រទេសមានបណ្តាញខ្សែរថភ្លើងល្បឿនលឿនដ៏វែងជាងគេនៅក្នុងលោក ហើយពេលនេះចិននៅតែបន្ដមហិច្ឆតាផ្លូវដែកនេះបន្ថែមទៀត ដោយមានគម្រោងពង្រីកផ្លូវដែកប្រមាណ ១ម៉ឺន២ពាន់គីឡូម៉ែតបន្ថែមទៀត ធ្វើឲ្យប្រវែងសរុបនឹងមានដល់៥ម៉ឺនគីឡូម៉ែត នៅមុនឆ្នាំ២០២៥។ នេះបើយោងតាមផែនការដឹកជញ្ជូនថ្មីមួយសម្រាប់រយៈពេលប្រាំឆ្នាំរបស់ក្រុមប្រឹក្សារដ្ឋចិន។
ការបង្កើនប្រវែងខ្សែរថភ្លើងល្បឿនលឿនរបស់ចិននេះ គឺលើសពីប្រវែងនៃបណ្តាញផ្លូវដែកល្បឿនលឿនក្នុងប្រទេសធំៗចំនួន៥រួមបញ្ចូលគ្នាឯណោះ រួមមាន ប្រទេសអេស្ប៉ាញ ជប៉ុន បារាំង អាល្លឺម៉ង់ និងហ្វាំងឡង់។ បើតាមទិន្នន័យពីអង្គការសហភាពផ្លូវដែកអន្តរជាតិកាលពីឆ្នាំមុន ប្រវែងផ្លូវដែកនៃប្រទេសទាំង៥ ខាងលើ រួមបញ្ចូលគ្នាគឺមានតែប្រមាណ ១ម៉ឺន២ពាន់គីឡូម៉ែតប៉ុណ្ណោះ។
ជាមួយនឹងប្រព័ន្ធផ្លូវដែកដ៏សម្បើមបែបនេះក្តី ក្រុមប្រឹក្សារដ្ឋចិននៅតែអះអាងថា ប្រព័ន្ធដឹកជញ្ជូនរបស់ប្រទេសចិន មិនមានតុល្យភាព និងមិនទាន់ត្រូវបានអភិវឌ្ឍគ្រប់គ្រាន់នៅឡើយ ពោលនៅមានភាពខ្វះខាតសម្រាប់រថភ្លើងតភ្ជាប់ពីទីក្រុងមួយទៅទីក្រុងមួយទៀត និងតំបន់ទីប្រជុំជនជាច្រើនទៀត។អត្ថបទគួរអាន
គួរជម្រាបថា គម្រោងពង្រីកប្រព័ន្ធផ្លូវដែកដឹកជញ្ជូនក្នុងប្រទេសចិន អាចជាវិធានការមួយរបស់រដ្ឋអំណាចទីក្រុងប៉េកាំង ក្នុងការអភិវឌ្ឍហេដ្ឋារចនាសម្ព័ន្ធថ្មីៗ ដើម្បីរួមចំណែកទប់ស្កាត់ការធ្លាក់ចុះនៃសេដ្ឋកិច្ចរបស់ប្រទេសខ្លួន។
បើតាមអ្នកវិភាគ កត្តាដែលធ្វើឲ្យសេដ្ឋកិច្ចចិនមានកំណើនយឺតចាប់ពីពាក់កណ្តាលឆ្នាំ២០២១មក ក៏ដោយសារតែកត្តាពីរសំខាន់ ទីមួយគឺបញ្ហាអចលនទ្រព្យ និងទី២ដោយសារភាពទន់ខ្សោយនៃហេដ្ឋារចនាសម្ព័ន្ធនៅក្នុងស្រុក។
សូមជម្រាបថា ក្រៅតែពីផែនការ៥ឆ្នាំដែលបានដាក់ចេញខាងលើ ចិនកំពុងធ្វើសេចក្តីព្រៀងផែនការសម្រាប់រយៈពេល១០ឆ្នាំមួយផ្សេងទៀត ដែលឈានទៅពង្រីកផ្លូវរថភ្លើងល្បឿនលឿនឲ្យបានដល់ប្រវែង២០ម៉ឺនគីឡួម៉ែត្រត្រឹមឆ្នាំ២០៣៥។
មិនត្រឹមតែជំរុញការតភ្ជាប់ផ្លូវរថភ្លើងក្នុងស្រុកទេ ប្រទេសចិនកំពុងជំរុញតភ្ជាប់ផ្លូវរថភ្លើល្បឿនលឿននេះជាមួយប្រទេសក្នុងតំបន់ផងដែរ ដោយថ ថ្មីៗនេះ ចិនក៏ទើបតែបានបើកសម្ពោធឲ្យប្រើប្រាស់ផ្លូវរថភ្លើងល្បឿនលឿនរវាងប្រទេសចិន និងប្រទេសឡាវផងដែរ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
