បើតាមរបាយការណ៍ពី គណៈកម្មការអភិវឌ្ឍន៍ និងកំណែទម្រង់ជាតិនៃប្រទេសចិន បានគូសបញ្ជាក់ថា តម្លៃសាច់នៅតាមផ្សារទំនើបធំៗ ទូទាំងប្រទេស បានថយចុះគួរឲ្យកត់សម្គាល់ ធៀបនឹងខែវិច្ឆិកា ឆ្នាំ២០១៩ ដែលបានកើនឡើងខ្ពស់លើសពីការរំពឹងទុកដោយសារ ជម្ងឺប៉េស្តជ្រូក។ ក្នុងនោះ តម្លៃសាច់មាន់ ថយចុះ ១៣% តម្លៃស៊ុត ថយចុះ ១៥% រីឯតម្លៃសាច់ជ្រូកលក់រាយ ថយចុះ ១១%។
មន្រ្តីជាន់ខ្ពស់នៃគណៈកម្មការអភិវឌ្ឍន៍ និងកំណែទម្រង់ជាតិ បានគូសបញ្ជាក់ថា សាច់ជ្រូកសុទ្ធ (សាច់គ្មានជាប់ខ្លាញ់) នៅតាមផ្សារទំនើបធំៗ គឺមានតម្លៃប្រមាណ ៨,៧៤ ដុល្លារ ក្នុងមួយគីឡូក្រាម អំឡុងពេលនេះ ហើយរំពឹងនឹងរក្សាបាននូវស្ថិរភាពថ្លៃរហូតដល់បុណ្យចូលឆ្នាំចិន នៅសប្តាហ៍ចុងខែមករានេះ។
អត្ថបទទាក់ទង!
របាយការណ៍ បានគូសបញ្ជាក់បន្ថែមថា នាពេលថ្មីៗនេះ ចំនួនជ្រូក ដែលត្រូវបានសម្លាប់ទូទាំងប្រទេស មានការកើនឡើងហើយរដ្ឋាភិបាលចិន ក៏បានបញ្ចេញស្តុកជ្រូកកក ហើយការផ្គត់ផ្គង់សាច់ផ្សេងជំនួស ក៏មានការកើនឡើងខ្ពស់ផងដែរ ដើម្បីធានាថ្លៃសាច់ឲ្យនៅមានស្ថិរភាព។
សម្រាប់វិធានការណ៍រយៈពេលខ្លី រដ្ឋាភិបាលចិន បានបន្ថូរបន្ថយអត្រាពន្ធ លើការនាំចូលសាច់ជ្រូកកក ដើម្បីអាចនាំចូលសាច់ជ្រូកដែលមានគុណភាព មកកាន់ទីផ្សារចិន ដើម្បីធានាការផ្គត់ផ្គង់ និងរក្សាស្ថិរភាពថ្លៃ។
លើសពីនេះ រដ្ឋាភិបាលចិនបានចាត់វិធានការជាច្រើន ដើម្បីជំរុញការផ្គត់ផ្គង់សាច់ជ្រូកឡើងវិញ ដូចជា ការជួយឧបត្ថម្ភធនពង្រឹងផលិតកម្មសាច់ជ្រូក ពង្រីកការនាំចូលបន្ថែម និងបញ្ចេញនូវ ស្តុកសាច់ជ្រូកកក។
រដ្ឋាភិបាលចិន បានបញ្ចេញនូវប្រាក់ឧបត្ថម្ភធនប្រមាណ ៧ម៉ឺនដុល្លារ ទៅ ៧០ម៉ឺនដុល្លារអាមេរិក ពីថវិកាជាតិ ដើម្បីជួយដល់កសិដ្ឋានធំៗដែលចិញ្ចឹមជ្រូក ដើម្បីគាំទ្រដល់ការកសាងកន្លែងចិញ្ចឹមរួម ដែលអាចការពារពីការរីករាលដាលនៃជម្ងឺ និងរោងចក្រដាក់ចំណីដោយស្វ័យប្រវត្តិ។
ចិន ជាប្រទេសដែលប្រើប្រាស់សាច់ជ្រូកច្រើនជាងគេបំផុត ហើយកាលពីដើមខែកញ្ញានេះ ទើបតែបានលុបចោលការកម្ម៉ង់ទិញ សាច់ជ្រូកពីអាមេរិកជាង ១,៤ម៉ឺនតោន ដោយសារតែជម្លោះពាណិជ្ជកម្មរវាងប្រទេសទាំងពីរ។
តាមការសិក្សារបស់ ក្រុមប្រឹក្សាផលិតសាច់ជ្រូកជាតិរបស់សហរដ្ឋអាមេរិក បានបញ្ជាក់ថា ទីផ្សារសាច់ជ្រូកចិន អាចនឹងមានតម្លៃ ២៤ពាន់លានដុល្លារអាមេរិក ក្នុងរយៈពេល ១០ឆ្នាំ បើសិនជា អាមេរិកទទួលបានការអនុញ្ញាតនាំចូលដោយមិនមានគំនាប។
គួររម្លឹកថា ជម្ងឺប៉េស្តជ្រូកបានរាតត្បាតនៅក្នុងប្រទេសចិន តាំងពីខែសីហា ឆ្នាំ ២០១៨មកម្ល៉េះ ដែលធ្វើឲ្យ ចិនបានបាត់បង់ការផ្គត់ផ្គង់ជ្រូក យ៉ាងហោចណាស់ក៏ ៤០% នៃចំនួនសរុប ដែលធ្វើឲ្យ ចិន មានកង្វះខាតសាច់ជ្រូកខ្លាំងបំផុត និងរុញច្រានតម្លៃសាច់ជ្រូកនៅចិនលើសពីការរំពឹងទុក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
