បញ្ជាការដ្ឋានអវកាសអាមេរិក បាននិយាយលើគណនី Twitter ថា យាន្តដែលមានឈ្មោះ Long March 5B បានធ្លាក់ចូលទៅក្នុងមហាសមុទ្រឥណ្ឌានៅម៉ោងប្រហែល ១២និង៤៥នាទីយប់ ថ្ងៃសៅរ៍។ ប៉ុន្តែបញ្ជាការដ្ឋានអវកាសអាមេរិក ចោទជាសំណួរទៅកាន់ចិនថា បំណែកកំទេចកំទីឯទៀតនៃយាន្ត នឹងធ្លាក់ទៅទីតាំងណាផ្សេងទៀត។
លោក Bill Nelson មន្ត្រីអង្គការ NASA បណ្តាប្រទេសដែលមានយាន្តអវកាសធ្វើដំណើរនៅជុំវិញផែនដីទាំងអស់ គួរតែអនុវត្តឱ្យល្អបំផុត ក្នុងការចែករំលែកព័ត៌មានដូចក្នុងករណីខាងលើជាមុន ដើម្បីអនុញ្ញាតឱ្យមានការព្យាករណ៍ដែលអាចទុកចិត្តបាន នៃហានិភ័យនិងផលប៉ះពាល់នៃកំទេចកំទីធ្លាក់ចុះមក។ ការធ្វើដូច្នេះគឺមានសារៈសំខាន់ចំពោះការប្រើប្រាស់លំហរប្រកបដោយការទទួលខុសត្រូវ និងដើម្បី ធានាសុវត្ថិភាពមនុស្សនៅលើផែនដី។
រូបភាពបង្ហោះលើបណ្តាញសង្គមរបស់អ្នកប្រើប្រាស់នៅប្រទេសម៉ាឡេស៊ី ដែលត្រូវគេថតបានបង្ហាញអំពី កំទេចកំទីដែលទំនងជារបស់យាន្តអាវកាស ធ្លាក់ចុះពីលើមេឃ។
ក្រុមហ៊ុន Aerospace Corp ដែលជាមជ្ឈមណ្ឌលស្រាវជ្រាវមិនស្វែងរកប្រាក់ចំណេញរបស់រដ្ឋាភិបាលអាមេរិក បាននិយាយថា នេះជារឿងខ្វះការប្រុងប្រយ័ត្នបំផុតដែលអនុញ្ញាតយាន្តរ៉ុក្កែត ទម្ងន់ជាង២០តោន ធ្លាក់ត្រឡប់មកផែនដីវិញដោយមិនមានព័ត៌មានច្បាស់លាស់។
ស្ថានទូតចិនប្រចាំទីក្រុងវ៉ាស៊ីនតោនមិនបានធ្វើអត្ថាធិប្បាយភ្លាមៗទេចំពោះរឿងនេះ ខណៈក្រុងប៉េកាំងបាននិយាយកាលពីដើមសប្តាហ៍នេះថា ខ្លួននឹងតាមដានយ៉ាងដិតដល់នូវកំទេចកំទី របស់យាន្តនេះ ប៉ុន្តែបាននិយាយថា វាមានហានិភ័យតិចតួចណាស់ដល់មនុស្សនៅលើផែនដី។
គួររំឭកថា យាន Long March 5B បានបាញ់បង្ហោះកាលពីថ្ងៃទី២៤ ខែកក្កដា ដើម្បីបញ្ជូនសម្ភារៈ មន្ទីរពិសោធន៍ទៅស្ថានីយអវកាសថ្មីរបស់ចិនដែលកំពុងសាងសង់ក្នុងគន្លងតារាវិថី។ វាជាការបាញ់បង្ហោះលើកទី៣ នៃរ៉ុក្កែតដ៏មានឥទ្ធិពលបំផុតរបស់ប្រទេសចិន ចាប់តាំងពីការបាញ់បង្ហោះលើកដំបូងក្នុងឆ្នាំ២០២០៕
